Līpooti ʻi he Fakataha Fakataʻú

Ko e Kau Fakamoʻoni ʻa Sihová Ngaʻunu ki Muʻa Fakataha mo e Tuipau Mālohi!

ʻI HE ngaahi ʻaho ko eni ʻo e fakamahaló mo e veiveiuá, ʻoku ʻiloa ai ʻa e Kau Fakamoʻoni ʻa Sihová ʻi he tuʻunga ko e kau Kalisitiane ʻoku nau maʻu ʻa e tuipau mālohi. Naʻe fakahaaʻi mahino eni ʻi he fakataha fakataʻu ʻa e Watch Tower Bible and Tract Society of Pennsylvania, naʻe fai ʻi he Jersey City, New Jersey, Assembly Hall ʻo e Kau Fakamoʻoni ʻa Sihová ʻi he Tokonaki, ʻo ʻOkatopa 7, 2000.a

ʻI heʻene lea fakaavá, ko e tokotaha seá, ʻa John E. Barr, ko ha mēmipa ʻo e Kulupu Pule ʻa e Kau Fakamoʻoni ʻa Sihová, naʻá ne pehē: “ʻI he kotoa ʻo e laui piliona ʻi he māmaní, ʻoku tau ʻiloʻi mo tui ko e ʻAlo ʻofaʻanga ʻo Sihová, ʻa Kalaisi Sīsū, ʻoku lolotonga tuʻi ia ʻi he ngaahi langí, ʻo pule ʻi he lotolotonga ʻo hono ngaahi filí.” Ko e fakamoʻoni ʻo e tuipau mālohi peheé naʻe fakahoko mai ia ʻe he ngaahi līpooti fakafiefia ʻe ono mei he māmaní takatakai.

Ikunaʻi ʻa e Fakahaʻele Faʻahikehé ʻAki ʻa e Moʻoni ʻo e Tohitapú ʻi Haiti

ʻOku mātuʻaki failahia ʻa e fakahaʻele faʻahikehé ʻi Haiti. “Ko e tuʻunga anga-mahení,” ko e fakamatala ia ʻa e kouʻotineita ʻi he Kōmiti Vaʻá ko John Norman, “ʻoku fai ʻe he kakaí ʻa e vūtuú ke maluʻiʻaki kinautolu.” Naʻe fakatupulekina ʻe ha toketā faimana ʻe taha ʻa e veiveiuá ʻi he motu hono vaʻé ʻi ha fakatuʻutāmaki. ‘ʻE lava fēfē ke hoko eni kiate au kapau ʻoku maluʻi au ʻe he ngaahi laumālié?’ ko ʻene fifilí ia. ʻI he hangē ko e tokolahi kehé, naʻe akoʻi ʻa e moʻoní ki he tangatá ni ʻe he Kau Fakamoʻoni ʻa Sihová pea naʻe tokoniʻi ia ke ne ʻatā mei he fakahaʻele faʻahikehé. Ko e malava ke ʻi ai ʻa e tupu ʻi Haití ʻoku fakahaaʻi ia ʻe he moʻoniʻi meʻa ko ia ʻi ʻEpeleli 19, 2000, ko e liunga fā ʻa e tokolahi ʻo e kau malanga ʻo e Puleʻangá ʻi he fonua ko iá naʻa nau maʻu ʻa e Fakamanatu ʻo e pekia ʻa Kalaisí.

Faivelenga ʻi he Fuʻu Feituʻu Lahi ʻo Kōleá

ʻI Kōlea, ko e peseti ʻe 40 ʻo e Kau Fakamoʻoni ʻa Sihová ʻoku nau ʻi he ngāue taimi-kakató. “ʻI he fuʻu kau tau tokolahi fakaʻulia ko ení,” ko e fakamatala ia ʻa e kouʻotineita ʻi he Kōmiti Vaʻá ko Milton Hamilton, “ko homau feituʻu ʻo e kakai laka hake ʻi he toko 47 milioná ʻoku ʻosiki ia tuʻo taha nai ʻi he māhina.” Ko e tupu ʻi he ngaahi fakatahaʻanga lea-fakaʻilongá ʻoku tautefito ʻa ʻene ʻiloá. ʻI he sēketi lea-fakaʻilonga ʻe taha, ʻoku fai ai ʻa e ngaahi ako Tohitapu ʻi ʻapi ʻe 800. Ko e ʻavalisi eni ʻo e ako ʻe taha ki he tokotaha malanga ʻe taha. Ko e meʻa pangó, he ʻoku tuku pōpula ʻa e fanga tokoua kei talavoú koeʻuhi ko ʻenau tuʻu-ʻataá. Neongo ia, ko e kau Kalisitiane loto-tōnunga ko ení ʻoku ngaohileleiʻi kinautolu, pea ʻoku faʻa ʻoange kiate kinautolu ʻa e ngaahi ngāue ʻoku fiemaʻu ki ai ʻa e tuʻunga falalaʻangá.

Aʻusia ʻa e Ngaahi Fiemaʻu ʻi he Tupu ʻi Mekisikoú

Ko ha tumutumu ʻo e kau fanongonongo ʻo e Puleʻangá ʻe toko 533,665 naʻe līpooti ʻi he ngāue fakamalangá ʻi ʻAokosi 2000. Laka hake ʻi he liunga tolu ʻo e tokolahi ko iá ʻa e faʻahinga tāutaha naʻa nau maʻu ʻa e Fakamanatú. “Ko ʻemau taumuʻa ki he taʻu ní ke langa ʻa e ngaahi Fale Fakatahaʻanga laka hake ʻi he 240,” ko e fakamatala ia ʻa e kouʻotineita ʻi he Kōmiti Vaʻá ko Robert Tracy. “Neongo ia,” naʻá ne toe tānaki mai ki ai, “ʻoku mau fiemaʻu ʻa e toe ngaahi Fale Fakatahaʻanga lahi ange.”

Ko e kau talavou ʻi he lotolotonga ʻo e Kau Fakamoʻoni ʻa Sihova ʻi Mekisikoú ʻoku nau faʻifaʻitakiʻanga lelei. ʻI he fekauʻaki mo ha talavou ʻe taha, naʻe pehē ʻe ha pātele Katolika: “Te u saiʻia ke maʻu ha taha hangē tofu pē ko iá ʻi he lotolotonga ʻo hoku kau muimuí. ʻOku ou mālieʻia ʻi he kakai ko ení ʻi heʻenau loto mālohi mo ngāue fakapotopotoʻaki ʻa e Tohitapú. Kuo nau taukapoʻi ʻa e ʻOtuá, naʻa mo e ʻi he fakatuʻutāmaki ki heʻenau moʻuí.”

Anga-Tonu ʻi he Lotolotonga ʻo e Taʻemanonga ʻi Siela Leoné

Talu mei ʻEpeleli 1991, ʻi he mapuna hake ʻa e tau fakalotofonua ʻi Siela Leoné, kuo mate, lavea, pe mamatea ai ʻa e kakai ʻe laui afe. “Kuo uesia loloto ʻe he taú mo e faingataʻá ʻa e kakaí,” ko e līpooti ia ʻa e kouʻotineita ʻi he Kōmiti Vaʻá ko Bill Cowan. “Ko e tokolahi ʻa ia naʻa nau taʻetokanga ki heʻetau pōpoakí ʻoku nau fanongo ʻi he taimí ni fakataha mo e mahuʻingaʻia. ʻOku ʻikai taʻeangamaheniʻaki ʻa e haʻu ʻa e kakaí ki muʻa ke fakaafeʻi kinautolu ki hotau ngaahi Fale Fakatahaʻangá ke maʻu ʻenau ʻuluaki fakatahá. ʻOku faʻa taʻofi ʻa e fanga tokouá ʻi he halá ʻo kole ki ha ako Tohitapu.” Neongo ʻa e hokohoko atu ʻa e ʻikai ke tuʻumaʻu ʻa e fonuá, ʻoku fakatupu fua ʻa e ngāue malangaʻi ʻo e Puleʻangá ʻi Siela Leoné.

Polokalama Langa Kāfakafa ʻi ʻAfilika Tonga

ʻI he lolotonga ní, ʻoku ʻi ai ha fiemaʻu ki ha ngaahi Fale Fakatahaʻanga ʻe laui afe ʻi he feituʻu ʻoku tokangaʻi ʻe he ʻōfisi vaʻa ʻi ʻAfilika Tongá. Kuo ʻosi langa ʻa e ngaahi holo ʻe lauingeau. “ʻI he ʻikai fakataha ʻi ha fakahekeheke pe ʻi ha lalo ʻakaú, ʻo hangē ko ia naʻe fai ki muʻá, ʻoku malava hotau fanga tokouá ke fakataha ʻi ha feituʻu lelei fakataha mo e tangutuʻanga feʻunga,” ko e fakamatala ia ʻa e mēmipa ʻo e Kōmiti Vaʻá ko John Kikot. “Neongo ko e lahi taha ʻo e ngaahi Fale Fakatahaʻanga ko ení ko e faʻu feʻunga pē, ʻoku nau faʻa tuʻu ʻo ʻiloa ko e ngaahi langa fakangeingeia taha ia ʻi honau feituʻú. ʻI he ngaahi feituʻu ʻe niʻihi, kuo ʻiloʻi ai ko e hili pē hono langa ha Fale Fakatahaʻanga, ʻe tokolahi ange ʻi he liunga uá ʻa e fakatahaʻangá ʻi he lolotonga ʻa e taʻu hoko maí.”

Ko ha Toʻutangata Foʻou ʻo e Kau Fakamoʻoní ʻi ʻIukalaine

Lolotonga ʻa e taʻu fakangāue 2000, naʻe mamata ai ʻa e fonuá ni ki ha tumutumu ʻo e kau malanga ʻe toko 112,720. Laka hake he toko 50,000 ʻo e faʻahingá ni kuo nau ako ʻa e moʻoni faka-Tohitapú lolotonga ʻa e taʻu ʻe nima kuo maliu atú. “Ko e moʻoni, kuo langaʻi hake ʻe Sihova ha toʻutangata foʻou ʻo e kau talavoú ʻi he Kau Fakamoʻoní ke nau talaki ʻa hono huafá!” ko e lau ia ʻa John Didur, ko e kouʻotineita ʻi he Kōmiti Vaʻá. “Laka hake he taʻu ʻe ua kuo maliu atú,” naʻá ne tānaki mai, “kuo mau tufaki ai ʻa e ngaahi makasini laka hake ʻi he 50 milioná, ʻa ia ʻoku tatau ia mo e tokolahi ʻo e fonuá. ʻI he māhina taki taha, ʻi hono fakaʻavalisí, ʻoku mau maʻu ai ha tohi ʻe taha afe mei he kakai mahuʻingaʻiá ko ʻenau kole ki ha fakamatala lahi ange.”

Ngaahi Tafaʻaki Fakaueʻiloto Kehe ʻo e Polokalamá

Ko Daniel Sydlik, ko ha mēmipa ʻo e Kulupu Pulé, naʻá ne fai ha malanga fakatupu tokanga. Ko e kupu “Founga ʻOku Kehe Ai ʻa e Kulupu Pulé mei ha Kautaha Fakalaó,” ʻoku hā ʻi he makasini ko ení, ʻoku makatuʻunga ia ʻi he malanga fakatupu ʻilo ko iá.

Naʻe fai ʻe Theodore Jaracz ʻo e Kulupu Pulé ha malanga fakatupu fakakaukau naʻe fakakaveinga ko e “Kau ʻOvasia mo e Kau Sevāniti Fakafaifekau Kuo Fakanofo Fakateokalati.” Ko e taha ʻo e ngaahi kupu ʻoku hā ʻi he makasini ko ení ʻoku makatuʻunga ia ʻi he kaveinga ko iá.

Naʻe toe kau ʻi he fakataha fakataʻú ha malanga fakaueʻiloto naʻe fai ʻe ha mēmipa ʻo e Kulupu Pulé ko David Splane ʻi he konga tohi fakataʻu ki he taʻu 2001. Makatuʻunga ʻi he ngaahi lea ʻa e ʻapositolo ko Paulá, ʻa ia ko e: “Tuʻu kakato fakataha mo e tuipau mālohi ki he finangalo kotoa ʻo e ʻOtuá.” (Kolose 4:​12, NW) Ko e Kau Fakamoʻoni ʻa Sihova takatakai ʻi he māmaní ʻoku nau fakapapauʻi ke fai ia ʻi heʻenau malangaʻi loto-tōnunga ʻa e ongoongo lelei ʻo e Puleʻanga ʻo e ʻOtuá ʻi he māmaní kotoa.​—Mātiu 24:14.

[Fakamatala ʻi lalo]