Ngāueʻaki Pōtoʻi ʻa e Tohi Tapú
1. Ko e hā ʻoku ʻaonga ʻaupito ai ʻa e Tohi Tapú?
1 Ko hono ngāueʻaki pōtoʻi ko ia ʻa e Folofola fakamānavaʻi ʻa e ʻOtuá ʻoku fakamafeia ai kitautolu ke tau talaki mo akoʻi ke mahino ʻa e moʻoní pea fakaeʻa ai ʻa e akonaki mo e talatukufakaholo hala ʻa e tangatá.—2 Tim. 2:15; 1 Pita 3:15.
2. Ko e hā te ne tokoniʻi kitautolu ke tau pōtoʻi ange ʻi hono kumi ʻa e ngaahi konga Tohi Tapú?
2 Maheni Lelei Ange mo e Tohi Tapú: Hangē pē ko hono ngāueʻaki ha faʻahinga meʻangāue pē, ʻoku maʻu ʻa e pōtoʻí ʻi he maheni lelei ange mo ia. Ko hono lau mei he kamata ki heʻene ʻosi ʻa e Tohi Tapú ʻoku ʻoatu ai ʻa e fakakaukau fakalūkufua ki he kaveinga ʻo e Tohi Tapú. ʻOku toe tokoni eni kia koe ke ke manatuʻi mo kumi ngofua ange ʻa e ngaahi konga Tohi Tapú. ʻI hoʻo toe maheni lelei ange mo e Tohi Tapú, te ke lea faivelenga ange mo tuipau lahi ange ʻi hoʻo faifakamoʻoni ki he niʻihi kehé ʻi he founga ʻikai anga-mahení pea ʻi he ngāue fakafaifekaú.—1 Tes. 1:5.
3, 4. (a) Ko e hā ʻa e founga ʻe niʻihi ʻe lava ke tau maheni lelei ange ai mo e Tohi Tapú? (e) Kuó ke ngāueʻaki ha founga kehe ke hoko ʻo maheni lelei ange ai mo e Tohi Tapú?
3 ʻAi ke ke angaʻaki ʻa hono fakaava hoʻo Tohi Tapú pea muimui ai lolotonga ʻa e ngaahi fakataha ʻa e fakatahaʻangá. ʻI hoʻo fai ʻa e ako fakafoʻituituí mo teuteu ki he ngaahi fakataha ʻa e fakatahaʻangá, kumi ʻa e konga Tohi Tapu ʻoku haá pea fakalaulauloto ki hono ngāueʻakí. ʻOku ʻiloʻi ʻe he tokolahi ko hono lau fakahangatonu ʻa e konga Tohi Tapú mei he Tohi Tapú kae ʻikai mei ha komipiutá pe lauʻipepa kuo pulusí ʻe faingofua ange ai hono kumi ʻamui ange ʻo ka fiemaʻu ʻi he ngāue fakafaifekaú.—Sione 14:26.
4 Kuo fokotuʻutuʻu ʻe he ngaahi fāmili ʻe niʻihi ha taimi ke nau ako maʻuloto ai ʻa e ngaahi konga Tohi Tapú. ʻE fai nai eni ʻaki hono ngāueʻaki ʻa e fanga kiʻi kaati ʻoku hā ʻa e konga tohí he tafaʻaki ʻe taha pea hā ʻa e fakalea pē ʻo e vēsí ʻi he tafaʻaki ʻe tahá. ʻOku nau taufetongi leva ʻi hono ngāueʻaki eni ke sio pe ʻe lava ke nau fakalea ʻa e veesi Tohi Tapú pe fakamanatuʻi ʻa e feituʻu ʻoku ʻasi aí. Ko hono ʻahiʻahiʻi ʻa e ngaahi tuʻuaki ki he ngāue fakamalangá pea mo hono tali ha fakafepakí pe ko ha fehuʻi ʻo ngāueʻaki ʻa e Tohi Tapú ʻoku toe fakatupulekina ai ʻetau pōtoʻí.
5. Ko e hā ʻoku tau loto ai ke fakalahi ʻetau pōtoʻi ʻi hono ngāueʻaki e Tohi Tapú?
5 ʻOku ʻikai ha toe tohi ʻe ʻaonga ange he Tohi Tapú. ʻOku ʻi ai pē ʻa e ngaahi hiki tohi ʻoku malava ke “fakapoto [ai ʻa e kakaí] ke maʻu ʻa e fakamoʻui.” (2 Tim. 3:15) Koeʻuhi ʻoku tokolahi e kakai ʻi hotau feituʻú ʻoku ʻikai te nau alāanga mo e ngaahi koloa maʻongoʻonga ʻoku maʻu ʻi he Tohi Tapú, ʻoku ʻi ai e ʻuhinga lelei ke fakalahi ai ʻetau pōtoʻi ʻi hono fakahaaʻi kia kinautolu ʻa e meʻa moʻoni ʻoku ʻomai ʻi he Tohi Tapú.—Pal. 2:1-5.