Bakaulengwe ba Basha, A lo A Kgaratlha?
1. Mokaulengwe yo o mosha o tshwanetse go simolola leng go dirisa kaelo e e fitlhelwang mo go 1 Timotheo 3:1?
1 ‘Fa monna ope a kgaratlha . . . , o eletsa tiro e e molemo.’ (1 Tim. 3:1) Mafoko ao a a tlhotlheleditsweng a kgothaletsa bakaulengwe go kgaratlhela go tshwanelegela ditshiamelo tsa tirelo mo phuthegong. A o tshwanetse gore o nne mogolo gore o tshwanelege? Tota e bile, go molemo go simolola go kgaratlha o sa le mosha. Ka tsela eno, o ka newa thapiso le go itshupa gore o siametse go ka tlhomiwa go nna motlhanka wa bodiredi fa o setse o godile. (1 Tim. 3:10) Fa o le mokaulengwe yo mosha yo o kolobeditsweng, o ka kgaratlha jang?
2. Re ka lwela go nna le moya wa go intsha setlhabelo jang e bile re ka o bontsha jang?
2 Go Intsha Setlhabelo: Gakologelwa gore o kgaratlhela tiro e e molemo, e seng go nna le maemo. Ka jalo, lwela go nna le keletso ya go thusa bakaulengwe le bokgaitsadi ba gago. Tsela nngwe ya go dira seno ke ka go tlhatlhanya ka sekao se se molemo sa ga Jesu. (Math. 20:28; Joh. 4:6, 7; 13:4, 5) Kopa Jehofa gore a go thuse gore o kgatlhegele batho ba bangwe. (1 Bakor. 10:24) A o ka kgona go thusa batho ba ba mo phuthegong ba ba godileng le ba ba bokoa? A o nna le seabe mo go thuseng ka go sega llono, go phepafatsa Holo ya Bogosi kgotsa go boloka Holo ya Bogosi e le mo maemong a a siameng? A o ka ithaopela go neela puo e go se nang ope yo o e neelang mo Sekolong sa Bodiredi sa Puso ya Modimo? Fa o direla batho ba bangwe, seo se tla go leretse boipelo.—Dit. 20:35.
3. Go gola semoyeng go botlhokwa go le kana kang, mme o ka go bontsha jang?
3 Go Gola Semoyeng: Go botlhokwa thata gore motlhanka mo phuthegong a gole semoyeng go na le gore a nne le bokgoni jo bo kgethegileng. Monna yo o godileng semoyeng o leka go leba dilo ka tsela e Jehofa le Jesu ba di lebang ka yone. (1 Bakor. 2:15, 16) O bontsha “maungo a moya.” (Bagal. 5:22, 23) Ke moefangele yo o tlhoafetseng yo o dirang gore dilo tse di direlwang Bogosi e nne tsone tse di tlang pele. (Math. 6:33) O ka kgona go nna le dinonofo tsa semoya ka go nna le thuto ya motho a le nosi ya ka metlha. Seno se ka akaretsa go bala Baebele malatsi otlhe, go bala kgatiso nngwe le nngwe ya Tora ya Tebelo le ya Tsogang! le go baakanyetsa dipokano tsa phuthego le go nna teng kwa go tsone. (Pes. 1:1, 2; Baheb. 10:24, 25) Fa Moaposetoloi Paulo a ne a kgothatsa Timotheo gore a dire gore botswelelopele jwa gagwe bo bonatshege, o ne a kwala jaana: ‘Nna o tlhokometse go ruta ga gago.’ (1 Tim. 4:15, 16) Ka jalo, dira ka natla mo dikabelong tsa gago tsa Sekolo sa Bodiredi sa Puso ya Modimo. Baakanyetsa bodiredi mme o nne le seabe mo go jone ka metlha. Ipeele mekgele ya semoya o bo o lwela go e fitlhelela, jaaka go nna mmulatsela, go direla kwa Bethele kgotsa go tsenela Sekolo sa Baebele sa Bakaulengwe Ba ba Sa Nyalang. Go gola semoyeng go tla go thusa gore o ‘tshabe dikeletso tse basha ba nang le go nna le tsone.’—2 Tim. 2:22.
4. Botlhokwa jwa go ikanyega ke bofe?
4 Go Ikanyega: Bakaulengwe ba ba neng ba abetswe go naya Bakeresete ba ba tlhokang ba lekgolo la ntlha la dingwaga dijo ba ne ba ‘tlhomamisitswe’ ka gonne ba itsege ka boikanyegi. Ka jalo, baaposetoloi ba ne ba sa tlhoke go tshwenyega ka gore a tiro e tla dirwa. Seno se ne se ba thusa gore ba tlhome mogopolo mo dilong tse dingwe tse di botlhokwa. (Dit. 6:1-4) Ka jalo, fa o neilwe kabelo mo phuthegong, e dire ka bojotlhe. Etsa Noa, yo o neng a latela ditaelo tse a neng a di neilwe tsa go aga araka ka kelotlhoko. (Gen. 6:22) Jehofa o leba boikanyegi bo le botlhokwa e bile bo bontsha go gola semoyeng.—1 Bakor. 4:2; bona lebokoso le le reng “Melemo ya Thapiso.”
5. Ke ka ntlha yang fa bakaulengwe ba basha ba tshwanetse go kgaratlha?
5 Jaaka go ile ga bolelelwapele, Jehofa o akofisa tiro ya go phutha batho. (Isa. 60:22) Ngwaga le ngwaga go kolobediwa palogare ya batho ba le kotara ya milione. E re ka go na le batho ba le bantsi ba ba tlang mo boammaaruring, go tlhokega banna ba ba tshwanelegang semoyeng gore ba tlhokomele maikarabelo a phuthego. Gone jaanong, go na le tiro e ntsi e e ka dirwang mo tirelong ya ga Jehofa go feta le fa e le leng pele. (1 Bakor. 15:58) Bakaulengwe ba basha, a lo a kgaratlha? Fa e le gore go ntse jalo, lo eletsa go dira tiro e e molemo tota!
[Mafoko a setshwantsho mo go tsebe 2]
E re ka go na le batho ba le bantsi ba ba tlang mo boammaaruring, go tlhokega banna ba ba tshwanelegang semoyeng gore ba tlhokomele maikarabelo a phuthego
[Mafoko a setshwantsho mo go tsebe 3]
Melemo ya Thapiso
Bakaulengwe ba basha ba ba tshwanelegang ba solegelwa molemo fa bagolwane ba ba naya dikabelo le go ba thapisa. Morago ga pokano, molebedi wa potologo o ne a ntse mo seraleng a kgothatsa mmoledi. O ne a bona mokaulengwe mongwe yo mosha a eme gaufi le bone, ka jalo, o ne a mmotsa gore a o batla go bua le ene. Mokaulengwe yono o ne a re o abetswe go phepafatsa serala morago ga pokano nngwe le nngwe. Batsadi ba gagwe ba ne ba batla go tsamaya, mme o ne a sa batle go tsamaya a sa dira kabelo ya gagwe. Ka boipelo, molebedi wa potologo o ne a mo sutela. O ne a re: “Bagolwane ba phuthego eo ba ne ba iketleeditse go thapisa bakaulengwe ba basha ba ba tshwanelegang ka go ba naya dikabelo mo phuthegong. Ka ntlha ya seo, go ne go sa gakgamatse gore ba buelele mokaulengwe yo mosha go nna motlhanka wa bodiredi fa ke ne ke etetse phuthego ya bone.”