Ditiragalo Tsa Lefatshe

◼ Aterese ya semolao ya Basupi ba ga Jehofa ya Internet (www.watchtower.org) ga jaana e neelana ka tshedimosetso ka dipuo di le 314. Ngwaga o o fetileng, go nnile le batho ba le dimilione di le 18 ba ba butseng aterese eno—e leng palogare ya ba le 49 249 letsatsi le letsatsi.

◼ “Kgwetlho ya go nna le metsi a a phepa le a mantsi a a lekanang mongwe le mongwe ke nngwe ya dikgwetlho tse di boima go gaisa e lefatshe le lebaneng le yone gompieno. Gangwe le gape kwa re batlang metsi gone, re fitlhela ditlhobolo.”—BAN KI-MOON, UN SECRETARY-GENERAL.

Boitumelo le Boitekanelo

Go ntse go akanngwa gore batho ba ba itumetseng le ba ba nang le tsholofelo mo botshelong ke bone ba ba itekanetseng go gaisa ba ba ngomogileng pelo, ba ba seng botsalano, kgotsa ba ba se nang tsholofelo mo botshelong. Mo patlisisong nngwe ya bosheng, babatlisisi ba sweditse ka gore batho ba ba nang le “maikutlo a boitumelo le tsholofelo” ba na le selekanyo se se kwa tlase sa cortisol—horomone e e bakang go ngomoga pelo e e ka bakang malwetse a a farologaneng fa selekanyo sa yone se ile kwa godimo. Gape batho bao ba nna le selekanyo se se kwa tlase sa “diporoteine tse pedi tse di bontshang go anama ga go ruruga mo mmeleng.” Go ya ka Dr. Andrew Steptoe wa University College, kwa Lontone, “boemo jwa maikutlo ga se kgang fela ya go gotsa, mme bo ikaegile ka tsela e re dirisanang le ba bangwe ka yone le ka go kgotsofala mo botshelong.”

Go Lebelela Ngwedi go Dirisiwa Thekenoloji

Ka makgolokgolo a dingwaga, Bamoseleme ba ile ba sekaseka legodimo lekgetlo la ntlha go bona ngwedi o mosha o o felang ka kgwedi ya Ramadan mme go bo go simolola Moletlo wa go Emisa go Itima Dijo. Ka tlwaelo fela, mo dikgaolong tse dingwe go lebelela ngwedi go tshwanelwa ke go dirwa kwantle ga didirisiwa tsa go bonela kgakala, mme morago ga moo moeteledipele wa bodumedi o tla itsise badumedi ka ene. Le fa go ntse jalo, mo dingwageng tse mmalwa tse di fetileng, baeteledipele ba bodumedi ba ile ba letlelela mekgwa ya maemo a a kwa godimo ya botegeniki. Baithutadinaledi ba kwa Iran, ba ba neng ba tsamaya le baeteledipele ba bodumedi gore ba tlhomamise se ba neng ba se bona, gone jaanong ba dirisa dithelesekoupo tse di maatla, didirisiwa tse motho a kgonang go bona ka tsone fa go le bosigo, tota le difofane tse di rweleng dilwana tsa go tlhatlhoba. Fa ba ka bona ngwedi e e tletseng ka bonako seno se tla raya gore ba tla simolola malatsi a boikhutso ka bonako.

A Masea a Kgona go Lemoga Tsela e ba Bangwe ba Itshwarang ka Yone?

Babatlisisi kwa Yale University, kwa U.S.A. ba re masea a dikgwedi di le thataro a nna le “bokgoni jwa go lemoga megopolo ya batho pele a ka bua.” Masea a dikgwedi di le thataro go ya go di le lesome a ne a lebile setshamekisi sengwe sa matlho a magolo se leka go pagama dithabana, fa ditshamekisi tse dingwe tsone di ne di leka go se thusa tse dingwe tsone di ne di se kgoromeletsa kwa morago. Lokwalodikgang lwa Houston Chronicle lo tlhalosa gore, masea ano a ne “a newa ditshamekisi tseno go bona gore ke setshamekisi sefe se ba tla tshamekang ka sone. Mo e batlang e le lesea lengwe le lengwe le ne la tlhopha setshamekisi se se neng sa thusa go na le se se neng se sa thuse.” Lokwalodikgang lono lwa re: “Ka jalo go ya bokgakaleng jo bo rileng, tota le bana ba kgona go lemoga pharologano magareng ga ditsala tse di sa siamang le tse di siameng, e bile ba itse le gore ba tshwanetse go tlhopha efe.”

“Go Nyorelwa Metsi A a Mo Dibotlolong”

Makasine wa U.S.News & World Report wa re: “Baamerika ba reka metsi a mantsi a dibotlolo, a a batlang a fitlha go dibilione di le 30 ka ngwaga.” Bareki ba le bantsi ga ba lemoge gore metsi a mantsi a dibotlolo ke metsi a a tswang mo dipompong, “ka jalo mongwe le mongwe yo o swetsang go nwa metsi a a mo dibotlolong go na le metsi a mo dipompong o tsieditswe.” Metsi a dipompo mo dinageng di le dintsi a tlhatlhobiwa gore a a tsamaisana le melao e e gagametseng. Mme fa a bapisiwa le metsi a dibotlolo a a “turang ka tsela e e feteletseng,” metsi a a tswang mo dipompong a “batla a bonwa mahala!”