Puha Fehuʻi
◼ Ko e hā hono ngāueʻaki totonu ʻo e ngaahi kupuʻi lea “tokoua” mo e “tuofefine”?
ʻI hono ngāueʻaki ʻi he ʻuhinga fakafoʻileá, ko e ngaahi kupuʻi lea “tokoua” mo e “tuofefine” ʻoku ʻuhinga ia ki he tokotaha tāutaha ʻoku nau maʻu ʻa e ongo mātuʻa tatau. Ko e vahaʻangatae fakaenatula ko ʻení ʻoku faʻa fakatupunga ia ʻe ha pīkitai māfana, pea mo e feohi vāofi ʻoku maʻu ʻe he tokotaha taki taha ʻo laka mamaʻo ange ia ʻi he anga ʻo e nofo fakakoló, ʻātakaí, pea mo e ngaahi haʻi ʻo e feongoʻakí
Naʻe akoʻi ʻe Sīsū ʻene kau ʻaposetoló ke nau kole kia Sihova ʻi he lotu ko “ʻEtau Tamai.” Ko e ngāueʻaki ʻo e kupuʻi lea ko iá ʻoku ʻuhingá ʻi he tuʻunga ko e kau Kalisitiané, ʻoku tau hoko kotoa ko e konga ʻo e siakale fakafāmili vāofi ʻa ia ʻoku tau fiefia ai ʻi ha vahaʻangatae fakalaumālie mahu ʻaupito. Naʻe toe fakamamafaʻi ʻeni ʻe Sīsū ʻi he taimi naʻá ne tala ai ki hono kau muimuí “ko kimoutolu ko e ngāhi tokoua kotoa pe.”—Mt. 6:9; 23:8.
Koeʻuhi ko hotau ngaahi haʻi fakalaumālie vāofi ʻi he fale ʻo e ʻOtuá, ʻoku tau ngāueʻaki leva ʻa e kupuʻi lea ko e “Tokoua” mo e “Tuofefine,” tautefito ʻi he ngaahi fakataha ʻa e fakatahaʻangá. ʻI he lolotonga ʻa e ngaahi meʻa fakalaumālié ni, ko e tokotaha ʻokú ne tauhi ʻa e fakatahá ʻokú ne ʻiloʻi ʻa e kau ʻosi papitaiso tāutahá ʻo ne ngāueʻaki ʻa e kupuʻi lea “tokoua” pe “tuofefine” pea toki hoko atu ʻaki ʻa e hingoa ʻoku uiʻaki ʻa e tokotaha ko iá.
Fēfē kapau ko ha tokotaha teʻeki papitaiso ʻokú ne loto ke kau ki he ngaahi fakatahá? ʻI he feohi ha taha mo e kakai ʻa Sihová ʻi ha taimi pea ʻokú ne fakaofi atu ke fakatapui, ʻo lau ia ko e taha ʻo e Kau Fakamoʻoni ʻa Sihová, ʻoku ʻikai ke hala ke ngāueʻaki ʻa e kupuʻi lea “Tokoua” pe “Tuofefine” fakataha mo hono hingoá. ʻOku tautefito ʻene moʻoni ʻení kapau ko e tokotaha tāutaha kuo hoko ko ha tokotaha malanga teʻeki papitaiso.
ʻI he tafaʻaki ʻe tahá, ko ha faʻahinga mahuʻingaʻia kuo nau toki kamata ke kau ʻi heʻetau ngaahi fakatahá ʻa ia kuo teʻeki ai ke nau laka atu ʻi he ngaahi lākanga ke fakaʻilongaʻi ai kinautolu ko e konga ʻo e fale ʻo e ʻOtuá. Ko e faʻahingá ni tāutaha ʻoku ʻikai ke ui kinautolu ko e “Tokoua” pe “Tuofefine,” koeʻuhi ko e vahaʻangatae fakalaumālie ʻo e fāmili ʻo e ʻOtuá ʻoku teʻeki ke ʻiate kinautolu. Ko ia, lolotonga ʻa e ngaahi fakatahá, ʻe lava ke tau ngāueʻaki ʻa e ngaahi kupuʻi lea lelei mo taau hangē ko e “Tangataʻeiki,” fakataha mo honau hingoá.
Ko hono ngāueʻaki ʻa e ngaahi kupuʻi lea “tokoua” mo e “tuofefine” ʻi heʻetau ngaahi fakataha ʻi he fakatahaʻangá ʻoku hā ai ʻa e haʻi ʻoku vāofi mo mahuʻinga mamaʻo ange ia ʻi hono fakahaaʻi ʻaki hono ngāueʻaki ʻa e ngaahi hingoa tāutahá. ʻOku fakamanatu mai kiate kitautolu ʻa e fuʻu monū ʻo e vahaʻangatae ʻoku tau fiefia aí ko e fāmili fakalaumālie ʻi he malumalu ʻo e Tamai pē ʻe taha, ko Sihova ko e ʻOtuá. ʻOku toe fakamanatu mai kiate kitautolu ʻa e ʻofa lolotó mo e feʻofoʻofaní.—ʻEf. 2:19; 1 Pita 3:8.