Puha Fehuʻi

◼ ʻI he taimi ʻoku kole ai ki he fakatahaʻangá ke tokoni ki hono fai ha fokotuʻutuʻu ki ha putu, ʻe maheʻa hake nai ʻa e ngaahi fehuʻi ʻoku hoko haké:

Ko hai ʻoku totonu ke ne fai ʻa e malanga putú? Ko e fakakaukau ʻeni ia ke fai ia ʻe he ngaahi mēmipa ʻo e fāmilí. Te nau fili nai ha tokoua ʻosi papitaiso pē ʻoku ʻi ha tuʻunga lelei. Kapau ʻoku kole ki he kulupu ʻo e kau mātuʻá ke ʻomai ha tokotaha malanga, te nau fili ha tokotaha mātuʻa taau ke ne fai ha malanga ʻo makatuʻunga ʻi he ʻautilaine ʻa e Sōsaietí. Neongo ʻoku ʻikai ko hano vikiʻi ʻo e tokotaha maté, ʻe feʻungamālie nai ke fakahanga ʻa e tokangá ki he ngaahi ʻulungaanga faʻifaʻitakiʻanga naʻe fakahāhā ʻe he tangata pe fefine ko iá.

ʻE ngāueʻaki nai ʻa e Fale Fakatahaʻangá? ʻE malavá kapau naʻe fakangofua ia ʻe he kulupu ʻo e kau mātuʻá pea kapau ʻoku ʻikai ke uesia ai ha fakataha tuʻumaʻu kuo ʻosi fakataimitēpileʻi. ʻE ngāueʻaki nai ʻa e holó kapau ko e tokotaha maté ʻoku ʻi ai hano ongoongolelei pea ko ha mēmipa ia ʻo e fakatahaʻangá pe ko ha kiʻi tama ʻa ha mēmipa. Kapau ko e tokotahá ʻoku ongoongoa ʻi he ʻulungaanga taʻefakakalisitiané, pe kapau ko ha ngaahi meʻa kehe ʻoku hoko ʻo tapua mai ai ha taʻefakafiemālie ki he fakatahaʻangá, ʻe fakakaukau nai ʻa e kau mātuʻá ke ʻoua ʻe fakangofua ke ngāueʻaki ʻa e holó.​—Sio ki he tohi Our Ministry, peesi 62-63.

Hangē ko ia ʻoku faʻa faí, ʻoku ʻikai ke ngāueʻaki ʻa e ngaahi Fale Fakatahaʻangá ki he putu ʻa e kau taʻetuí. ʻE fai nai hano tali kapau ko e ngaahi mēmipa ʻo e fāmilí ʻoku kei moʻuí ʻoku nau feohi longomoʻui ko e kau malanga ʻosi papitaiso, ʻe ʻiloʻi ʻa e tokotaha maté ʻe ha kau malanga feʻunga ʻi he fakatahaʻangá naʻá ne manako ki he moʻoní pea mo ha ongoongolelei ʻi he ʻulungaanga lelei ʻi he koló, pea ʻoku ʻikai ha anga-fakafonua ʻe kau mai ʻi he polokalamá.

ʻI hono fakangofua ke ngāueʻaki ʻa e Fale Fakatahaʻangá, ʻe fakakaukauʻi leva ʻe he kau mātuʻá pe ʻoku faʻa angaʻaki ke ʻi ai ha puha mate ʻi he putú. Kapau ko ia, te nau fakangofua nai ia ke ʻomai ki he holó.

Fēfē ʻa e ngaahi putu fekauʻaki mo e kakai ʻi he māmaní? Kapau ko e tokotaha maté ʻokú ne maʻu ha ongoongolelei ʻi he koló, ʻe fai nai ʻe ha tokoua ha malanga faka-Tohitapu ʻi he ʻapi ʻo e putú, pe ʻi he malaʻé. ʻE fakafisi ʻa e fakatahaʻangá ke fakahoko ha putu ʻo ha taha ʻoku ʻiloa ʻi he ʻulungaanga taʻetāú mo maumau-lao pe ko hono ʻulungaangá ʻoku fepaki ʻaupito mo e ngaahi tefitoʻi moʻoni ʻo e Tohitapú. ʻE ʻikai ʻaupito kau fakataha ha tokoua mo ha faifekau ʻi hono fai ha malanga fakasiasi pe ʻi ha faʻahinga putu ʻoku fai ʻi he siasi ʻo Pāpilone ko e Lahí.

Fēfē kapau naʻe tuʻusi ʻa e tokotaha maté? ʻI he ngaahi tuʻunga lahi tahá, ʻe ʻikai ke kau ki ai ʻa e fakatahaʻangá. ʻE ʻikai ngāueʻaki ʻa e Fale Fakatahaʻangá. Kapau naʻe hā mei he tokotahá ha fakamoʻoni ʻo e fakatomala peá ne fakahāhā ha holi ke toe fakafoki mai, ʻe fakaʻatā nai ʻe he konisēnisi ʻo e tokouá ke ne fai ha malanga faka-Tohitapu ʻi he ʻapi ʻo e putú pe ʻi he malaʻé, ke fai ha fakamoʻoni ki he kau taʻetuí pea mo ha fakafiemālie ki he ngaahi kāingá. Kae kehe, ki muʻa ke fai ʻa e fakakaukau ko ʻení, ʻe fakapotopoto ki he tokouá ke ne pōtalanoa mo e kulupu ʻo e kau mātuʻá pea tokanga ki he meʻa te nau fokotuʻu maí. ʻI ha ngaahi tuʻunga ʻa ia ʻe ʻikai fakapotopoto nai ai ki ha tokoua ke kau ki ai, ʻe feʻungamālie nai ki ha tokoua ʻa ia ko ha mēmipa ia ʻo e fāmili ʻo e tokotaha maté ke ne fai ha malanga ke fakafiemālieʻi ʻa e ngaahi kāingá.

Ko ha fakahinohino lahi ange ʻe lava ke maʻu ia ʻi he ngaahi tatau ʻo e Watchtower ʻo ʻOkatopa 15, 1990, peesi 30-31; Sepitema 15, 1981, peesi 31; Maʻasi 15, 1980, peesi 5-7; Sune 1, 1978, peesi 5-8; Sune 1, 1977, peesi 347-348; Maʻasi 15, 1970, peesi 191-192; mo e Awake! ʻo Sepitema 8, 1990, peesi 22-23 mo e Maʻasi 22, 1977, peesi 12-​15.