“Re a Lo Leboga ka Ntlha ya Lorato lo Logolo Lo lo Lo Bontshang Batho”

KA MOKWADI WA TSOGANG! KWA RUSSIA

◼ Kwa toropong ya Chita kwa ntlheng ya botlhaba jwa Siberia, phuthego nngwe ya Basupi ba ga Jehofa e ne e tlhola e dirisa tlelase ya sekolo sengwe go tshwarela dipokano tsa Bokeresete go fitlhela ba fudugela kwa Holong ya bone ya Bogosi e ntšha. E re ka Basupi ba ne ba boloka tlelase e le phepa, ba baakanya dilo tse di senyegileng mme ba le penomoni e bile ba le maitseo, bakaedi ba sekolo ba ne ba kwalela phuthego eo lekwalo, go e leboga.

Bontlhanngwe jwa lekwalo leo bo ne bo re: “Re a lo leboga ka ntlha ya lorato lo logolo lo lo lo bontshang batho, e leng selo se se bonwang ke mongwe le mongwe yo lo kopanang le ene, le ka ntlha ya ditiro tsa lona tsa borongwa le tsa go direla baagi ka kakaretso molemo. Re ka se ka ra lebala dilo tse re di ithutileng mo go lona mo dingwageng tse re ileng ra dirisana mmogo ka tsone, se se bontshang gore batho ba ba dumelang mo Modimong ba a tlotlega, ba kelotlhoko, ba pelonomi mme se se botlhokwa le go feta, ke batho ba ba nang le mekgele, ba na le tumelo le boikaelelo mo botshelong.” Basupi ba ga Jehofa ba anaanela mafoko ao.

◼ Mo e ka nnang dikilometara di le 5 500 kwa bophirima jwa Chita, moemedi mongwe wa lekala la Basupi ba ga Jehofa la kwa Russia o ne a lalediwa go nna teng kwa moletlong o o kgethegileng o o neng o rulagantswe ke batsamaisi ba kgaolo ya St. Petersburg. Ka ntlha yang? Ngwaga le ngwaga fa kapoko e sena go gakologa, Basupi ba lefelo leo ba thusa go olela matlakala a a koelaneng dikilometara di le 60 mo tseleng e e gaufi le lekala la bone. E le go bontsha kanaanelo ka ntlha ya moya ono wa go thusa mo setšhabeng, modiredimogolo mongwe o ne a abela moemedi wa lekala setifikeite sa tlotlo. Bareetsi ba ne ba opa diatla ka matlhagatlhaga. Se se kgatlhang ke gore, fa sebui sengwe se se neng se le teng kwa moletlong ono se sa bitse leina la Modimo e bong Jehofa sentle, batho ba le mmalwa ba e seng Basupi mo bareetsing ba ne ba baakanya phoso e a e dirileng, ba bontsha gore ba itse leina la Modimo le batho ba ba itsegeng ka lone.

Lebaka le legolo la go bo batho ba na le kitso eno ke ka ntlha ya bodiredi jwa phatlalatsa jwa Basupi ba ga Jehofa, ba ba ka nnang 150 000 kwa Russia. Mokgele wa bone ke go tswelela ba bontsha “batho lorato lo logolo,” ka go bolelela botlhe ba ba batlang go reetsa molaetsa o o gomotsang wa Baebele.—Mathaio 22:39.

[Setshwantsho mo go tsebe 29]

Lekala la Russia le ile la amogela setifikeiti sa tlotlo