Ko e Moʻoni Fekauʻaki mo e Kahaʻú
Kuo faifai ange peá ke fifili pe ko e hā ʻoku tuku tauhi mai ʻe he kahaʻú? ʻOku fakahaaʻi mai ʻe he Tohi Tapú ʻo fekauʻaki mo ha ngaahi meʻa mahuʻinga ʻe vavé ni ʻene hoko ʻa ia ʻe uesia ai ʻa e kakai kotoa ʻi he māmaní.
Naʻe fakamatalaʻi ʻe Sīsū ʻa e founga ʻe lava ai ke tau “ʻiloʻi leva ʻoku ofi ʻa e Puleʻanga ʻo e ʻOtuá.” (Luke 21:31) Naʻá ne kikite, ʻi he lolotonga ʻo e ngaahi meʻá, ʻe ʻi ai ha ngaahi tau, ngaahi mofuike lalahi, nounou fakameʻatokoni, mo e ngaahi mahaki fakaʻauha—ʻa e meʻa tofu pē ko ia ʻoku tau mātā tonu ai ʻi he ʻaho ní.—Luke 21:10-17.
ʻOku tala mai ʻe he Tohi Tapú ko e meʻa ʻe taha ʻe hoko lolotonga ʻa e “ngaahi ʻaho fakaʻosí” ʻo e tuʻunga-pule ʻa e tangatá ko e kakaí te nau anga-kovi. Te ke lau ʻa e fakamatala fekauʻaki mo iá ʻi he 2 Tīmote 3:1-5. ʻI hoʻo sio ki he tōʻonga mo e ngāue ʻo e ʻaho ní, ʻoku ʻikai ha veiveiua ʻokú ke loto-tatau mo e kikite ko eni ʻa e Tohi Tapú ʻoku hoko tofu pē ia ʻi he taimí ni.
ʻOku ʻuhinga nai eni ki he hā? ʻOku ofi ʻa e taimi ke fai ai ʻe he Puleʻanga ʻo e ʻOtuá ha ngaahi liliu lahi ʻa ia ʻe hoko ai ʻa e māmaní ʻo toe lelei ange. (Luke 21:36) ʻI he Tohi Tapú, ʻoku talaʻofa ai ʻa e ʻOtuá ki ha ngaahi meʻa lelei ki he foʻi māmaní mo e kakai te nau nofo aí. Ko ha fakatātā eni ʻe niʻihi.
TUʻUNGA-PULE LELEI
“Pea naʻe ʻoange kiate ia [Sīsū] ʻa e tuʻunga-pule, mo e lāngilangi, mo ha puleʻanga, koeʻuhí ke tauhi kotoa kiate ia ʻa e ngaahi kakai, ngaahi puleʻanga mo e ngaahi kakai lea kehekehe. Ko hono tuʻunga-pulé ko ha tuʻunga-pule taʻengata ʻa ia ʻe ʻikai ke mole atu, pea ko hono puleʻangá ʻe ʻikai ke fakaʻauha.”—TANIELA 7:14.
Meʻa ʻoku ʻuhinga ki aí: ʻOku lava ke ke fiefia ʻi he malumalu ʻo e founga-pule fakamāmani lahi ʻa ia ʻoku fokotuʻu ʻe he ʻOtuá fakataha mo hono ʻAló ke hoko ko ha Tuʻi.
MOʻUI LELEI
“Pea ʻe ʻikai ha taha ʻoku nofo ai te ne pehē: ‘ʻOku ou puke.’”—ʻAISEA 33:24.
Meʻa ʻoku ʻuhinga ki aí: Heʻikai ʻaupito te ke toe puke pe faingataʻaʻia fakaesino; te ke moʻui taʻengata ʻo ʻikai toe mate.
MELINO MOʻONI
“ʻOkú ne fakangata ʻa e ngaahi taú ʻi he māmaní kotoa.”—SAAME 46:9.
Meʻa ʻoku ʻuhinga ki aí: Heʻikai ʻaupito ke toe ʻi ai ha fakamanamana ʻo e taú mo e ngaahi faingataʻa ʻoku hoko aí.
ʻE FONU ʻA E MĀMANÍ ʻI HE KAKAI LELEI
“ʻE ʻikai toe ʻi ai ʻa e kau fulikivanú . . . Ko e anga-vaivaí te nau maʻu ʻa e māmaní.”—SAAME 37:10, 11.
Meʻa ʻoku ʻuhinga ki aí: Heʻikai ke toe ʻi ai ha kakai kovi, ko e kakai pē ʻoku nau vēkeveke ke talangofua ki he ʻOtuá.
KO E MĀMANÍ KOTOA ʻE HOKO KO E PALATAISI
“Te nau langa fale pea nofo ai, pea te nau tō ngoue kālepi pea kai ʻa hono fuá.”—ʻAISEA 65:21, 22.
Meʻa ʻoku ʻuhinga ki aí: Ko e māmaní kotoa ʻe hoko ʻo fakaʻofoʻofa. ʻE fakahoko ʻe he ʻOtuá ʻetau lotu ke fai hono finangaló “ʻi māmani.”—Mātiu 6:10.