Ditiragalo Tsa Lefatshe

◼ “Gone jaanong dikotsi tsa masetlapelo di le robongwe mo go di le lesome di amana le tlelaemete. Palo ya dikotsi tsa masetlapelo e e begilweng e ile ya menagana gabedi go tloga go 200 ka ngwaga go ya go palo e e fetang 400 mo masomeng a mabedi a dingwaga a a fetileng.”—JOHN HOLMES, UNITED NATIONS UNDER-SECRETARY-GENERAL FOR HUMANITARIAN AFFAIRS AND EMERGENCY RELIEF COORDINATOR.

Ditshwanelo Tsa Botho Tsa Batho ba Naga

Maikano a lekgotla la Ditšhaba Tse di Kopaneng Tsa Ditshwanelo Tsa Batho ba Naga a a ileng a amogelwa ka 2007, a setse jaanong a ranoletswe mo puong ya Se-Maya le Se-Nahuatl, dipuo tse pedi tse di buiwang thata kwa nageng ya Mexico. Lokwalodikgang lwa El Universal lwa re: “Bobotlana batho ba le dimilione di le lesome kwa [Mexico] ga ba itse ditshwanelo tsa bone. Ka jalo, gantsi ga ba itse gore ba a sotliwa.” Ga twe, dikgatiso tse di ranotsweng tsa maikano ano di tla dira gore ditshwanelo tsa batho bano tsa botho di tlotliwe.

Go Rekisa Bokgarebane

Makasine wa Newsweek Polska o bega gore go ikemisetsa go tlhakanela dikobo e le ka lekgetlo la ntlha ga basha ba kwa Poland e le ka ntlha ya go batla go duelwa madi go tshosa baithutaloago. Moithutatlhaloganyo e bong Jacek Kurzępa wa Yunibesithi ya kwa Zielona Góra a re: “Gongwe le gongwe basha ba utlwa molaetsa o o ba bolelelang gore sengwe le sengwe se a rekisiwa.” Mme e bile ba le bantsi ba dirisa Internet go rekisa bokgarebane jwa bone go bona gore ke mang yo a tla duelang madi a mantsi. Le fa go ntse jalo, ditlamorago tsa gone di utlwisa botlhoko thata. Kurzępa a re: “Ditlamorago tsa gone di ama botshelo jotlhe jwa [motho] ka tsela e kgolo e bile di ama le kamano e motho a tla nnang le yone le molekane wa gagwe wa isagwe.”

Amazon e Kile ya Nna le Metse ya Setoropo

Go dumelwa gore dikgaolo tse dikgolo tsa Amazonia tse di kwa borwa tse di neng di na le dikgwa tse di iseng di ko di remiwe ke batho di ka tswa di ne di kile tsa bo di na le metse ya setoropo “e e dikologilweng ke mabota a magolo.” Ke tshwetso e e ileng ya dirwa ke batho ba ba ithutang ka mekgwa ya batho ba ba neng ba bereka kwa Mato Grosso, Brazil. Fa ba le koo, ba ne ba bona “metsana e mentsi le ditoropo tse di neng di na le mabota” tse di neng di khurumeditswe ke dikgwa tsa boboatsatsi mme e le kgaolo e gongwe e ka nnang disekwerekilometara di le 30 000. Dingwe tsa ditoropo tseo di ne di le bogolo jwa diheketara di le 60. Pego nngwe ya Yunibesithi ya kwa Florida, e batho ba ba ithutang ka mekgwa ya batho ba neng ba ribolola mafelo ao ya re, “ke a dingwaga tsa mo e ka nnang ka 1250 go ya go 1650, fa Bayuropa ba ba simolotseng bokolone le malwetse a ba ka tswang ba tlile le one a ne a bolaya bontsi jwa baagi ba teng.”

Dimela di Thusa Motho go Fola Morago ga Karo

Ga go bolo go akanngwa gore go nna le kamano le dilo tsa tlholego go fokotsa go ngomoga pelo, go dira gore motho a akanye sentle e bile go fokotsa botlhoko jwa bolwetse. Patlisiso ya bosheng e bontsha gore seo se boammaaruri. Lokwalodikgang lwa Science Daily lo tlhalosa jaana: “Fa balwetse ba ntse ba fola morago ga karo ba ne ba tsenngwa mo diphaposing tsa kokelo, tse dingwe tsa tsone di neng di na le dimela mme tse dingwe di se na tsone.” Balwetse ba ba neng ba na le dimela mo diphaposing tsa bone ba ne ba sa utlwe ditlhabi thata, mme ba ne ba sa tlhoke melemo e mentsi ya ditlhabi, selekanyo se dipelo tsa bone di neng di itaya ka sone se ne se le kwa tlase le kgatelelo ya madi a bone e ne e le botoka mme ba ne ba bolela fa ba kgotsofaletse diphaposi tsa bone go feta ba ba neng ba se na dimela mo diphaposing tsa bone. Diperesente tse di ka nang 93 tsa batho ba ba neng ba na le dimela ba ne ba re dimela tseno ke dingwe tsa “dilo tse ba di ratang thata” mo diphaposing tsa bone.