Ko e Kolosi ʻo Fou ʻi he Tahi Kulokulá

SIO ki he meʻa ʻoku hokó! Ko Mōsese ia ʻokú ne mafao atu hono tokotokó ki he Tahi Kulokulá. Ko kinautolu ʻoku nau hao mo ia ʻi he tafaʻaki ʻe tahá ko e kau ʻIsilelí ia. Ka ko Felo mo ʻene kau taú kotoa kuo nau melemo ʻi he tahí. Tau sio pē naʻe hoko fēfē ʻeni.

Hangē ko ia kuo tau ʻosi ako ki ai, naʻe fakahā ʻe Felo ki he kau ʻIsilelí ke nau mavahe mei ʻIsipite hili ʻa hono fakahoko ʻe he ʻOtuá ʻa e mala hono 10 ki he kau ʻIsipité. Naʻe fakafuofua ko e kau tangata ʻIsileli ʻe toko 600,000 naʻe mavahé, pea pehē ki he kakai fefine mo e fānau tokolahi. Naʻe toe mavahe fakataha mo e kau ʻIsilelí ha kakai kehe tokolahi naʻa nau hoko ʻo tui kia Sihova. Naʻa nau ʻalu kotoa mo ʻenau fanga sipi, mo e fanga kosi mo e fanga pulu.

Ki muʻa pea nau mavahé, naʻe kole ʻe he kau ʻIsilelí mei he kau ʻIsipité ha vala pea mo e ngaahi meʻa naʻe ngaohi mei he siliva mo e koula. Naʻe ilifia ʻaupito ʻa e kau ʻIsipité, koeʻuhi ko e mala fakaʻosi naʻe hoko kiate kinautolú. Ko ia naʻa nau ʻoange ki he kau ʻIsilelí ʻa e meʻa kotoa pē naʻa nau kolé.

ʻI he hili ha ngaahi ʻaho siʻi pea naʻe aʻu atu ʻa e kau ʻIsilelí ki he Tahi Kulokulá. Naʻa nau mālōlō ʻi ai. ʻI he taimi tatau pē, naʻe kamata ʻa Felo mo ʻene kau tangatá ke fakatomala ʻi heʻenau tuku ange ʻa e kau ʻIsilelí. Naʻa nau pehē: ‘Kuo tau tuku ange ʻetau kau pōpulá!’

Ko ia naʻe toe liliu ʻa e fakakaukau ʻa Feló. Naʻá ne teuteu fakavave leva ʻene saliote tau mo ʻene kau tau. Naʻá ne kamata leva ke tuli ki he kau ʻIsilelí ʻaki ʻa e ngaahi saliote makehe ʻe 600, pea pehē foki mo e ngaahi saliote kehe kotoa mei ʻIsipite.

ʻI he vakai mai ʻa e kau ʻIsilelí kia Felo mo ʻene kau taú ʻoku nau tulimui atú, naʻa nau fuʻu ilifia ʻaupito. Naʻe ʻikai ha toe hala ke fai ai ha hola. Ko e Tahi Kulokulá pē naʻe ʻi he tafaʻaki ʻe tahá, pea ko e kau ʻIsipité naʻa nau haʻu mei he tafaʻaki ʻe tahá. Ka naʻe ʻai ʻe Sihova ha konga ʻao ʻi he vahaʻa ʻo ʻene kakaí mo e kau ʻIsipité. Ko ia naʻe ʻikai ke lava ʻa e kau ʻIsipité ʻo sio ki he kau ʻIsilelí kae ʻohofi kinautolu.

Naʻe fekau leva ʻe Sihova ʻa Mōsese ke mafao atu hono tokotokó ki he Tahi Kulokulá. ʻI heʻene fai ʻení, naʻe ʻai ʻe Sihova ke angi mai ha matangi mālohi mei he hahaké. Naʻe mavaeua ʻa e tahí pea naʻe tuʻu ʻa e vaí mei he ongo tafaʻakí.

Pea naʻe toki fononga atu leva ʻa e kau ʻIsilelí ʻi he kilisitahí kuo mōmoa. Naʻe fiemaʻu ha ngaahi houa lahi ia ke fononga ai ʻa e kakai ʻe toko laui miliona ko ení mo ʻenau fanga manú ke fou ʻi he tahí ʻo hao moʻui ai ki he tafaʻaki ʻe tahá. Pea naʻe toki lava leva ʻa e kau ʻIsipité ʻo toe sio atu ki he kau ʻIsilelí. Kuo hola ʻa ʻenau kau pōpulá! Ko ia naʻa nau fakavavevave atu leva ki he tahí ʻo tuli kiate kinautolu.

ʻI heʻenau fai peheé, naʻe ʻai ʻe he ʻOtuá ʻa e ngaahi vaʻe ʻo ʻenau ngaahi salioté ke homo. Naʻe ilifia ʻaupito ʻa e kau ʻIsipité pea kamata ke nau kaila: ‘ʻOku fai tau ʻa Sihova maʻa ʻIsileli. Tau hola mei heni!’ Ka kuo tōmui.

Ko e taimi ʻeni naʻe fakahā ai ʻe Sihova kia Mōsese ke toe mafao atu hono tokotokó ki he Tahi Kulokulá, ʻo hangē ko ia naʻá ke sio ki ai ʻi he fakatātaá. Pea ʻi hono fai ʻeni ʻe Mōsesé, naʻe kamata leva ke ʻalu hifo ʻa e tahí ʻo kāpui ʻa e kau ʻIsipité mo ʻenau ngaahi salioté. Ko e kotoa ʻo e kau taú naʻa nau muimui ki he kau ʻIsilelí ʻi he loto tahí. Pea naʻe ʻikai ha taha ʻo e kau ʻIsipité naʻe hao moʻui!

Ko e fiefia lahi ē ka ko e kakai kotoa ʻa e ʻOtuá ʻi heʻenau haó! Naʻe hiva ʻaki ʻe he kau tangata ha hiva fakamālō kia Sihova, ʻo nau pehē: ‘Kuo mālohi ʻa Sihova ʻi he ikuna lāngilangiʻia. Kuó ne laiki ʻa e fanga hoosi mo e faʻahinga ʻoku heka aí ki he loto tahi.’ Naʻe toʻo ʻe Meliame ko e tuofefine ʻo Mōsesé ha nafa fāngongo, pea fai pehē mo e kau fefine ʻo muimui kiate ia. Pea ʻi heʻenau tauʻolunga mo e fiefia, naʻa nau hiva ʻi he hiva tatau pē mo e hiva naʻe hivaʻaki ʻe he kau tangatá: ‘Kuo mālohi ʻa Sihova ʻi he ikuna lāngilangiʻia. Kuó ne laiki ʻa e fanga hoosi mo e faʻahinga ʻoku heka aí ki he loto tahí.’