Ngaahi Fehuʻi mei he Kau Lautohí

Kapau ʻoku taonakita ha taha, ʻe ʻatā ki ha faifekau Kalisitiane ke ne fai ʻa e malanga putú?

Ko e faifekau Kalisitiane taki taha te ne fai ʻene fili pē ʻaʻana pe ʻoku ʻataʻatā hono konisēnisí ke ne malava ʻo fai ha malanga putu ʻo ha taha ʻoku ngalingali naʻe taonakita. ʻI hono fai ʻene filí, ʻoku totonu ke ne fakakaukau ki he ngaahi fehuʻi ko ʻení: ʻOku anga-fēfē ʻa e vakai ʻa Sihova ki he taonakitá? Ko e maté ko e moʻoni ko ha fakapō fakatupu pē ʻe ia? Ko ha puke fakaʻatamai pe fakaeongo naʻe tupu ai ʻa e taonakitá? ʻOku anga-fēfē ʻa e vakai ʻa e feituʻú ki he taonakitá?

ʻI he tuʻunga ko e kau Kalisitiané, ʻoku tau mahuʻingaʻia ʻi he anga ʻo e vakai ʻa Sihova ki he taonakitá. ʻOku mātuʻaki mahuʻinga mo toputapu kia Sihova ʻa e moʻui fakaetangatá. (Senesi 9:5; Sāme 36:9) Ko ʻete tāmateʻi fakakaukauʻi pē kitá ko e fakapō-fakaekita ia, pea ko ia ai, ʻoku taʻefakahōifua ia ki he vakai mai ʻa e ʻOtuá. (Ekisoto 20:13; 1 Sione 3:15) ʻOku taʻofi ʻe he moʻoniʻi meʻa ko iá ʻa hono fai ʻo ha malanga putu ʻo ha mate taonakita?

Fakakaukau ange ki he meʻa fekauʻaki mo Tuʻi Saula ʻo ʻIsilelí. ʻI heʻene ʻiloʻi heʻikai te ne hao ʻi heʻene faitau fakaʻosi mo e kau Filisitiá, ʻi he ʻikai te ne fakaʻatā ke ngaohikoviʻi ia ʻe hono filí, “naʻe toʻo ʻe Saula ʻene heleta aʻana, ʻo ne fakahinga ki ai.” ʻI hono maʻu ʻe he kau Filisitiá hono ʻangaʻangá, naʻa nau fakamaʻu ia ki he ʻā ʻo e kolo ko Petesaní. ʻI hono ʻiloʻi ʻa e meʻa naʻe fai ʻe he kau Filisitiá, naʻe hanga ʻe he kau nofo ʻo Siepesi-kiliatí ʻo ʻave ʻa e ʻangaʻangá ʻo tutu. Pea naʻa nau ʻave ʻo tanu ʻa hono ngaahi huí. Naʻe aʻu ʻo nau ʻaukai ʻi he ʻaho ʻe fitu, ko ha ouau mamahi tukufakaholo ia ʻi he lotolotonga ʻo e kau ʻIsilelí. (1 Samiuela 31:​4, 8-13; Senesi 50:10) ʻI he ʻilo ʻa Tēvita, ko e pani ʻa Sihová, ki he meʻa naʻe fai ʻe he kau nofo ʻo Siepesi-kiliatí, naʻá ne pehē: “Ke fakamonuia akimoutolu mei a Jihova, koeuhi kuo mou fakaha ae ofa ni ki ho mou eiki, io kia Saula, bea kuo mou fai hono butu. Bea ofa eni ke fakaha e Jihova ae agalelei moe mooni kiate kimoutolu.” (2 Samiuela 2:​5, 6, PM) ʻOku ʻikai ke fakahaaʻi mai ʻe he lēkooti fakaʻotuá ia naʻe fakahalaiaʻi ʻa e kau nofo ʻo Siepesi-kiliatí ʻi heʻenau fakahoko ʻa e meʻa naʻe lau ko ha ouau putu kia Tuʻi Saulá. Fakahoa atu ia ki he tuʻunga ʻo e faʻahinga naʻe ʻikai ke fai honau tanú koeʻuhi ko ʻenau faihalá. (Selemaia 25:​32, 33) ʻE fakakaukau nai ha faifekau Kalisitiane ki he fakamatala fekauʻaki mo Saulá ʻi heʻene fili pe te ne fai ha malanga putu ʻo ha mate taonakita.

ʻE toe loto nai ʻa e faifekaú ke fakakaukau ki he taumuʻa ʻo ha malanga putu. ʻI he ʻikai hangē ko e kakai ʻoku nau tui ki he taʻefaʻamate ʻa e soulú, ʻoku ʻikai ke fai ʻe he Kau Fakamoʻoni ʻa Sihová ia ha ngaahi putu fakataha mo e foʻi fakakaukau hala ko ia ko hono fakahekeheka atu ia ʻo e tokotaha maté ki ha toe māmani ʻe taha. ʻI he ʻikai ko e taumuʻa ke ʻaonga ki he tokotaha maté, ko e taumuʻa tefito ʻo hono fai ʻo ha malanga putu ke fakafiemālieʻi ʻa e kau mamahí pea ke ʻoatu ha fakamoʻoni fekauʻaki mo e tuʻunga ʻo e kau maté ki he faʻahinga ko ia ʻoku nau ʻi aí. (Koheleti 9:​5, 10; 2 Kolinito 1:​3-5) Ko e toe ʻuhinga mahuʻinga ʻe taha ki hono fai ha malanga putú ke tokoniʻi ʻa e faʻahinga kotoa ʻoku haʻu ki aí ke nau fakakaukau ki he fuonounou ʻo e moʻuí. (Koheleti 7:2) ʻE ngāue ʻa e ngaahi taumuʻa ko ʻení ʻi hono fakahoko ha malanga putu ʻo ha mate taonakita?

Ko e moʻoni, ʻoku ongoʻi nai ʻe he niʻihi ko e tokotaha ko ia naʻá ne toʻo fakakaukauʻi pē ʻene moʻuí, naʻá ne ʻiloʻi kakato kuó ne angahala ai kia Sihova. Ka ʻoku malava maʻu pē ke fakamoʻoniʻi ha ongoʻi pehē? ʻE lava ke pehē ko ha foʻi ngāue ākenoa pē ia? ʻOku feinga taonakita ʻa e niʻihi ʻo nau ongoʻi fakaʻiseʻisa pea ʻikai te nau fakahoko ia. ʻOku ʻikai malava ha taha ʻi he hili ʻene maté ke ne fakatomala koeʻuhi ko e meʻa kuó ne faí.

Ko e toe meʻa mahuʻinga ʻe taha ko e ngaahi puke fakaʻatamaí mo fakaeongó ʻoku kaunga ia ki he ngaahi taonakita lahi. ʻOku malava ke ui moʻoni ʻeni ia ko e kau maʻukovia ʻe he taonakitá. Fakatatau ki he ngaahi fika ʻe niʻihi, ko e peseti ʻe 90 ʻo e faʻahinga ʻoku nau taonakitá ʻoku nau maʻu ha faʻahinga palopalema fakaʻatamai, fakaeongo, pe meʻa ʻokú ne maʻunimā ia. ʻE fakamolemoleʻi ʻe Sihova ʻa e fakapoongi-kita ʻoku fakahoko ʻe he kakai ʻoku ʻi ha tuʻunga fakaʻatamai peheé? ʻOku ʻikai malava ke tau fakapapauʻi ʻe kitautolu pe naʻe fakahoko ʻe he tokotaha kuo maté ha angahala taʻealafakamolemoleʻi ʻi he vakai mai ʻa Sihová. ʻE fakakaukau nai ha faifekau Kalisitiane ki he ngaahi tuʻungá mo e hisitōlia fakafaitoʻo ʻo e tokotaha maté ʻi heʻene fakakaukau pe ʻe fai ha malanga putu ʻo e mate taonakitá.

ʻOku toe ʻi ai mo e tafaʻaki ʻe taha ke fakakaukau ki ai: ʻOku anga-fēfē ʻa e vakai ʻa e kakai ʻi he feituʻú ki he taonakitá pea mo e mate ʻa e tokotahá? Ko e meʻa eni ʻoku tautefito ʻa e tokanga ki ai ʻa e kau mātuʻá, ʻa ia ʻoku nau mahuʻingaʻia ʻi he ongoongo ʻo e fakatahaʻanga fakalotofonua ʻo e Kau Fakamoʻoni ʻa Sihová. ʻI hono fakatuʻunga ʻi he fakakaukau fakalūkufua ki he taonakitá ʻi he feituʻú, pea tautefito ki he tuʻunga fekauʻaki mo e taonakitá, ʻe loto nai ʻa e kau mātuʻá ke ʻoua ʻe tali fakahāhā ha putu pehē, pe ko hono fai ia ʻi he Fale Fakatahaʻangá.

Kae kehe, kapau ʻoku kole ki ha faifekau Kalisitiane ke ne fai ʻa e putú, te ne ongoʻi nai ʻi haʻane fili fakafoʻituitui, ʻe lava pē ke ne fai ia. Kapau ʻokú ne fili ke ne fai ia, ʻoku totonu ke ne fakapotopoto ʻo ʻoua te ne fai ha ngaahi fakamatala papau fekauʻaki mo e malava ke ʻi ai ha toetuʻú. ʻIlonga ha faʻahinga ʻamanaki ʻi he kahaʻú ki he kau maté ʻoku ʻi he toʻukupu ia ʻo Sihová, pea ʻoku ʻikai ha taha ʻoku malava ke ne pehē ʻe toetuʻu ʻa e tokotaha maté pe ʻikai. ʻE tokangataha pē ʻa e faifekaú ki he ngaahi moʻoni faka-Tohitapu fekauʻaki mo e maté pea ʻoatu ha fakafiemālie ki he kau mamahí.