Puha Fehuʻi

◼ ʻOku taau nai ke tātānaki ʻa e ngaahi fakamatala ʻa ia ʻe fakahoko mai ʻi he Ako Fakafaifekau Fakateokalatí ʻo tufaki ki he niʻihi kehé?

ʻOku ngofua ke fai eni ki hono ngāueʻaki fakafoʻituitui pē ʻe he ngaahi mēmipa ʻo e fāmilí pea mo ha ngaahi kaungāmeʻa ofi ʻe niʻihi. Kae kehe, ko e ngaahi fakamatala peheé ʻoku ʻikai totonu ke ʻai ke ala maʻu ia ki hano tufaki fakalūkufua pe fakatau atu, he ʻe maumauʻi ai ʻa e ngaahi lao ki he mafai ʻo hono tufaki ha meʻa.—Loma 13:1.

ʻOku ʻi ai ʻa e ngaahi konga pau ʻi he Ako Fakafaifekau Fakateokalatí, ko e kaveingá pē ʻoku ʻomaí; ʻoku ʻikai fakahaaʻi ai ha maʻuʻanga fakamatala ia. ʻE ʻaonga nai ki ha tokotaha ke ne hiki ha lisi ʻo e ngaahi maʻuʻanga fakamatalá pe tātānaki ʻa e maʻuʻanga fakamatala ʻe lava ke ngāueʻaki ʻe he faʻahinga ʻoku nau maʻu ʻa e ngaahi konga ko iá? ʻIkai. ʻOku ʻikai foki totonu ke tātānaki ʻa e ngaahi tali ki he ngaahi fehuʻi ʻi he Fakamanatu Ako Fakafaifekau Fakateokalatí ke ngāueʻaki ʻe he niʻihi kehé, koeʻuhí ʻe ʻikai ke tokoniʻi ai kinautolu ke nau manatuʻi ʻa e ngaahi poini mahuʻingá. ʻOku totonu ke fai ʻe he kau akó ʻenau fekumi pē ʻanautolu. Ko ha tafaʻaki mahuʻinga eni ʻo e founga fakafaiako ʻoku ʻomi ʻe Sihová ʻo fakafou mai ʻi he ako ko ení ke tokoniʻiʻaki kitautolu ke tau lea ʻaki ʻa e “ʻelelo ʻo e tama ako.”—Ai. 50:4.