ʻOkú Ke Falala ki ha ʻOtua ʻA Ia ko ha Tokotaha Moʻoni?
Ko ha fononga naʻe fekauʻi ʻe he Misiume ʻAmelika ki he Hisitōlia Fakanatulá naʻe fakahoko ia ke fakatotoloʻi ha fonua ʻĀketika ʻa ia naʻe līpooti ʻe ha tokotaha fakatotolo ko Robert E. Peary naʻá ne sio ki ai ʻi he taʻu nai ʻe fitu ki muʻá, ʻi he 1906.
MEI HE Muitolotolo Colgate ʻi he tafaʻaki tokelau-hihifo mamaʻo ʻo ʻAmelika Tokelaú, naʻe sio ai ʻa Peary ki he meʻa naʻe hā hangē ha ngaahi tumuʻaki hinehina ʻo ha fonua mamaʻó. Naʻá ne fakahingoa ia ko Crocker Land ki he taha ʻo hono kau poupou fakapaʻangá. He fiefia ē kuo pau naʻe hoko ki he kau mēmipa ʻo e fononga naʻe hoko atu aí ʻi heʻenau maʻu ha maʻalifekina ʻo ha feituʻu ʻoku hanga mai fakataha mo e ngaahi moʻunga, ngaahi teleʻa, mo e ngaahi tumutumu ʻoku ʻufiʻufi ʻe he sinoú! Ka naʻe vave ʻenau ʻiloʻi ko ha vai hola pē he ʻĀketiká ne nau sio ki aí. Ko e tākiekina fakaevīsone fakaeʻatimosifia ko ení naʻá ne kākaaʻi ʻa Peary, pea ko ia naʻa nau fakamoleki ai ʻa e taimi, ivi, mo e koloa ke fakatotoloʻi ha meʻa ʻa ia naʻe ʻikai ke moʻoni.
ʻI he ʻahó ni, ʻoku tuku ʻe he kakai tokolahi ʻenau līʻoá pea mo honau taimí ki he ngaahi ʻotua ʻoku nau tui ʻoku moʻoni. ʻI he ngaahi ʻaho ʻo e kau ʻapositolo ʻa Sīsuú, ko e ngaahi ʻotua hangē ko Siupita mo Meakulí naʻe fai ki ai ʻa e lotú. (Ngāue 14:11, 12) ʻI he ʻahó ni, ko e ngaahi ʻotua ʻoku lotu ki ai ʻa e faʻahinga ʻi he Sinitoó, Hinituú, mo e ngaahi lotu kehe ʻo e māmaní ʻoku laui miliona honau tokolahí. Ko e moʻoni, hangē ko e lau ʻa e Tohitapú, “ʻoku ʻi ai ha ngaahi ʻotua tokolahi, mo ha ngaahi ʻeiki tokolahi.” (1 Kolinito 8:5, 6) ʻE lava ke hoko kotoa eni ko e ngaahi ʻotua moʻoni?
Ngaahi ʻOtua ʻOku ‘ʻIkai ke Lava ke Faifakamoʻui’
Ko e fakatātaá, fakakaukau angé ki hono ngāueʻaki ʻo e ngaahi ʻīmisí mo e ngaahi fakaʻilongá ʻi he lotú. Ki he faʻahinga ʻoku falala kiate kinautolú pe lotu fakafou ʻiate kinautolú, ʻoku hā ʻa e ngaahi ʻaitolí ko e kau faifakamoʻui ʻoku nau maʻu ʻa e ngaahi mālohi mahulu hake ʻi he tangatá ʻa ia ʻe lava ke nau fakapaleʻi ʻa e kakaí pe fakahaofi kinautolu mei he fakatuʻutāmakí. Ka ʻe lava moʻoni ke nau faifakamoʻui? ʻI he fekauʻaki mo e ngaahi meʻa peheé, naʻe hiva ʻa e tokotaha-tohi-sāmé: “Ko e ngaahi aitoli ʻo e ngaahi puleʻanga ko e siliva pe mo e koula, ko e ngaue ʻa e nima ʻo e tangata. ʻOku ai honau ngutu, ka ʻoku ʻikai te nau lea; ʻoku ai honau mata, ka ʻoku ʻikai te nau sioa; ʻoku ai honau telinga, ka ʻoku ʻikai te nau ongona: ʻa, ʻoku ʻikai ha momoʻi manava ʻi honau ngutu na.” Ko e moʻoni, ko e ngaahi ʻotua kinautolu ʻoku “ʻikai lava ke [fai]fakamoʻui.”—Sāme 135:15-17; Aisea 45:20.
Ko e moʻoni, ko e faʻahinga ʻoku nau faʻu ʻa e ngaahi ʻaitolí ʻoku nau taku nai ʻa e moʻuí mo e mālohí ko e ngāue ʻa honau nimá. Pea ko e faʻahinga ʻoku nau lotu ki he ngaahi ʻaitolí ʻoku tuku ʻenau falalá kiate kinautolu. “ʻOku nau fua [ha ʻaitoli] ʻi honau uma,” ko e lau ia ʻa e palōfita ko ʻAiseá, “ʻo nau tuku hifo ʻi hono tuʻunga; talu ai ʻene tuʻu ai.” ʻOkú ne tānaki mai: “ʻOku ʻikai te ne ngaūe mei hono potu: ʻio, ʻoku fai ha tangi ki ai, ka ʻoku ʻikai te ne tali, ʻoku ʻikai te ne fakahaofi ha taha mei hono faingataʻa.” (Aisea 46:7) Ko hono moʻoní, ʻoku ʻikai pē moʻui ʻa e ʻaitolí ia ʻo tatau ai pē pe ko e hā hono lahi ʻo e faivelenga ʻa e tui ʻa e faʻahinga ʻoku falala ki aí. Ko e ngaahi ʻīmisi tā tongitongi mo e ngaahi fakatātā pehē kuo haká ko e “ngaahi ʻotua taʻeʻaonga.”—Hapakuke 2:18, NW.
Ko e ʻotuaʻaki, fakalāngilangiʻi, pe ʻaitoliʻaki ʻa e faʻahinga ʻiloa ʻo e fakafiefiá, faʻahinga tuʻu-ki-muʻa ʻi he ngaahi sipotí, ngaahi fokotuʻutuʻu fakapolitikalé, pea mo e kau taki lotu ʻe niʻihi, ʻoku toe failahia ia he ʻahó ni. ʻIkai ngata aí, ko e paʻangá ko ha ʻotua ia ki he tokolahi. ʻI he tuʻunga taki taha, ʻoku faʻu ʻa e ngaahi ʻaitolí ni ke nau hoko ko e meʻa ʻoku ʻikai te nau maʻu. ʻOku ʻikai pea ʻe ʻikai lava ke nau ʻomai ʻa e meʻa kotoa ʻoku ʻamanaki ki ai ʻa e faʻahinga ʻoku tui kiate kinautolú. Ko e fakatātaá, ʻe hā ngali hoko ʻa e koloá ko e fakaleleiʻanga ia ʻo e ngaahi palopalema lahi, ka ko e meʻa kākā ʻa e mālohi ʻo e koloá. (Maake 4:19) Naʻe ʻeke ʻe ha tokotaha fakatotolo ʻe taha: “ʻE anga-fēfē haʻatau fakamatala ki he moʻoniʻi meʻa ko ia, ko e meʻa ko ē ʻoku holi vēkeveke ki ai ʻa e fuʻu kakai tokolahi, pea tui ki ai ko ha faʻahinga fakaleleiʻanga ia ki he faingataʻá kotoa, ʻi he taimi ʻoku maʻu mai aí ʻokú ne maʻu ha tuʻunga kehekehe ʻo e ngaahi olá ʻo ʻalu mei he siva ʻa e ʻamanakí ki he loto-mamahí?” ʻIo, ko e tuli ki he koloá ʻe fiemaʻu nai ai ke feilaulauʻi ʻe ha taha ʻa e meʻa ʻoku mahuʻinga moʻoní, hangē ko e moʻui leleí, ko ha moʻui fakafāmili fakafiemālie, ngaahi kaumeʻa ofi, pe ko ha vahaʻangatae mahuʻinga mo e Tokotaha-Fakatupú. Ko hono ʻotuá, ʻoku ʻosi angé ko ha ‘ʻaitoli taʻemoʻoni’!—Siona 2:8, NW.
“Naʻe ʻIkai ha Taha ʻe Tali”
ʻOku fakasesele ke ui ʻoku moʻoni ha meʻa ʻoku ʻikai ke moʻoni. Ko e kau lotu ʻa e ʻotua ko Pēalí ʻi he ʻaho ʻo e palōfita ko ʻIlaisiaá naʻa nau ako eni ʻi ha tuʻunga faingataʻa. Naʻa nau tui mālohi naʻe maʻu ʻe Pēali ʻa e mālohi ke ne fakatupunga ha afi ke haʻu mei hēvani ʻo keina ha feilaulau monumanu. Ko hono moʻoní, naʻa “nau tautapa ki he huafa ʻo Peali mei he pongipongi ʻo aʻu ki he hoʻatā, ʻo pehe, ʻE Peali, tali mai.” Naʻe maʻu ʻe Pēali ha ongo telinga naʻe lava ke fanongo mo ha ngutu naʻe lava ke lea? ʻOku hoko atu ʻa e fakamatalá: “Naʻe ʻikai ha leʻo, pea naʻe ʻikai ha taha ʻe tali mai.” Ko e moʻoni, “naʻe ʻikai ha taha ʻe tokanga mai.” (1 Tuʻi 18:26, 29) Naʻe ʻikai ko ha tokotaha moʻoni, ʻo moʻui pe longomoʻui ʻa Pēali.
He mātuʻaki fiemaʻu ē ke tau hoko ʻo ʻiloʻi mo lotu ki ha ʻOtua ʻa ia ko e tokotaha moʻoni! Ka ko hai ia? Pea ʻe lava fēfē ke ʻaonga kiate kitautolu ʻa e falala kiate iá?
[Fakatātā ʻi he peesi 3]
Fakasio tokanga ʻe he takanga ʻo Peary ko Egingwah ʻa e tafatafaʻaki langí ki ha fonua
Robert E. Peary
[Maʻuʻanga]
Egingwah: Mei he tohi The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA
[Fakatātā ʻi he peesi 4]
ʻOku kākaaʻi ʻa e tokolahi ʻe he meʻa ʻoku ʻotuaʻaki ʻi he māmani ko ení