Naʻá Ke Tāimuʻa Tuʻumaʻu ki Muʻa?
1. Ko e hā ʻa e monū kuo fiefia ai ʻa e tokolahi, ka ko e hā kuo hoko ʻo fiemaʻu ki he niʻihi?
1 ʻI he faai mai ʻa e ngaahi taʻú, kuo fiefia ʻa e laui afe ʻi he monū ʻo e “faiakó mo ʻenau fanongonongo ʻa e Ongoongo Lelei” ko e kau faifekau taimi-kakato. (Ngāue 5:42, Ko e Taulua) Kae kehe, ko e niʻihi naʻe pau ke taʻofi ʻenau tāimuʻá ʻi he ngaahi ʻuhinga kehekehe. Kapau ko ha tāimuʻa tuʻumaʻu koe ki muʻa, kuó ke vakaiʻi ho ngaahi tuʻunga lolotongá ke sio pe ʻe lava ke ke toe kau ki he ngāue tāimuʻá?
2. Ko e hā ʻoku totonu ai ki he faʻahinga naʻa nau tāimuʻa ʻi he kuohilí ke fakakaukau lelei ki honau ngaahi tuʻunga lolotongá?
2 Liliu ʻa e Ngaahi Tuʻungá: Mahalo pē ko e tuʻunga naʻá ne fakatupunga koe ke tuku hoʻo tāimuʻá ʻoku ʻikai kei hoko. Ko e fakatātaá, kapau naʻe taʻofi hoʻo tāimuʻá koeʻuhi naʻe ʻikai lava ke aʻusia ʻa e fiemaʻu houa ʻe 90 ki he māhiná, ʻe lava ke ke toe hoko atu ʻi he taimí ni he ko e fiemaʻú kuo holoki ki he 70? Kuo siʻisiʻi ange hoʻo ngaahi fiemaʻu ke ngāué pe ngaahi fatongia fakafāmilí talu mei hoʻo mavahe mei he ngāue tāimuʻá? Ko ha tuofefine ʻe taha ʻa ia naʻe tuku ʻene tāimuʻá ko e ngaahi ʻuhinga fakaemoʻuilelei naʻe malava ke ne toe hoko atu ʻi hono taʻu 89. Kuo teʻeki te ne toe ʻi he falemahakí ʻo laka hake ʻi ha taʻu pea ʻokú ne ongoʻi ko ʻene tuʻunga moʻuí ʻe fakaʻatā ai ia ke ne toe tāimuʻa.
3. ʻE anga-fēfē nai ʻa e fāitaha ʻa e ngaahi mēmipa ʻo e fāmilí ke tokoniʻi ha taha ʻi honau fāmilí ke tāimuʻa?
3 Mahalo ʻoku ʻikai ko ha tāimuʻa koe ia ki muʻa, ka ko ha taha ʻi ho fāmilí naʻe tuku ʻene tāimuʻá ke fai hono tokangaʻi ha mēmipa ʻi he fāmilí, hangē ko ha mātuʻa kuo hoholo ʻo motuʻa. (1 Tim. 5:4, 8) Kapau ko ia, ʻe lava ʻe koe pe ko e niʻihi kehe ʻi he fāmilí ke fai ha meʻa lahi ange ke tokoni? Ko e hā ʻoku ʻikai ke mou lāulea fakataha ai ki he ngaahi meʻá? (Pal. 15:22) ʻI he taimi ʻoku fāitaha ai ʻa e ngaahi mēmipa ʻo e fāmilí koeʻuhi ke lava ha taha ʻia kinautolu ke tāimuʻá, ʻe lava ke nau ongoʻi totonu kotoa ʻoku nau kau atu ki ai.
4. Fēfē kapau ʻoku ʻikai ke ke lava ʻo toe kau ʻi he ngāue tāimuʻá ʻi he taimí ni?
4 ʻOua ʻe loto-siʻi kapau ko ho ngaahi tuʻunga lolotongá ʻoku ʻikai ke ne fakaʻatā koe ke toe hoko atu ʻa e tāimuʻá. Ko hoʻo mateuteu ko ia ke fai peheé ʻoku fakahōifua ia kia Sihova. (2 Kol. 8:12) Ngāueʻaki ʻa e ngaahi pōtoʻi kuó ke maʻu ko ha tāimuʻá ʻi hoʻo ngāue fakafaifekau lolotongá. ʻAi hoʻo holí ko ha meʻa ia ke lotu fekauʻaki mo ia, pea tokanga ki he ngaahi faingamālie ke fengaʻunuʻaki ai ho ngaahi tuʻungá. (1 Sione 5:14) Mahalo ʻi he faai mai ʻa e taimí, ʻe fakaava ai ʻe Sihova kiate koe “ha matapa lahi mo ʻaonga” koeʻuhi ke ke toe lava ai ʻo hokosia ʻa e ʻū fiefia ʻo e tāimuʻa tuʻumaʻú!—1 Kol. 16:9.