Ngāueʻaki ʻa e Ngaahi Tokoni ki he Mamatá ke Faiakoʻaki
1. Naʻe anga-fēfē hono ngāueʻaki ʻe Sihova ʻa e ngaahi tokoni ki he mamatá ke akoʻiʻaki ʻene kau sevāniti ʻo e kuonga muʻá, pea ko e hā hono olá?
1 Ke fakahoko ha fakamatala mahuʻinga ki heʻene kau sevāniti ʻo e kuonga muʻá, naʻe ngāueʻaki ʻe Sihova ʻi he taimi ʻe niʻihi ʻa e ngaahi vīsone mo e ngaahi misi. Fakakaukau atu ki he vīsone ʻa ʻIsikeli ki he saliote fakalangi ʻa Sihová. (Isi. 1:1-28) Sioloto atu ki he anga ʻo e ongoʻi ʻa Taniela ʻi he hili ʻene maʻu ʻa e misi fakaekikite ʻo fakamatalaʻi mai ai ʻa e laka ʻa e ngaahi puleʻanga hau ʻo e māmaní. (Tan. 7:1-15, 28) Pea fēfē ʻa e fakahā fakatoʻoaloto naʻe ʻomai “fakatātā” ki he ʻapositolo ko Sioné ʻo fekauʻaki mo e ngaahi meʻa ʻe hoko he lolotonga ʻa e “ʻaho ʻo e ʻEiki”? (Fkh. 1:1, 10) Naʻe akoʻi kinautolu ʻe Sihova ʻi hono ngāueʻaki ʻa e meʻa mataʻāʻā mo longomoʻui, pea naʻe maongo tuʻuloa ia ʻi honau ʻatamaí.
2. Ko e hā ʻa e ngaahi tokoni ki he mamatá ʻe lava ke tau ngāueʻaki ke akoʻi ki he niʻihi kehé ʻa e ngaahi moʻoni ʻo e Tohi Tapú?
2 Kapau ʻoku tau fiemaʻu ke fakamatalaʻi ʻa e ngaahi moʻoni ʻo e Tohi Tapú ki he niʻihi kehé ke maongo ʻo ʻikai ke ngalongofua, ʻe lava ke tau ngāueʻaki pehē ʻetau ngaahi vitioó ke faiakoʻaki. ʻOku maʻu ʻe heʻetau ngaahi vitioó ha ngaahi tuʻunga-lea lahi pea langa ai ʻa e tuipau ki he Tohi Tapú, ki he kautaha ʻa Sihová, pea ki he ngaahi tefitoʻi moʻoni ʻokú ne ʻai ke lelei ange ʻa e moʻui faka-Kalisitiané. Fakakaukau angé ki ha ngaahi founga ʻe lava ke tau ngāueʻaki ai ʻetau ngaahi vitioó ke faiakoʻakí. Ko e ngaahi meʻa hokó ko ha sīpinga ia ʻo e ngaahi vitiō ʻe lava nai ke ngāueʻakí.
3. Ko e hā ʻe lava ke ke ngāueʻaki ke fakahanga ha tokotaha ako Tohi Tapu ki he kautahá?
3 ʻI he Ngāue Fakafaifekaú: Kuó ke talanoa ki ha tokotaha ako Tohi Tapu ʻo fekauʻaki mo e fetokouaʻaki faka-Kalisitiane ʻi māmani lahí? Fakahāhā ia ki ai ʻaki ʻa e vitiō Our Whole Association of Brothers. ʻE lava ke ʻoange ia ki ai ke ne mamata ai ki muʻa ʻi hoʻomo ako hono hokó pe ko e sio fakataha ki ai he lolotonga ʻo ha teu ke fai ha ako. Hili iá pea lāulea leva ki he ngaahi fehuʻi fakamanatu ʻoku maʻu ʻi he ʻEtau Ngāue Fakafaifekau ʻo e Puleʻanga ʻo Sune 2002.
4. Ko e hā ʻa e ongo meʻangāue fakafaiako ʻe lava nai ha talavou Fakamoʻoni ke ngāueʻaki ʻi he ʻapiakó?
4 Kau talavou, ʻe lava ke mou lea ki hoʻomou faiakó ʻo fekauʻaki mo e malava ke fakahāhā ki hoʻomou kalasí ʻa e foʻi vitiō fakamatala ko e Jehovah’s Witnesses Stand Firm Against Nazi Assault pe ko e Faithful Under Trials—Jehovah’s Witnesses in the Soviet Union. Fokotuʻu ke teuteu ha lauʻipepa fehuʻi, ʻo ʻai ke fetalanoaʻaki ʻa e kalasí ki he ngaahi fehuʻi ʻi he ʻEtau Ngāue Fakafaifekau ʻo e Puleʻanga ʻo Sune 2001 pe ko Fepueli 2003.
5. Ko e hā ʻoku ala maʻu ki he ngaahi mātuʻá ke ngāueʻaki ʻi he ngaahi ako fakafāmilí?
5 Fakataha mo e Fāmilí mo e Ngaahi Kaumeʻá: Ngaahi mātuʻa, fakakaukau atu ki he lahi ʻo e tupu kuo aʻu ki ai hoʻo fānaú talu mei he taimi naʻe fuofua tukuange mai ai ʻa e foʻi vitiō ko e Young People Ask—How Can I Make Real Friends? Ko e hā ʻoku ʻikai ke toe sio ai ki ai ʻi hoʻomou ako fakafāmili hono hokó? ʻOku ʻomai ʻi he ʻEtau Ngāue Fakafaifekau ʻo e Puleʻanga ʻo ʻEpeleli 2002 ʻa e ngaahi fehuʻi ki ha fetalanoaʻaki longomoʻui mo hangatonu.
6. ʻE lava fēfē ke ke fokotuʻutuʻu ki ha taimi fakatupu langa hake fakataha mo e ngaahi kaumeʻá?
6 ʻOku ʻi ai ha ngaahi kaumeʻa ʻi he fakatahaʻangá kuó ke loto ke fakaafeʻi ki ho ʻapí? Ko e mamata fakataha ʻi he vitiō Respect Jehovah’s Authority ʻe hoko ai ha efiafi fakatupu langa hake, tautefito kapau te ke fakamanatu ʻa e ngaahi lēsoni kuo akó, ʻo ngāueʻaki ʻa e ngaahi fehuʻi ʻoku fakahokohoko mai ʻi he ʻEtau Ngāue Fakafaifekau ʻo e Puleʻanga ʻo Sepitema 2004.
7. Ko e hā nai ʻa e ngaahi faingamālie ʻoku lava ke ke fakakaukau atu ke ngāueʻaki ai ʻetau ngaahi vitioó?
7 Ngaahi Faingamālie Kehe: Ko e hā ha toe founga ʻe lava ke ke ngāueʻaki ai ʻetau ngaahi vitiō kehekehe ʻe 20? ʻE hanga ʻe hoʻo fakahāhā ha taha pe ua ʻo kinautolu ki ha taha ʻokú ke ʻaʻahi tuʻumaʻu ki aí ʻo tokoniʻi ia ke ne fakalakalaka fakalaumālie? ʻE lava ke ke tuʻuaki atu ke fakahāhā ʻa e ngaahi vitioó ʻi ha ʻapi tauhiʻanga vaivai fakalotofonua pe ko ha senitā ki he kau taʻumotuʻá? ʻE tokoni ʻa e ngaahi vitioó ke maʻu ʻa e tokaʻi ʻa e ngaahi kāinga ʻikai-Fakamoʻoní, ngaahi kaungāʻapí mo e ngaahi kaungāngāué? Ko ʻetau ngaahi vitioó ko e ngaahi tokoni maongo, mohu fakahinohino mo ola lelei ia ki he mamatá. Ngāueʻaki kinautolu ke faiakoʻaki.