ʻE Hao ʻa e Tokolahi ʻi he Ngataʻangá​—Mo Koe Foki

ʻOku fakahaaʻi mai ʻe he Tohi Tapú ko e ngataʻangá ʻe kau ai ha fakaʻauha: “ʻE hoko ai ha fuʻu mamahi lahi ʻa ia kuo teʻeki hoko talu mei he kamataʻanga ʻo māmaní ʻo aʻu mai ki he taimí ni . . . Ko hono moʻoní, ka ne ʻikai fakanounou ʻa e ngaahi ʻaho ko iá, ʻe ʻikai ha kakano ʻe fakahaofi.” (Mātiu 24:21, 22) Ka ʻoku talaʻofa mai ʻe he ʻOtuá ʻe fakahaofi ʻa e tokolahi ʻo e faʻahinga ʻo e tangatá: “ʻOku fakaʻaʻau ke mole atu ʻa e māmaní . . . , ka ko ia ʻokú ne fai ʻa e finangalo ʻo e ʻOtuá ʻokú ne nofo maʻu ʻo taʻengata.”—1 Sione 2:17.

Kapau ʻokú ke loto ke hao ʻi he mole atu ʻa e māmani ko ení pea “nofo maʻu ʻo taʻengata,” ko e hā ʻoku totonu ke ke faí? ʻOku totonu ke ke kamata ke tānaki ha ngaahi koloa pe tokonaki ha meʻa fakamatelie kehe? ʻIkai. ʻOku ekinaki mālohi mai ʻe he Tohi Tapú ke tau fakamuʻomuʻa ʻa e meʻa ʻoku mahuʻingá. ʻOku tau lau ai: “Koeʻuhí ko e pau ko ia ke vaia peheni ʻa e ngaahi meʻá ni kotoa peé, fakakaukau atu ki he faʻahinga kakai ʻoku totonu ke mou hoko ki aí ʻo taka ʻi he ngaahi tōʻonga māʻoniʻoni mo e ngaahi ngāue ʻo e anga-līʻoa fakaʻotuá, ʻi hoʻomou nofoʻaki tali mo hanganaki tauhi maʻu ʻi he ʻatamaí ʻa e hoko mai ʻa e ʻaho ʻo Sihová.” (2 Pita 3:10-12) ʻOku pehē ʻi he potutohí ko e “ngaahi meʻá ni kotoa peé” ʻa ia ʻe vaiá ʻoku kau ai ʻa e ngaahi founga-pule ʻo e māmani fakameleʻi ko ení mo e faʻahinga kotoa ʻoku nau fili ʻa e founga-pule ko ení kae ʻikai ko e ʻOtuá. ʻOku hā mahino, kapau te tau tānaki ha ngaahi koloa fakamātelie, heʻikai lava ke ne fakahaofi kitautolu mei he fakaʻauha ko iá.

Ko e moʻoni, ko ʻetau haó ʻoku kau ai ʻetau līʻoa kia Sihova ko e ʻOtuá pea ako fekauʻaki mo e ʻulungaanga mo e ngaahi ngāue ʻoku fakahōifua kiate iá. (Sēfanaia 2:3) ʻI he ʻikai muimui ki he tokolahi taha ʻo e kakai ʻi he ʻaho ní pea tukunoaʻi ʻa e ngaahi fakaʻilonga hā mahino ʻoku tau moʻui ʻi ha taimi mahuʻingá, ʻoku fiemaʻu ke tau “hanganaki tauhi maʻu ʻi he ʻatamaí ʻa e hoko mai ʻa e ʻaho ʻo Sihová.” Ko e Kau Fakamoʻoni ʻa Sihová ʻe lava ke nau fakahaaʻi atu mei he Tohi Tapú ʻa e founga ʻe lava ke ke hao atu ai ʻi he ʻaho ko eni ʻoku teu ke hoko maí.