Masego a go Bontsha go Anaanela Lorato Lwa ga Jehofa—Karolo 1
1 Moaposetoloi Johane o ne a kwala jaana: “Mme rona, re a rata, ka gonne [Jehofa] a re ratile pele.” (1 Joh. 4:19) Fa re akanya ka dilo tsotlhe tse Jehofa a re neileng tsone, re tlhotlheletsega go mo leboga ka go bontsha kanaanelo ya rona e kgolo. Jesu o ne a tlhoma sekao mo go direng seno ka go naya bosupi ka boikanyegi ka leina la Modimo le Bogosi jwa gagwe. (Joh. 14:31) Go molemo go akanya ka ditsela dingwe tse re ka bontshang ka tsone gore re anaanela lorato lwa ga Jehofa le masego a re a bonang ka ntlha ya moo.
2 Go ya Ka Ntlo le Ntlo: Jesu o ne a ruta barutwa ba gagwe tsela ya go dira tiro ya go rera ka Bogosi. Dikaelo tsa gagwe di bontsha sentle gore ba ne ba tsamaya ka ntlo le ntlo, ba anamisa dikgang tse di molemo. (Luke 9:1-6; 10:1-7) Re tshwanetse go rata Modimo le moagelani gore re tswele pele re tsamaya ka ntlo le ntlo fa re kopana le batho ba ba sa kgatlhegeng le fa re ganediwa. Le fa go ntse jalo, fa re ntse re dira tiro eno, rona ka borona re solegelwa molemo ka gonne tumelo ya rona e a nitama, boikutlo jwa rona jwa go tlhatswega pelo bo a nonofa, mme tsholofelo ya rona e simolola go bonala sentle.
3 E re ka baengele ba re kaela mo tirong ya rona, re bone batho ba le bantsi ba ba tshwerweng ke tlala le ba ba nyoretsweng boammaaruri. (Tshen. 14:6) Beng ba matlo ba ile ba bolela gore ba ne ba ntse ba rapelela thuso fa Basupi ba ba etela kwa matlong a bone. Basupi bangwe ba babedi ba ba neng ba tsamaya le ngwana ba ne ba tsamaya ka ntlo le ntlo kwa setlhaketlhakeng sa Caribbean. E ne ya re fa bagolo bano ba babedi ba swetsa ka gore ba ye gae, ngwana yono o ne a ya kwa ntlong e e latelang a le esi mme a kokota. Mosadi mongwe yo mmotlana o ne a bula kgoro. Fa bagolo ba bona seno, ba ne ba ya teng mme ba bua le mosadi yoo. O ne a ba kopa gore ba tsene mme a ba tlhalosetsa gore o ne a ntse a rapela Modimo gore a romele Basupi kwa go ene gore ba mo rute Baebele!
4 Go Naya Bosupi mo Mebileng: E re ka kwa mafelong mangwe go le thata go fitlhela batho kwa magaeng, go naya bosupi mo mebileng ke tsela nngwe e e nang le matswela thata ya go naya batho bosupi. Mo godimo ga moo, batho ba le bantsi ba nna ba tswetse diheke kana ba nna mo dikagong tse di nang le tshireletso e e gagametseng koo re sa kgoneng go tsamaya ka ntlo le ntlo gone. Le fa go ntse jalo, go anaanela ga rona lorato lwa ga Jehofa go re tlhotlheletsa go dirisa ditsela tsotlhe tse di kgonegang go abela batho molaetsa wa Bogosi, go akaretsa le go naya bosupi mo mebileng.—Dia. 1:20, 21.
5 Go Dira Maeto a go Boela: E re ka re batla batho ba ba “tshwenyegang ka se ba se tlhokang semoyeng,” re batla go dira sengwe le sengwe se re ka se kgonang go ba naya se ba se tlhokang. (Math. 5:3) Seno se tlhoka gore re boele kwa go bone go ya go nosetsa dipeo tsa boammaaruri tse re di jetseng. (1 Bakor. 3:6-8) Kgaitsadi mongwe kwa Australia o ne a tsamaisetsa mosadi mongwe pampitshana yo o neng a lebega a sa bontshe kgatlhego e kalo. Le fa go ntse jalo, kgaitsadi yono o ne a tswelela pele a leka gape go mo fitlhela mo gae. E ne ya re kgabagare a kopana le ene, kgaitsadi wa rona a fitlhela gore morago ga loeto lwa ntlha, mosadi yono o ne a reka Baebele e e turang. Kgaitsadi yono o ne a simolola go mo tshwarela thuto!
6 Go Tshwara Dithuto Tsa Baebele: Eno e ka nna karolo e e itumedisang thata le e e nang le matswela thata mo bodireding jwa rona. A bo e le lesego jang ne go thusa batho go ithuta ka Jehofa, go ba bona ba fetola matshelo a bone gore ba mo itumedise, go tswa foo o bo o ba bona ba bontsha boineelo jwa bone mo Modimong ka go kolobediwa go nna Bakeresete!—1 Bathes. 2:20; 3 Joh. 4.
7 Mo kgatisong e e latelang, re tlile go sekaseka ditsela tse dingwe gape tse re segofadiwang ka tsone fa re bontsha gore re anaanela lorato lwa ga Jehofa.