Ko ha Ngāue Mātuʻaki Fakafiefia
1. Ko e hā e ngāue fakamoʻui fakalaumālie ʻoku lolotonga hoko ʻi hotau taimí?
1 Naʻe fonu honau ngaahi lotó he fiefia lahi ʻi he mamata tonu ki he fakamoʻui fakaesino ʻi he ʻuluaki senitulí. (Luke 5:24-26) ʻI hotau taimí, ʻoku tau fiefia ʻi he ngāue ʻo e fakamoʻui fakalaumālié. (Fkh. 22:1, 2, 17) He meʻa fakafiefia moʻoni ke lau ʻa e ngaahi hokosia hono liliu ʻe he Folofola ʻa Sihová mo e laumālie māʻoniʻoní ʻa e ngaahi moʻui ʻa e faʻahinga tāutaha! Kae kehe, ko e toe meʻa fakafiefia angé, ko e kau atu ki he ngāué ni ʻaki hono fakahoko ha ako Tohi Tapu fakalakalaka.
2. Ko e hā e fiefia ʻe lava ke tau hokosia ʻi heʻetau akoʻi e moʻoní ki ha taha?
2 Ko hai e huafa ʻo e ʻOtuá? Ko e hā ʻokú ne fakaʻatā ai e faingataʻá? Ko e hā ʻe fai ʻe he Puleʻanga ʻo e ʻOtuá maʻá e faʻahinga ʻo e tangatá? ʻOku tau maʻu ʻa e fiefia ʻikai ngata pē ʻi hono tali ʻo e ngaahi fehuʻi peheé kae toe pehē foki ki he sio ki he fiefia ʻoku tapua mai mei he tokotaha akó ʻi he taimi ʻokú ne ako ai ʻa e moʻoní. (Pal. 15:23; Luke 24:32) ʻI he taimi ʻoku fakalakalaka ai ha tokotaha ako, te ne kamata nai ke ne ngāueʻaki ʻa e huafa ʻo Sihová, fai ʻa e ngaahi liliu ʻi heʻene ʻai valá mo e teuteú, taʻofi e ngaahi tōʻonga fakatupu maumaú, pea kamata ke faifakamoʻoni ki he niʻihi kehé. Kapau ʻokú ne fakalakalaka ki he fakatapuí mo e papitaisó, te ne hoko ko hotau tokoua pea mo e kaungāngāue. Ko e ngaahi sitepu papau taki taha ko ení ko ha ʻuhinga ia ke fiefia ai.—1 Tes. 2:19, 20.
3. Ko e hā ʻa e ngaahi sitepu ʻaonga ʻe lava ke tau fou ai ke kamata ha ako Tohi Tapú?
3 ʻE Lava Ke Ke Kau Atu ai? Kapau te ke saiʻia ke kau ki he ngāue mātuʻaki fakafiefia ko ení, kole kia Sihova ki he monū ʻo hono fakahoko ha ako Tohi Tapú, pea ngāue ʻo fehoanaki mo hoʻo ngaahi lotú. (1 Sione 5:14) Malanga ʻi he feituʻu mo e taimi ʻe lava ke maʻu ai e kakaí. Tuʻuaki ha ako Tohi Tapu ʻi he taimi faingamālie kotoa pē. (Koh. 11:6) ʻI he taimi ʻokú ke maʻu ai ha mahuʻingaʻia pea tō ha tenga ʻo e moʻoní, foki ʻo fuʻifuʻi ia.—1 Kol. 3:6-9.
4. Ko e hā ʻoku totonu ai ke tau tuʻuaki ʻa e ako Tohi Tapú fakataha mo ha ongoʻi ʻo e fakavavevavé?
4 ʻOku taʻefaʻalaua e kakai ʻoku nau kei nofo ʻo fiekaia mo fieinua ki he māʻoniʻoní. Ko hai te ne fakamākona ʻenau fiemaʻu fakalaumālié ʻaki hono fakahoko ha ako Tohi Tapu mo kinautolu? (Mt. 5:3, 6) Tau ʻoatu loto-lelei kitautolu ke tokoni ki hono fakakakato ʻo e ngāue fakamalangá mo e ngaohi ākongá ki muʻa ke ngata e utu-taʻú.—Ai. 6:8.