Fakahaofi mei ʻIsipité ʻo Aʻu ki he ʻUluaki Tuʻi ʻo ʻIsilelí

Naʻe taki ʻe Mōsese ʻa e kau ʻIsilelí mei he nofo pōpula ʻi ʻIsipité ki he Moʻunga Sainaí, ʻa ia naʻe foaki ange ai ʻe he ʻOtuá kiate kinautolu ʻa ʻene ngaahi lao. Naʻe ʻosi ha taimi pea naʻe fekau atu ʻe Mōsese ha kau tangata ʻe toko 12 ko e kau sipai ki he fonua ko Kēnaní. Ka ko e toko 10 ʻo kinautolu naʻa nau foki mai mo ha fakamatala ʻikai ke lelei. Naʻa nau fakatupu ʻi he kakaí ʻa e loto ke nau toe foki ki ʻIsipite. Koeʻuhi ko e siʻi ʻenau tuí, naʻe tautea ai ʻe he ʻOtuá ʻa e kau ʻIsilelí ke nau fononga holo pē ʻi he toafá ʻi he taʻu ʻe 40.

Ko hono fakaʻosí, naʻe fili ʻa Siōsiua ke hoko ko e taki ʻo e kau ʻIsilelí ki he fonua ko Kēnaní. Naʻe ʻai ʻe Sihova ha ngaahi mana ke hoko ke tokoniʻi kinautolu ke maʻu ʻa e fonuá. Naʻá ne ʻai ʻa e Vaitafe Sioataní ke tuʻu ʻene tafé, holoki ʻa e ngaahi ʻā ʻo Sielikō, pea ke tuʻu maʻu ʻa e laʻaá he ʻaho kakato ʻe taha. ʻI he hili ʻa e taʻu ʻe ono, naʻe faʻao ʻa e fonuá mei he kau Kēnaní.

Naʻe kamata ʻia Siōsiua ʻa hono puleʻi ʻo ʻIsileli he taʻu ʻe 356 ʻe ha kau fakamaau. Te tau ako ʻo fekauʻaki mo e tokolahi ʻo kinautolu kau ai ʻa Pēlaki, Kitione, Sēfita, Samisoni mo Sāmiuela. Te tau toe lau foki ʻo fekauʻaki mo e kau fefine hangē ko Lēhapi, Tēpola, Siāili, Lute, Nāomi mo Tilila. Ko e kotoa ʻo e Konga TOLÚ ʻoku lau ki he vahaʻa taimi ko e taʻu ʻe 396 ʻo e hisitōliá.