Dikakgelo Tsa Babadi
Dikgato Tse Supa Tsa go Godisa Bana Botoka (August 2007) Makasine ono e ne e le karabo ya dithapelo tsa me. Ke na le ngwana wa mosetsana yo o nang le dingwaga di le nnè yo o ratang Jehofa, le fa go ntse jalo, ke nna ke ntse ke boifa go dira diphoso jaaka motsadi. Ka jalo, ke kopa Jehofa letsatsi le letsatsi gore a nthuse gore ke mo thapise. Ke leboga thata go bo lo amega ka rona batsadi.
Y.M.A., Mexico
Motseletsele ono wa ditlhogo o ne o ntse jaaka buka e e kaelang e e diretsweng lelapa la rona, o bua ka tsone dilo tse di neng di ntshwenya thata mo mogopolong! Gape e ne ya mpontsha kafa Jehofa a amegang ka batho ba gagwe ka teng. O utlwile dithapelo tsa me a bo a bona dikeledi tsa me mme o itse kafa ke neng ke tlhoka tshedimosetso eno ka gone.
J. M., United States
Mo ditsebeng di le mmalwa fela lo kgonne go akaretsa kaelo e e molemo le thuto e e dirang tota. Jaanong re tlhoka fela go latela dikaelo tseno!
E. L., Finland
A go Nna le Tsholofelo mo Botshelong go ka Tokafatsa Boitekanelo Jwa Gago? (September 2007) Setlhogo seno se nthusitse thata, ka gonne ka makgetlho a le mantsi ke ne ke ipona molato ka ntlha ya mathata a a neng a ntlhagela. Ka jalo, go ne ga dira gore ke akanye gore ga ke mmè yo o molemo mme ke ne ke nna ke ngomogile pelo. Le fa gone go se motlhofo go nna le tsholofelo mo botshelong, tshedimosetso eno e nthusitse go fokotsa dilo tse ke neng ke tshwenyegile ka tsone. Ke anaanela thata go bo lo bontshitse go amega ka rona ka ditlhogo tsa mofuta ono.
A. S., Ecuador
Go Opa ga Leino—Botlhoko Jo bo Sa Bolong go Nna Teng (September 2007) Ke ngaka ya meno e bile ke morutisi wa bongaka jwa meno. Ke kgatlhilwe thata ke tsela e setlhogo seno sa lona se kwadilweng bontle ka yone. Ke tshobokanyo e e molemo ya tshimologo ya bongaka jwa meno. Ke boleletse ditsala tsa me tse dintsi le batho ba ke berekang le bone ka sone.
C. R., United States
A ke Modimo a go Bakang? (September 2007) Nna le ditsala dingwe tsa me re ne ra kopana mmogo go tlotla ka ditsela tse di molemo tse re ka ipaakanyetsang maemo a tshoganyetso ka tsone. Re ne ra itumelela dijo tse di motlhofo re ntse re tlotla ka dintlha tse di molemo tse di mo lebokosong le le reng “A o Siametse go Tshaba?” mo setlhogong se se tlhalositsweng fa godimo, mme re bo re sekaseka dikgetsana tse di tsenyang dilo tse re ka di tlhokang mo maemong a tshoganyetso tse bangwe ba rona ba neng ba di baakanyeditse. Gape re ne ra tlotla ka botlhokwa jwa go nna tekatekano malebana le go ipaakanyetsa maemo a tshoganyetso. Re a itse gore go kokoanya dilwana tsa thuso ya namolo ga se tiro ya rona e e kwa setlhoeng e rona batlhanka ba Modimo re e dirang. Go na le moo, tiro ya rona ke go rera dikgang tse di molemo tsa Bogosi jwa Modimo le go bolelela ba bangwe ka tsholofetso e e itumedisang ya Modimo ka lefatshe le mo go lone go tla bong go se na poifo ya masetlapelo ape—a tlholego kgotsa a a bakilweng ke batho.
R. G., United States
Dira Gore Bana ba Gago ba Nne ba Sireletsegile! (October 2007) Ke ne ka sotliwa ka tlhakanelodikobo fa ke ne ke le ngwana. Ga ke ise ke kgone go bolelela batsadi ba me ka se se diragetseng. Ka jalo, ke ne ka gomodiwa thata ke ditlhogo tseno. Ke eletsa e kete batsadi ba ka bala makasine ono mme ba sireletse bana ba bone. Ke leboga Jehofa thata go bo a re naya tshedimosetso e e botlhokwa eno. Go ne go re gomotsa tota rona ba re sotlilweng ka tlhakanelodikobo.
R. I., Japane