Ko e Fiefia ʻi Hono Maʻu ha Moʻui Faingofuá
NAʻE mali ʻa Daniel mo Miriam ʻi Sepitema 2000 peá na maʻu ha moʻui fiemālie ʻi Barcelona, Sipeini. ʻOku fakamatala ʻa Daniel: “Naʻe fakaʻatā kimaua ʻe heʻema ngāué ke ma kai ʻi he ngaahi falekai totongi mamafá, folau ki muli, pea tui ʻa e ngaahi vala lelei ʻaupito. Naʻá ma toe kau maʻu pē ki he ngāue fakamalangá.” Ka naʻe ʻi ai ha meʻa naʻe hoko.
ʻI ha fakataha-lahi ʻi he 2006, naʻe fanongo ai ʻa Daniel ʻi ha malanga naʻe ʻeke ai ha fehuʻi: “ʻOku tau fai ʻa e meʻa kotoa te tau malavá ke tokoniʻi ʻa e faʻahinga ʻoku nau ‘ʻalu tetetete atu ke tāmateʻí’ ke nau fononga ʻi he hala ki he moʻui taʻengatá?” (Pal. 24:11) Naʻe fakamatalaʻi ʻi he malangá ʻo pehē ʻoku tau maʻu ʻa e fatongia ke malangaʻi ʻa e pōpoaki Fakatohitapú koeʻuhí ʻoku fakatuʻunga ai ʻa e moʻui ʻa e kakaí. (Ngā. 20:26, 27) ʻOku manatuʻi ʻe Daniel, “Naʻá ku ongoʻi naʻe talanoa mai ʻa Sihova kiate au.” Naʻe toe lave ʻa e malangá ʻoku tau fiefia ange ʻi he taimi ʻoku tau fai ai ʻa e meʻa lahi ange ʻi he ngāue ʻa Sihová. Naʻe ʻiloʻi ʻe Daniel ko e moʻoni eni koeʻuhí naʻe malava ke ne sio kia Miriam, ʻa ia naʻá ne ʻosi kamata tāimuʻá, naʻá ne fiefia ʻaupito.
Naʻe mātuʻaki maongo kia Daniel ʻa e malanga ko ení ʻo ne fakakaukau ai kuo taimi ke fai ha liliu lahi ʻi heʻene moʻuí. Naʻá ne kamata ngāue ʻi he ngaahi houa siʻisiʻi ange, kamata tāimuʻa pea fakakaukau ki he fiefia ʻe lava ke ne maʻu mo Miriam kapau te na ngāue ʻi he feituʻu ʻoku lahi ange ai ʻa e fiemaʻu ʻo e kau malanga ʻo e Puleʻangá.
ʻULUAKÍ NGAAHI FAINGATAʻA—HOKO MAI LEVA HA ONGOONGO FAKAFIEFIA
ʻI Mē 2007, naʻe tukuange ai ʻe Daniel mo Miriam ʻena ngāué peá na hiki ki Panamā, ko ha fonua naʻá na ʻaʻahi ki ai ki muʻa. Ko hona feituʻu ngāué naʻe kau ai ʻa e ʻotu motu Bocas del Toro Archipelago ʻi he Tahi Kalipiané. Ko e tokolahi taha ʻo e kakai ʻoku nofo aí ko e kau Ngabe. Naʻe fakakaukau ʻa Daniel mo Miriam te na malava ke nofo ʻi Panamā ʻi he māhina nai ʻe valu ʻaki ʻa e paʻanga naʻá na ʻosi tātānakí.
Naʻá na fononga holo ʻi he ʻotu motú ʻi ha vaka mo e pasikala. ʻOkú na kei manatuʻi ʻena ʻuluaki ʻaka pasikala ʻi he ngaahi tahake māʻolungá ʻi he kilomita nai ʻe 30 (maile ʻe 20) ʻi he vela ʻaupito ʻa e ʻeá. Naʻe helaʻia ʻaupito ʻa Daniel ʻo meimei pongia. Neongo ia, ko e ngaahi fāmili Ngabe naʻa nau fetaulakí naʻa nau anga-talitali kakai ʻaupito, tautautefito ʻi he hili hono ako ʻe he ongo meʻá ha ngaahi kupuʻi lea ʻi he lea ʻa e feituʻú. ʻIkai fuoloa naʻá na maʻu ʻa e ako Tohi Tapu ʻe 23.
Ko e hā naʻe hokó ʻi he ʻosi ʻena paʻangá? ʻOku pehē ʻe Daniel: “ʻI heʻema loʻimataʻiá, naʻe kamata ke ma fakakaukau ke ma foki ki Sipeiní. Naʻá ma loto-mamahi ʻaupito ke tukuange ʻema kau ako Tohi Tapú.” Ka ʻi he māhina leva ʻe taha ki mui ai, naʻá na maʻu ha ongoongo fakafiefia. ʻOku pehē ʻe Miriam: “Naʻe fakaafeʻi kimaua ke ma hoko ko ha ongo tāimuʻa makehe. He fiefia ē ke ma lava ʻo nofo ʻi heʻema vāhenga-ngāué!”
KO ʻENA FIEFIA LAHI TAHÁ
Koeʻuhi ko e ngaahi liliu ʻi he kautahá, naʻe ʻikai ai ke toe tāimuʻa makehe ʻa Daniel mo Miriam ʻi he 2015. Ko e hā leva te na faí? Naʻá na falala ki he talaʻofa ʻi he Saame 37:5: “Tuku atu ho halá kia Sihova; falala kiate ia, pea te ne fai ha meʻa maʻau.” Naʻá na maʻu ʻa e ngāue koeʻuhí ke na malava ʻo poupouʻi kinaua ʻi heʻena tāimuʻa tuʻumaʻú, pea ʻi he ʻahó ni ʻokú na ngāue ʻi ha fakatahaʻanga ʻi Veraguas, Panamā.
ʻOku pehē ʻe Daniel: “Ki muʻa ke ma mavahe mei Sipeiní, naʻe ʻikai ke ma fakapapauʻi pe te ma lava ʻo moʻui faingofua. ʻI he ʻahó ni ʻokú ma lava ia, pea ʻoku ʻikai te ma masiva ʻi ha meʻa.” Ko e hā ʻena fiefia lahi tahá? ʻOkú na pehē: “Ke tokoniʻi ʻa e kakai anga-fakatōkilaló ke nau ako fekauʻaki mo Sihová, ko e fiefia ia ʻoku taʻealafakatataua!”