Diponalo Tse di Farologaneng Tsa Batho ba ba Gobaditsweng ke Ntwa
“DINTWA tsa gompieno di farologane le tsa bogologolo . . . Ke baagi, e seng masole,” ba ba bolawang ka metlha, go begile jalo “Perspective,” thulaganyo nngwe e e gasiwang mo Radiong ya lekgotla la Ditšhaba Tse di Kopaneng. Ka sekai, mo ntweng ya ntlha ya lefatshe, e ne e le diperesente di le 5 fela tsa batho botlhe ba ba gobetseng ba e neng e le baagi. Le fa go ntse jalo, mo ntweng ya bobedi ya lefatshe, palo ya baagi ba ba gobetseng e ne ya tlhatlogela go diperesente di le 48. Mme Radio ya lekgotla la Ditšhaba Tse di Kopaneng e boletse gore gompieno, “mo e ka nnang batho botlhe ba ba gobalang mo dintweng ke baagi—90%—mme bontsi jwa bone ke basadi, bana le batsofe.”
Go ya ka Olara Otunnu, yo o leng mokwaledikakaretso wa lekgotla la Ditšhaba Tse di Kopaneng wa Special Representative for Children and Armed Conflict, “go lekanyediwa gore go bolailwe bana ba le dimilione di le pedi mo dintweng fa e sa le go tloga ka 1987.” Seo se supa gore go bolailwe bana ba ba fetang 450 ka letsatsi mo ntweng mo dingwageng di le 12 tse di fetileng! Mo godimo ga moo, mo nakong yone eo, bana ba ba fetang dimilione di le thataro ba ne ba gobala mo go maswe kana ba golafalela ruri.
Rre Otunnu o akantshitse gore tsela e nngwe e lekgotla la Ditšhaba Tse di Kopaneng le ka lwantshang palo e e ntseng e oketsega ya bana ba ba bolawang ke dintwa, ke ka go buelela mafelo a kagiso. “Mafelo a bana ba leng bantsi mo go one, a a jaaka dikolo, maokelo le mafelo a go tshamekelwang mo go one a tshwanetse go tsewa e le mafelo a go sa lwelweng mo go one.” Le fa go ntse jalo, Radio ya lekgotla la Ditšhaba Tse di Kopaneng e okeditse ka gore “go thibela dintwa di tloga fela” ke tsela e e molemo thata e lekgotla la Ditšhaba Tse di Kopaneng le ka tlhomamisang ka yone gore baagi ga ba bolawe ke ntwa. Eleruri, go dira gore batho ba se ke ba bolawa ke ntwa go tlhoka gore ntwa ka boyone e fedisiwe. A seo se tla ke se diragale?
Ka go bo batho ba sa bolo go nna ba ntse ba lwa, go a utlwala go bo batho ba bantsi ba ikutlwa gore batho ga ba kitla ba lere kagiso ya lefatshe lotlhe. Le fa go ntse jalo, Lefoko la Modimo, Baebele, le solofetsa gore Jehofa Modimo o tla go dira: “O khutlisa ditlhabano le kwa bokhutlong jwa lefatshe.” (Pesalema 46:9) Seno se tla diragala leng? Mme ke ka ntlha yang fa o ka tlhomamisega gore tsholofetso ya Modimo ya go lere kagiso mo lefatsheng lotlhe e tla diragala? Fa e le gore o ka rata go bona karabo ya dipotso tseno, tsweetswee kwalela bagatisi ba makasine ono, o dirisa aterese e e gaufi le wena mo go tse di mo tsebeng ya 5 kana o etele kwa Holong ya Bogosi ya Basupi ba ga Jehofa e e gaufi le wena. Ga o patelediwe e bile ga o duele sepe—o newa fela dikarabo tse di tlhamaletseng.
[Motswedi wa Setshwantsho mo go tsebe 12]
UN PHOTO 156450/J. Isaac