Feingangāue Makehe ke Tufaki ʻa e Polosiua Foʻoú
1 ʻOku tokolahi ʻa e kakai he ʻahó ni ʻoku fakahohaʻasi kinautolu ʻe he ngaahi tuʻunga ʻo e māmaní, ka ko e niʻihi tokosiʻi pē ʻoku nau mahinoʻi ʻa e ʻuhinga ʻoku ʻi he tuʻunga pehē ai ʻa e ngaahi meʻá, ko e hā ʻa e meʻa ʻoku tuʻu mei muʻá pea mo e meʻa kuo pau ke nau fai kae lava ke nau hao moʻui atu ai ʻi he fakamaau ka hoko maí. (Isi. 9:4) Ke tokoniʻi kinautolu ke nau lāuʻilo ki he mahuʻinga ʻo hotau taimí, ʻe fakahoko ha feingangāue makehe ke tufaki ai ʻa e polosiua foʻou ko e Hanganaki Leʻo! mei he Mōnite ʻo Fepueli 21 ki he Sāpate ʻo Maʻasi 20.
2 ʻE tuʻuaki nai ʻa e polosiuá lolotonga ʻa e kau ki he ngāue fakafaifekau fale-ki-he-falé, ʻi he fai ʻa e ngaahi toe ʻaʻahí, ʻi he faifakamoʻoni ʻikai ʻi he founga anga-mahení pe ʻi he feituʻu kakaí. Kae kehe, ʻoku ʻikai totonu ke tufa tavale ʻa e Hanganaki Leʻo! ʻI hono kehé, ʻe tuku pē ʻa e ngaahi polosiuá ʻi he faʻahinga ʻoku nau fakahaaʻi ʻa e mahuʻingaʻia ʻi he meʻa ʻoku leaʻaki ʻe he Tohi Tapú ʻo fekauʻaki mo e ʻuhinga ʻo e ngaahi meʻa ʻoku hoko ʻi māmaní. Ko e faʻahinga ko ia ʻoku nau fakahaaʻi ʻa e mahuʻingaʻia siʻisiʻi ʻi he pōpoakí ʻe tuʻuaki pē nai kia kinautolu ha tuleki.
3 Te ke maʻu nai ʻa e tokanga ʻa ha tokotaha ʻaki hoʻo pehē:
◼ “ʻOku tokolahi ʻa e kakai ʻoku nau hohaʻa fekauʻaki mo e ngaahi palopalema mafatukituki pea mo e ngaahi meʻa fakaʻohovale ʻoku hoko he ʻaho ní. [Lave ki ha fakatātā ʻoku ʻiloʻi fakalotofonua.] Naʻá ke ʻiloʻi ko e ngaahi meʻa peheé naʻe tomuʻa tala ia ʻi he Tohi Tapú? [Tuku ke ne tali. Pea lau leva ʻa e konga Tohi Tapu ʻoku feʻungamālie ki he fakatātā naʻe lave ki aí, hangē ko e Mātiu 24:3, 7, 8; Luke 21:7, 10, 11; pe 2 Timote 3:1-5.] ʻOku fakahaaʻi ʻe he Tohi Tapú ʻa e ʻuhinga ʻo hotau taimí mo e meʻa ʻoku hanga mai mei muʻa ki he faʻahinga ʻo e tangatá. Te ke saiʻia ke ʻilo lahi ange ki ai? [Tuku ke ne tali. Tuʻuaki ʻa e polosiuá kapau ʻoku hā mai ha mahuʻingaʻia loto-moʻoni.] ʻOku ala maʻu taʻetotongi ʻa e polosiuá. Kapau ʻokú ke holi ke fai ha kiʻi tokoni ki heʻemau ngāue fakaemāmani lahí, te mau fiefia ke tali lelei ia.”
4 Pe te ke ʻiloʻi nai ʻoku ola lelei ʻa e fakaofiofi ko ení:
◼ “ʻOku fakalotomafasiaʻi ʻa e tokolahi he ʻahó ni ʻe he ngaahi meʻa fakaʻohovale ʻoku hokó pe ko ha mole lahi fakafoʻituitui. ʻOku fifili ʻa e niʻihi pe ko e hā ʻoku ʻikai ke kau mai ai ʻa e ʻOtuá ke fakangata ʻa e ngaahi meʻa peheé. ʻOku fakapapauʻi mai ʻe he Tohi Tapú kiate kitautolu kuo vavé ni ke ngāue ʻa e ʻOtuá ke fakafiemālieʻi ʻa e faingataʻaʻia ʻa e faʻahinga ʻo e tangatá. Fakatokangaʻi ange ʻa e ngaahi ʻaonga ʻe fakahoko mai ʻe he ʻOtuá ki he faʻahinga ʻo e tangatá. [Lau ʻa e Sāme 37:10, 11.] Te ke saiʻia ke ʻilo lahi ange ki ai?” Fakamulitukuʻaki hangē ko ia ʻoku fakahaaʻi ʻi ʻolungá.
5 Feinga ke ʻiloʻi ʻa e hingoa mo e tuʻasila ʻo e tokotaha taki taha ʻokú ne tali ha tatau ʻo e polosiuá, pea fokotuʻutuʻu ke toe foki ke fakatupulekina ʻa e mahuʻingaʻiá. Ko e ngaahi fokotuʻu ki he founga ʻe lava ke fakahoko ai ení ʻe hā ia ʻi he ʻīsiu ʻo ʻEtau Ngāue Fakafaifekau ʻo e Puleʻanga ʻo Maʻasi 2005. Kapau ʻe fakahaaʻi ʻe ha tokotaha ha mahuʻingaʻia lahi ʻi he ʻuluaki ʻaʻahí, te ke malava nai ke kamata leva ha ako Tohi Tapu ʻo ngāueʻaki ʻa e Hanganaki Leʻo! pe ko ha tohi kehe, hangē ko e polosiua Fiemaʻu.
6 Ko e ngaahi tatau ʻo e polosiua foʻoú ʻe ala maʻu ia ʻi he hili pē ʻa e Fakataha Ngāue ʻa ia ʻe fai ai ʻa e lāulea ki he kupu ko ení. ʻOku fokotuʻu atu ke ʻuluaki ʻave ʻe he kau malangá mo e kau tāimuʻá ʻa e lahi feʻunga pē te nau fiemaʻu ki he ʻuluaki ngaahi ʻaho ʻo e feingangāué. ʻOfa ke faitāpuekina ʻe Sihova ʻa e ngāue makehe ko ení ki hono fakalāngilangiʻí pea ke maʻu ʻaonga ai ʻa e faʻahinga loto-totonú ʻi he feituʻu kotoa pē.—Sāme 90:17.