Meʻa ke Leaʻaki Fekauʻaki mo e Ngaahi Makasiní
Ko e Taua Leʻo ʻEpeleli-Sune
“Kuo lotu ʻa e tokolahi ke hoko mai ʻa e Puleʻanga ʻo e ʻOtuá. Ko e hā ʻa e Puleʻanga ko iá? Ko e hā naʻe akoʻi ʻe Sīsū fekauʻaki mo e Puleʻangá? [Lau ʻa e Luke 8:1.] Ko e kupu ʻoku kamata ʻi he peesi 8 ʻo e ʻīsiu makehe ko ení, ʻoku fakamatala ai ki he taimi ʻe hoko mai ai ʻa e Puleʻanga ʻo e ʻOtuá, pea mo e meʻa ʻe fai ʻe he Puleʻangá ki he faʻahinga ʻo e tangatá pea mo e māmaní.”
ʻĀ Hake! ʻEpeleli-Sune
“ʻI he tenge ʻoku fai ki he ngaahi fāmilí he ʻaho ní, ko e hā ʻa e founga ʻe taha ʻe lava ke ʻai ai ke mālohi ʻa e moʻui fakafāmilí? ʻOku fokotuʻu mai ʻe he kau faifaleʻi tokolahi ke kai fakataha ʻa e ngaahi fāmilí ʻo ʻikai siʻi hifo he houa kai ʻe tahá ʻi he ʻaho taki taha. ʻOku ʻi he kupu ko eni ʻi he peesi 19 ʻa e ngaahi fokotuʻu lelei ʻaupito mo e ngaahi tokoni.”
Ko e Taua Leʻo Siulai-Sepitema
“ʻOku ʻamanaki ʻa e kakai tokolahi ke nau ō ki hēvani ʻi he taimi te nau mate aí. ʻOku fakamānako kiate koe ʻa e ʻamanaki ko iá? [Tuku ke ne tali.] Fakatokangaʻi ange ʻa e meʻa ʻoku leaʻaki ʻe he Tohi Tapú ʻe hoko ko e pale ki he tokolahi taha ʻo e kakai leleí. [Lau ʻa e Sāme 37:29.] ʻOku sivisiviʻi ʻe he makasini ko ení ʻa e meʻa ʻoku leaʻaki ʻe he Tohi Tapú fekauʻaki mo e faʻahinga ʻe ō ki hēvaní pea mo e meʻa te nau fai aí.”
ʻĀ Hake! Siulai-Sepitema
“ʻE saiʻia ʻa e tokolahi ke tuku ifi ka ʻoku nau ʻiloʻi ʻoku faingataʻa ʻaupito ke fai pehē. ʻOkú ke ʻiloʻi ha taha ʻe saiʻia ke tuku ʻene ifí? [Tuku ke ne tali.] Kuo ʻiloʻi ʻe he niʻihi ʻoku ʻaonga ke fakakau ki ai ʻa e poupou ʻa e kaungāmeʻá mo e fāmilí. [Lau ʻa e Koheleti 4:12a.] ʻOku fakahaaʻi ʻi he makasini ko ení ʻa e ngaahi fokotuʻu ʻaonga ke tokoniʻi ai ha taha ke tuku ʻene ifí.”