Ko e Hā Te Ke Leaʻaki ki ha Mīsini Tali?
Ko e telefoní ko ha founga ola lelei ia ʻo e faifakamoʻoni ki he kakai ʻoku ʻikai ke maʻu ʻi ʻapí pe ʻoku nau nofo ʻi he ngaahi feituʻu ʻoku ʻikai ke ala fai ha aʻu ki aí. Kae kehe, ʻoku lahi mo lahi ange ʻa e kakai ia ʻoku ʻikai te nau tali ʻa e telefoní—ʻoku fai ia maʻanautolu ʻe ha mīsini tali. ʻI he taimi ʻoku hoko ai ʻení, ko e hā ʻe lava ke ke faí? ʻOua te ke tāpuniʻí. Kae, ʻai ha tali ʻosi hiki ʻoku teuteuʻi lelei ʻa ia te ke lava ʻo lau atu ʻi he telefoní. ʻAhiʻahiʻi ia ʻi ha leʻo fiemālie, mo ha leʻo ʻoku anga-fakafetalanoaʻaki. Ko e hā ʻe lava ke ke leaʻakí?
Te ke lava ke fakaaʻu atu ha fakaafe loto-māfana ki he tokotaha-ʻapí ke ne maʻu ʻa e Malanga Maʻá e Kakai hono hoko maí ʻi he Fale Fakatahaʻangá. Te ke pehē nai: “ʻOku ou kole fakamolemole atu ʻi he ʻikai te u maʻu atu koe ki ho ʻapí. Kapau te ke saiʻia ke fanongo ʻi he malanga makatuʻunga ʻi he Tohitapu ko e [kaveinga ʻo e malanga maʻá e kakaí], kātaki ʻo haʻu ki he Fale Fakatahaʻanga ʻa e Kau Fakamoʻoni ʻa Sihová. ʻOku fakaafeʻi ki ai ʻa e kakaí. ʻOku ʻikai ʻaupito ha tānaki paʻanga ai.” Pea fakahaaʻi mahino leva ʻa e ʻaho mo e taimi ʻo e fakatahá, pea ʻoatu mo e tuʻasila ʻo e halá pe fakamatalaʻi ʻa e feituʻu ʻoku ʻi ai ʻa e Fale Fakatahaʻangá.
Tokanga ki ha faʻahinga foʻou pē ʻoku nau maʻu nai ʻa e ngaahi fakatahá, fakafeʻiloaki koe kiate kinautolu, pea ʻai ke nau ongoʻi ʻoku talitali lelei kinautolu. ʻOua naʻa ngalo ke tuʻuaki ange ha ako Tohitapu taʻetotongi ʻi ʻapi!