Ko e Tohi Tapú—Ko e Tohi Fakaonopooni Motuʻa Taha Ia ʻa e Faʻahinga ʻo e Tangatá
1 Ko e Tohi Tapú ko e tohi ia kuo tufaki lahi taha ʻi he hisitōliá hono kotoa. Kuo ʻikai ke ʻi ai ha toe tohi kehe ia kuo liliu ki ha ngaahi faʻahinga lea lahi pehē. ʻIkai ko ia pē, kuo ʻikai ke ʻi ai ha toe kulupu ʻe taha kuo nau faivelenga hangē ko e Kau Fakamoʻoni ʻa Sihová ʻi hono tufaki ʻa e Tohi Tapú mo tuʻuaki fakahāhā ia ko e Folofola ʻa e ʻOtuá.
2 ʻOku malava ke tau tui pau ʻokú ne fakahoko mai ʻa e ngaahi tali ʻoku ʻaonga ki he ngaahi palōpalema ʻi onopooní, koeʻuhi he ko e Folofola ia ʻa e ʻOtuá. Pea ʻoku tokonaki mai ʻe he kautaha ʻa Sihová ʻa e tokoni ʻaonga ke maʻu ai ʻa e ngaahi tali ko iá ʻi he ngaahi tohi kuo pulusi pea pehē ki he ngaahi kāsete vitiō. Ko ia ai ʻoku mau fiefia ke fakahā ko e kāsete vitiō ʻi he lea faka-Pilitaniá ko e The Bible—Mankind’s Oldest Modern Book, ko hono ua ia ʻi he ngaahi kāsete vitiō ʻe tolu ʻoku nau fakahāhaaʻi ʻa e fakamānavaʻi ʻo e Tohi Tapú, ʻe malava ke ʻota ia ʻi he taimí ni mei hoʻo fakatahaʻangá. ʻOku feʻunga mo e miniti ʻe 40 ʻa hono lōloá.
3 ʻOku hangē pē ko e ʻuluaki kāsete vitiō ʻi he fakahokohoko ko ʻení, ko e kāsete hono ua ko ení ʻokú ne langaʻi hake foki ʻa e tui pau ki he Tohi Tapú ko e tataki ia mei he ʻOtuá. ʻOkú ne ngāueʻaki ha konga ʻo e filimi naʻe fai ʻi he ngaahi fonua ʻo e Tohi Tapú mo e ngaahi musiume ʻi māmani lahí ke tokoni kiate kitautolu ke tau ʻiloʻi ʻa e anga ʻo hono fakatolonga mai ʻe Sihova ko e ʻOtuá ʻa e Tohi Tapú ʻi he ngaahi senitulí ʻo aʻu mai ki hotau ʻahó ni. Te ke sio ai ki hono tauhi maʻu ʻa e tonu matematē ʻa e Tohi Tapú neongo ʻa hono toutou hiki tatau mo hono liliu ki he ngaahi lea kehe. Te ke sio ai ki hono fakatolonga mai ʻo e tohi ko ʻeni mei he ʻOtuá neongo ʻa hono fakafepakiʻi ʻo fuʻu tōtuʻa ʻa hono tufakí. Te ke toe sio ai foki ki he faʻahinga ko e ngaahi fakamoʻoni ia ʻo hono liliu ʻe he Tohi Tapú ʻa e moʻui ʻa e kakaí ke lelei angé.
4 Ko e kāsete vitiō ko ʻení ʻe mātuʻaki mahuʻinga ʻaupito ki he fetalanoaʻaki fakafāmili ʻi he Tohi Tapú pea mo e ngaahi taumuʻa ʻaonga kehe—ʻo hangē tofu pē ko e ʻuluaki kāsete vitioó. ʻOku mau tui pau ʻe tāpuakiʻi ʻe Sihova ʻa hono ngāueʻakí. Ko kinautolu ʻoku teʻeki ai ke nau ʻota ʻa e kāsete vitioó ni ʻe lava ke nau fai leva ia ʻo fakafou ʻi he potungāue ki he ngaahi tohi ʻi he fakatahaʻangá. ʻOku kei ala maʻu pē ʻa e ngaahi kāsete vitiō ko e The Bible—Accurate History, Reliable Prophecy mo e Jehovah’s Witnesses—The Organization Behind the Name.