Ko ha Fakamoʻoni Taimi-Kakato Koe?
1 Te ke tali ʻio ki he fehuʻi ko ʻení? Neongo ʻe ʻikai lava ke kau kotoa ʻa e kau sevāniti ʻosi fakatapui ʻa Sihová ki he ngāue fakafaifekau taimi-kakató, ʻikai ʻoku ʻuhinga lelei ke ʻamanekina ko e kotoa ʻo kitautolú ʻoku totonu ke tau vakai kiate kitautolu ko ʻene Kau Fakamoʻoni taimi-kakato? Ko hono moʻoní ʻoku totonu ke tau pehē.
2 ʻOku ʻikai ke ʻi ai ha meʻa pehē ia ko ha Kalisitiane fakataimi pē. Naʻe pehē ʻe Sīsū fekauʻaki mo ʻene Tamaí: “ʻOku ou fai maʻuaipē ʻa e ngaahi meʻa ʻoku ne hōhōʻia ai.” (Sione 8:29) Naʻe ongoʻi pē ʻe Paula ʻa e founga tatau, ʻo enginaki mai kiate kitautolu ke “fai kotoa pe ke ongoongolelei ai ʻa e ʻOtua.” (1 Kol. 10:31) Ko ia, ʻi he ʻuhinga fakalūkufuá, ko e kotoa ʻo kitautolú ʻoku totonu ke tau lau kitautolu ko e Kau Fakamoʻoni taimi-kakato ʻa Sihova. Ko ʻetau fakakaukau ʻi he founga ko ʻení, te ne tākiekina ai kitautolu ki he leleí ʻi he ngāue kotoa pē ʻoku tau tuli ki aí.
3 Fakakaukau ki ha Fakamoʻoni: Ko hotau fōtungá, leá, mo e ʻulungaangá ʻe lava ke hā atu ai ki he kakai kehé ko e moʻoni ko kitautolú ko e Kau Fakamoʻoni ʻa Sihova. ʻOku tau tokangataha ki he fiemaʻu ki ha fōtunga fakanānā, lea lelei, pea ʻulungaanga taau ʻi ha taimi pē ʻoku tau kau ai ki he ngāue fakamalangá pe ko hono maʻu ʻa e ngaahi fakataha faka-Kalisitiané. Kae kehe, pe ʻoku tau ʻalu ki he akó, ngāue ʻi ha ngāue fakamāmani, pe kau ʻi ha fakafiefia, ko e meʻa kotoa pē fekauʻaki mo kitautolú ʻoku totonu ke ne ʻoatu ha fakamoʻoni ʻoku tau moʻui ʻo fakatatau ki he ngaahi tuʻunga māʻoniʻoni ʻa Sihová.
4 Naʻe pehē ʻe Sīsū: “Ko e kolo ʻoku tuʻu ʻi ha fuga moʻunga ʻoku ʻikai te ne lava ke puli. . . . Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.” (Mt. 5:14-16) ʻOku totonu ke hoko ʻo moʻoni ʻeni ʻi he meʻa kotoa pē ʻoku tau faí pea ʻi he taimi kotoa pē. Kapau ʻoku tau ʻilo ʻoku tau toumoua ke fai ha fakamoʻoni koeʻuhi ko e tuʻunga ʻoku tau ʻi aí pe ko e meʻa ʻoku tau faí, ʻoku fiemaʻu ke tau ʻeke hifo kiate kitautolu, ‘ʻOku ou tauhi kia Sihova fakataimi pē pe taimi-kakato?’ ʻOfa ke ʻoua te tau teitei fakataleʻi ha faingamālie ke talanoa ai ki he niʻihi kehé fekauʻaki mo e ongoongo lelei ʻo e Puleʻanga ʻo e ʻOtuá.
5 Manatuʻi, ʻoku tau fakaʻapaʻapa pea fakahōifuaʻi ʻa Sihova ʻi he taimi ʻoku lava ai ke tau tali ʻa e fehuʻi, “Ko ha Fakamoʻoni taimi-kakato koe?” ʻaki ha “ʻIo!” leʻo-lahi.