Tataki ʻa e Kau Akó ki he Kautaha ʻOku Fakafofongaʻi ʻe Hotau Hingoá
1 “Ko ha pōpoaki ia ʻoku leaʻaki ʻi he ngaahi lea ʻoku laka hake ʻi he 200. Ko ha pōpoaki ia ʻoku fanongoa ʻi he ngaahi fonua laka hake ʻi he 210. Ko ha pōpoaki ia ʻoku ʻoatu fakafoʻituitui ki he kakai ʻi ha feituʻu pē ʻe maʻu nai kinautolu ki ai. Ko e konga kotoa ia ʻo e feingangāue fakamalanga lahi taha kuo ʻiloa ʻi māmani, ko ha pōpoaki ʻokú ne fakafāʻūtahaʻi ʻa e laui miliona ʻi māmani lahi. Kuo fokotuʻutuʻu maau ʻa e Kau Fakamoʻoni ʻa Sihová ʻo nau fakahoko ʻa e ngāue ko ʻení ʻo laka hake ʻi he ngaahi taʻu ʻe teau!”
2 Ko ia, ʻi hono kamata ke hiki ʻa e foʻi vitiō ko e Jehovah’s Witnesses—The Organization Behind the Name. ʻOkú ne ʻomai ai ʻa e tali ki he ngaahi fehuʻi: Ko hai moʻoni ʻa e Kau Fakamoʻoni ʻa Sihová? ʻOku anga-fēfē hono fokotuʻutuʻu maau ʻenau ngāué? Tatakí? Fakapaʻangá? ʻOku maongo ki he kau mamatá ʻa e moʻoniʻi meʻa ko ia “Ko e Kau Fakamoʻoni ʻa Sihová ʻi māmani lahi kuo akoʻi ke hoko ko ha kautaha ke tokoni ki honau ngaahi kaungāʻapí ke langa hake ʻa e tui ki he Tohitapú,” pea ʻoku fakalototoʻaʻi ai kinautolu ke nau fakamoʻoniʻi ʻe kinautolu tonu ʻa e kautaha ʻoku fakafofongaʻi ʻe hotau hingoá. ʻI he hili ʻa e vakai ki he vitiō ko ʻení, ko ha fefine naʻe ako naʻá ne tōloʻimata ʻi he fiefia mo e houngaʻia peá ne pehē: “Ko hai ia ʻe taʻemalava ke ne sio ki ai ko e kautaha ʻeni ʻa e ʻOtua moʻoní, ʻa Sihova?”—Fakafehoanaki mo 1 Kolinito 14:24, 25.
3 Ko ha fefine ʻe taha naʻe tōmokosi ʻene ako ʻa e Tohitapú ʻi ha vahaʻa taimi lōloa, ka naʻe ʻikai te ne lava ke tali ʻa e moʻoniʻi meʻa ko ia ko e Tolu-Tahaʻi-ʻOtuá ko ha tokāteline loi. Naʻe fakahāhā ange leva kiate ia mo hono husepānití ʻa ʻetau foʻi vitioó. Naʻá na ʻohovale ʻaupito ʻi hono huluʻí peá na mamata ai ʻo tuʻo ua ʻi he pō tatau. ʻI heʻena ako hono hokó, naʻe fakahā ʻe he uaifí ʻa ʻene holi ke hoko ko ha Fakamoʻoni. Naʻá ne pehē naʻá ne fuʻu tokanga ʻaupito ki heʻene tui ki he Tolu-Tahaʻi-ʻOtuá peá ne liʻaki ai ʻa e vakai atu ki heʻetau kautahá pea mo e kakai ʻi aí. Mei he foʻi vitoó, naʻá ne ʻiloʻi ai kuó ne maʻu ʻa e kautaha moʻoni ʻa e ʻOtuá. Naʻá ne fiemaʻu ke kamata leva ʻi he ngāue fakamalanga mei he fale ki he falé. ʻI he hili ʻa hono fakamatalaʻi kiate ia ʻa e ngaahi sitepu ʻoku fiemaʻu kae hoko ko ha tokotaha malanga teʻeki papitaisó, naʻá ne pehē: “Te u fai leva ia.” Naʻá ne fakafisi mei hono siasí, ʻo kamata ke ngāue ʻi he malaʻe malangá, peá ne malava ke hoko ʻo fakahā ʻa hono fakahalaʻi ʻa e Tolu-Tahaʻi-ʻOtuá.
4 Kuo hoko ʻo fakamoʻoniʻi lelei ʻoku fakalakalaka fakalaumālie lelei ange ʻa e kau ako Tohitapú pea tupu ʻo matuʻotuʻa lahi ange ʻi he taimi te nau ʻilo ai ʻa e kautaha ʻa Sihová pea feohi mo iá. ʻOku hā mahino, ʻi he hili hono papitaiso ʻa e toko 3,000 ʻi he Penitekosí, “naʻa nau nofo fakaʻutumauku ki he faiako ʻa e kau Aposetolo, mo e fakakautaha.” (Ng. 2:42) ʻOku fiemaʻu ke tau tokoniʻi ʻa e kau akó ke nau fai ʻa e meʻa tatau he ʻahó ni. ʻE lava fēfē ke tau fai ia?
5 Fua ʻa e Fatongiá: Ko e tokotaha ngaohi ākonga kotoa pē kuo pau ke ne ʻilo ko hono fatongiá ia ke tataki ʻa e tokotaha ako Tohitapú ki he kautaha ʻa e ʻOtuá. (1 Tim. 4:16) ʻI he ako taki taha ʻoku totonu ke vakai ki ai ko ha maka lakaʻanga ia ki ha ʻaho fakafiefia ʻi he taimi ʻe fakahāhaaʻi ai ʻe ha taha foʻou ʻene fakatapui kia Sihová ʻaki ʻene papitaiso ʻi he vai. Ko e taha ʻo e ongo fehuʻi ʻe ʻeke kiate ia he lolotonga ʻa e malanga papitaisó ko e: “ʻOku mahino kiate koe ko hoʻo fakatapui mo e papitaisó ʻoku ʻiloʻi ai koe ko e taha ʻo e Kau Fakamoʻoni ʻa Sihová ʻi hoʻo feohi mo e kautaha ʻoku tatakiʻaki ʻa e laumālie ʻo e ʻOtuá?” Ko ia ai, ʻoku mātuʻaki mahuʻinga ke ne ʻilo heʻikai malava ke ne tauhi ʻa e ʻOtuá kapau heʻikai te ne feohi longomoʻui mo e fakatahaʻanga Kalisitiane moʻoní.—Mt. 24:45-47; Sione 6:68; 2 Kol. 5:20.
6 Hokohoko atu ke akoʻi ʻa e tokotaha akó fekauʻaki mo e fakatahaʻanga fakalotofonuá pea mo e kautaha fakavahaʻapuleʻanga ʻoku fakafofongaʻi ʻe he Kau Fakamoʻoni ʻa Sihová. Fai ʻeni ʻi he ako Tohitapu taki taha, ʻo kamata ʻi he ʻuluaki akó. Mei he kamataʻangá pē, fakaafeʻi ʻa e tokotaha akó ki he ngaahi fakatahá, pea hanganaki fakaafeʻi maʻu pē ia.—Fkh. 22:17.
7 Ngāueʻaki ʻa e Ngaahi Meʻangāue Kuo Tokonaki Maí: Ko ʻetau ngaahi tohi lelei taha ke ngāueʻaki ʻi hono fai ʻa e ngaahi ako Tohitapú ko e polosiua Ko e Hā ʻOku Fiemaʻu ʻe he ʻOtuá Meiate Kitautolú? pea mo e tohi ko e ʻIlo ʻA Ia ʻOku Taki Atu ki he Moʻui Taʻengatá. ʻOkú na fakatou fakaeʻa ʻa e fiemaʻu ke feohi mo e fakatahaʻangá. ʻOku pehē ʻe he ngataʻanga ʻo e lēsoni 5 ʻi he polosiua ko e Fiemaʻu: “ʻOku fiemaʻu ke ke hanganaki ako fekauʻaki mo Sihova pea talangofua ki heʻene ngaahi fiemaʻú. Ko hono maʻu ʻa e ngaahi fakataha ʻi he Fale Fakatahaʻanga ʻo e Kau Fakamoʻoni ʻa Sihová ʻi ho feituʻú ʻe tokoni ia kiate koe ke ke fai pehē.” ʻOku toutou fakalototoʻaʻi ʻe he tohi ʻIlo ʻa e tokotaha akó ke fai ha feohi ʻi he ngaahi fakatahá. ʻI he vahe 5, palakalafi 22, ʻoku fakalahi mai ai ʻa e fakaafe ko ʻení: “[Ko e] Kau Fakamoʻoni ʻa Sihová . . . ʻoku nau enginaki loto-māfana atu kiate koe ke ke kau fakataha mo kinautolu ʻi he lotu ki he ʻOtuá ʻo ‘fai ʻi laumālie pea fai ʻi moʻoni.’ (Sione 4:24)” ʻI he vahe 12, palakalafi 16, ʻoku fakahā ai: “ʻI hoʻo hokohoko atu ʻa e ako ko ʻení pea ke tōʻongaʻaki ʻa hono maʻu ʻa e ngaahi fakataha ʻa e Kau Fakamoʻoni ʻa Sihová, ʻe toe mālohi ange ai ʻa hoʻo tuí.” ʻI he vahe 16, palakalafi 20, ʻoku pehē ai: “ʻAi ke ke tōʻongaʻaki ʻa hono maʻu ʻa e ngaahi fakataha ʻa e Kau Fakamoʻoni ʻa Sihová.” ʻOkú ne tānaki atu: “ʻE tokoni ʻeni kiate koe ke mahino pea mo ngāueʻaki ʻa e ʻiloʻi ʻo e ʻOtuá ʻi hoʻo moʻuí pea te ke maʻu ai ʻa e fiefia. ʻE tokoniʻi koe ʻi he hoko ko ha konga ʻo e fetokouaʻaki faka-Kalisitiane ʻi māmani lahí ke ke nofo ofi ai kia Sihova.” ʻI he vahe 17 ʻoku fakamatalaʻi lelei ai ʻa e founga ke maʻu ai ʻe ha taha ʻa e maluʻanga moʻoní ʻi he lotolotonga ʻo e kakai ʻa e ʻOtuá. ʻI heʻetau ako ko ia mo e niʻihi kehé, ko hotau fatongiá ia ke fakamamafaʻi ʻa e ngaahi konga ko ʻeni ʻo e fakamatalá.
8 Ko e polosiua Ko e Kau Fakamoʻoni ʻa Sihova—ʻOku Ngāue Fāʻūtaha ki he Finangalo ʻo e ʻOtua ʻi Māmani Lahi ko ha meʻangāue lelei ia kuo faʻu ke maheni ai ʻa e tokotaha tāutaha mo e kautaha hā mai pē ʻe taha ʻoku ngāueʻaki ʻe Sihova ʻi he ʻahó ni ke fakahokoʻaki hono finangaló. Ko e fakamatala fakaikiiki ʻi ai fekauʻaki mo ʻetau ngāue fakafaifekaú, ngaahi fakatahá, pea mo e kautahá te ne fakalototoʻaʻi ʻa e tokotaha lautohí ke feohi mo kitautolu ʻi he lotu ki he ʻOtuá. ʻI he kamata pē ke fokotuʻu ha ako Tohitapu, ʻoku fokotuʻu mai ke tau ʻoange ki he tokotaha akó ha tatau ʻo e polosiua ko ʻení ke ne lau pē ʻe ia. ʻOku ʻikai ke fiemaʻu ke ako ia mo ia ʻo hangē ko ia naʻe fai ʻi he kuohilí.
9 Ko e niʻihi ʻo e ngaahi foʻi vitiō kuo faʻu ʻe he Sōsaietí, ko e ngaahi meʻangāue lelei ʻaupito ia ki hono tataki ʻa e kau akó ki he kautaha ʻoku fakafofongaʻi ʻe hotau hingoá. ʻE lelei kapau ʻe lava ke nau mamata ʻi he: (1) The New World Society in Action, ko e fakamanatu ʻo e filimi ʻi he 1954 ʻa ia naʻe maʻu ai ʻa e nonga, lelei, pea mo e laumālie anga-ʻofa ʻoku falaleleʻaki ʻa e kautaha ʻa Sihová; (2) United by Divine Teaching, ʻa ia ʻoku lave ki he fāʻūtaha melino ʻa ia naʻe fakahāhā ʻi heʻetau ngaahi fakataha-lahi fakavahaʻapuleʻanga ʻi ʻIulope Hahake, ʻAmelika Tonga, ʻAfilika, pea mo ʻĒsia; (3) To the Ends of the Earth, ʻokú ne fakaʻilongaʻi ʻa e taʻu 50 ʻo e Akoʻanga Tohitapu ʻa e Taua Leʻó ko Kiliatí pea fakahā ai ʻa e ola kuo maʻu ʻe he kau misinalé ʻi he ngāue fakamalanga ʻi māmani lahí; (4) Jehovah’s Witnesses Stand Firm Against Nazi Assault, ʻoku fakahā mai ai ʻa e talanoa fakalotofiefia ki he loto-toʻa mo e ikuna ʻa e Kau Fakamoʻoní ʻi he fehangahangai mo e fakatanga anga-fakamanu ʻa Hitilā kiate kinautolú; pea pehē foki ki he (5) Jehovah’s Witnesses—The Organization Behind the Name.
10 Fokotuʻutuʻu ha Ngaahi Kolo Fakalakalaka Fekauʻaki mo e Ngaahi Fakatahá: Kuo pau ke fakamatalaʻi ki he tokotaha akó ʻoku fiemaʻu kiate kitautolu fakatouʻosi ha ako fakaekita ʻoku tokonaki mai ʻi he fokotuʻutuʻu ʻo e ako Tohitapu ʻi ʻapí pea mo e ngaahi fetalanoaʻaki fakaelokiako ʻa ia ʻoku tokonaki mai ʻi he ngaahi fakataha ʻa e fakatahaʻangá. (Sione 6:45) Ko ha tokotaha foʻou ʻoku fiemaʻu kiate ia ke ne fakalakalaka tatau ʻi he mahino fakatouʻosi kiate ia ʻa e ngaahi Konga Tohitapú pea mo e kautahá. Ke aʻusia iá, ʻoku ʻikai ha fetongi ki hono maʻu ʻa e ngaahi fakatahá. (Hep. 10:23-25) Kamata leva hono fakaafeʻi ʻa e tokotahá ki he ngaahi fakataha ʻa e fakatahaʻangá. Ko e faʻahinga mahuʻingaʻia foʻou ʻe niʻihi ʻoku nau kamata ke maʻu ʻa e ngaahi fakatahá naʻa mo e ki muʻa ke fai ha ako Tohitapu tuʻumaʻu ʻi ʻapi. Ko hono moʻoní, ʻoku fiemaʻu ke tau fokotuʻutuʻu ha faʻifaʻitakiʻanga totonu ʻe kitautolu ʻi he hoko ʻo maʻu fakataha maʻu pē.—Luke 6:40; Fili. 3:17.
11 Vahevahe atu ha fakamatala feʻunga fekauʻaki mo e ngaahi fakatahá pea mo e founga ʻoku fakahoko ai kinautolú, koeʻuhi ʻe ongoʻi fiemālie ai ʻa e tokotaha akó ʻi he taimi te ne fuofua haʻu ai ki he fakatahá. Koeʻuhi ko e kakai ʻe niʻihi ʻoku nau ongoʻi hohaʻa ʻi he taimi ʻoku nau ʻalu ai ki ha ngaahi feituʻu ʻi he ʻuluaki taimí, ʻoku faʻa lelei ange ke kaungā ʻalu fakataha mo e tokotaha akó ki he Fale Fakatahaʻangá ʻi he taimi ʻokú ne ʻuluaki haʻu ai ki he fakatahá. Te ne ongoʻi tauʻatāina ange ai kapau ʻokú ke ʻi ai fakataha mo ia ʻi heʻene feʻiloaki mo e ngaahi mēmipa ʻo e fakatahaʻangá. Mahulu angé, hoko ko ha tokotaha talitali kakai lelei ki hoʻo tokotaha ʻaʻahí, ʻai ia ke ne ongoʻi lata pea talitali lelei ia.—Mt. 7:12; Fili. 2:1-4.
12 Fakalototoʻaʻi ʻa e tokotaha akó ke ne haʻu ki he ʻaho ʻasemipilī makehé, ʻasemipilī fakafeituʻú, pe fakataha-lahi fakavahé ʻi he ʻuluaki faingamālié. Mahalo ʻe lava ke fakakau atu ia ʻi he ngaahi fokotuʻutuʻu ki hoʻo fefonongaʻakí.
13 Fakatupulekina ha Houngaʻia Loloto: ʻOku fakamatalaʻi ʻi he peesi 92 ʻo e Organized to Accomplish Our Ministry: “Kapau ko hoʻo houngaʻia ʻaʻau ki he kautaha ʻa Sihová ʻoku tapua atu ia ʻi hoʻo fetalanoaʻaki mo e kakai mahuʻingaʻiá, ʻe faingofua ange ai kiate kinautolu ke nau tupulekina ʻi he houngaʻia pea ʻe ueʻi ai kinautolu ke nau fai ha fakalakalaka lahi ange ʻi hono ʻiloʻi ʻa Sihová.” Leaʻaki maʻu pē ʻa e meʻa ʻoku paú, kae ʻikai ko e taʻepaú, ʻi he fekauʻaki mo e fakatahaʻanga ʻi ho feituʻú. (Sāme 84:10; 133:1, 3e) ʻI he ngaahi lotu ʻokú ke fai ʻi he ako Tohitapú, lave ki he fakatahaʻangá pea ki he fiemaʻu ʻa e tokotahá ke ne feohi maʻu pē mo iá.—Ef. 1:15-17.
14 ʻOku tau fiemaʻu moʻoni ʻa e faʻahinga foʻoú ke nau fakatupulekina ha houngaʻia loloto ki he feohi fiefia pea mo e maluʻanga fakalaumālie ʻoku maʻu ʻi he lotolotonga ʻo e kakai ʻa e ʻOtuá. (1 Tim. 3:15; 1 Pita 2:17; 5:9) ʻI he tuʻunga ko e Kau Fakamoʻoni ʻa Sihová, tau fai ʻa e meʻa kotoa te tau malava ke faí ke tataki ʻa e kau ako ʻo e Folofola ʻa e ʻOtuá ki he kautaha ʻoku fakafofongaʻi ʻe hotau hingoá.
[Fakamatala ʻi he peesi 3]
ʻOku fakalakalaka fakalaumālie vave ange ʻa e kau akó ʻi he taimi ʻoku nau fakamoʻoniʻi ai ʻe kinautolu tonu ʻa e kautahá
[Fakamatala ʻi he peesi 4]
ʻOua ʻe toloi ʻa hono fakaafeʻi ʻa e kau akó ke haʻu ki he ngaahi fakatahá