Naʻá Ke ʻIloʻi?

Naʻe anga-fēfē hono fakamoʻui ha afi ʻe he kakai ʻo e kuonga muʻá lolotonga ʻenau fefonongaʻakí?

ʻI HE Sēnesi vahe 22, ʻoku pehē ʻe he Tohi Tapú naʻe tala ʻe he ʻOtuá kia ʻĒpalahame ke ne fononga ki ha feituʻu mamaʻo mei hono ʻapí ke fai ha feilaulau. ʻOku pehē ai: “Pea toʻo ʻe Epalahame ʻa e fefie ki he feilaulau, ʻo ne hilifaki ki hono foha ko Aisake; pea ne toʻo ʻe ia ʻa e afi mo e hele, pea na laka atu fakataha.”—Sēn. 22:6.

ʻOku ʻikai ke fakamatalaʻi ʻi he Tohi Tapú ia ʻa e anga hono fakamoʻui ha afi ʻe he kakai ʻi he kuonga muʻá. Ko ia naʻe tutu ʻe ʻĒpalahame mo ʻAisake ha afi peá na ʻalu leva mo e afi ko iá? Naʻe pehē ʻe ha tokotaha fakamatala Tohi Tapu heʻikai malava nai ha afi ke “kei uloulo ʻi ha fononga lōloa.” ʻI hono kehé, kuo pau pē naʻe ʻalu ʻa ʻĒpalahame mo hono fohá mo e meʻa kotoa naʻá na fiemaʻu ke fakamoʻui ʻaki ha afi.

Ka ʻoku pehē ʻe he niʻihi naʻe ʻikai faingofua ke fakamoʻui ha afi ʻi he ngaahi taimi ko iá. Ko ia ʻi he taimi ʻe niʻihi, naʻe tutu ʻe he kakaí ha afi ʻaki ʻenau ʻomai ha malala moʻui, mahalo ko ha malala mei he afi ʻo e kaungāʻapí. ʻOku tui ʻa e kau mataotao tokolahi naʻe ʻave ʻe ʻĒpalahame ha malalaʻi afi moʻui ʻo ne fononga mo ia. ʻOku pau pē naʻá ne faʻo ia ʻi ha ʻaiʻanga meʻa, mahalo ko ha kulo naʻe tautau ʻaki ha sēini, pea naʻá ne ʻave ʻa e kuló ʻi heʻene fonongá. (ʻAi. 30:14) Naʻe pau pē naʻá ne ngāueʻaki leva ʻa e malalaʻi afi moʻui ko iá mo e fanga kiʻi ʻakau mōmoá ʻi he taimi pē naʻá ne fiemaʻu ai ke tafu ha afi.