“Nka Bona Kae Nako?”
1 Bontsi jwa rona re ngongorega jalo ka gonne re dira dilo di le dintsi mo botshelong. Go ile ga bolelwa gore nako ke selo sa botlhokwa thata mme gape ke letlotlo la nakwana fela mo matlotlong a rona otlhe. Ka jalo, re ka bona kae nako ya go dira dilo tse ruri di leng botlhokwa, tse di jaaka go bala le go ithuta Lefoko la Modimo?—Bafil. 1:10.
2 Tharabololo ga se go leka go batla nako e e oketsegileng, mme ke go swetsa ka gore re batla go dira eng ka nako e re nang le yone. Rotlhe re na le diura di le 168 ka beke, tse re ka nnang ra fetsa di le 100 tsa tsone re robetse e bile gape re le kwa tirong. Ka jalo, re ka dirisa diura tse di setseng ka tsela efe e e molemo? Baefeso 5:15-17 e kgothaletsa gore re tsamaye ‘e seng jaaka batho ba ba seng botlhale mme jaaka ba ba botlhale, re ithekele nako e e re siametseng . . . , go lemoga se e leng thato ya ga Jehofa.’ Seno se bontsha botlhokwa jwa go dirisa sebaka sengwe le sengwe ka botlalo go dira dilo tse Jehofa a reng di botlhokwa.
3 Jesu o ne a tshwantsha metlha ya rona le ya ga Noa. (Luke 17:26, 27) Batho ka nako eo ba ne ba tshwaregile thata ka dilo tsa letsatsi le letsatsi tsa botshelo. Le fa go ntse jalo, Noa o ne a dira gore a nne le nako ya go aga araka e kgolo le nako ya go rera. (Baheb. 11:7; 2 Pet. 2:5) Jang? Ka go baya thato ya Modimo kwa pele le ka go mo ikobela ka go dira dilo “fela jalo.”—Gen. 6:22.
4 Ke Eng se se Tshwanetseng go Tla Pele? Jesu o ne a bolela jaana: “Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.” (Math. 4:4) Beke nngwe le nngwe, re amogela “selekanyo . . . sa dijo [tsa semoya] ka nako e e tshwanetseng.” (Luke 12:42) Seno se tlhoka gore re nne le thulaganyo ya ka metlha ya go bala le go ithuta ka namana gore re kgone go monya tshedimosetso yotlhe fa e le gore re batla go solegelwa molemo eleruri. Ka ntlha ya gore re anaanela dijo tsa semoya, ga re di lebe jaaka dijo tse di botlhoswana, tse re ka di balang fela ka bonako jaaka motho yo o jang a itlhaganetse. Go na le moo, go anaanela ga rona dijo tseno ka tsela e e tshwanetseng go re tlhotlheletsa go ipha nako ya go ithuta le go ipelela dilo tsa semoya.
5 Go ja dijo tsa semoya go isa botshelong jo bo sa khutleng. (Joh. 17:3) Go tshwanetse ga tsaya maemo a ntlha mo thulaganyong ya rona ya letsatsi le letsatsi. A re ka kgona go bona nako ya go bala Baebele letsatsi le letsatsi le go baakanyetsa dipokano tsa Bokeresete? Ee, re ka kgona. Mme re tla amogela “maduo a magolo” ka go bo re itse Modimo e bile re dira le thato ya gagwe.—Pes. 19:7-11.