Fakahanga Fakapotopoto Hoʻo Ngaahi Tukí
1. ʻOku fēfē hono ngāueʻaki ʻa e 1 Kolinitō 9:26 ki he ngāue fakafaifekaú?
1 Naʻe tohi ʻa e ʻapositolo ko Paulá: “Ko e anga ʻo ʻeku lelé ʻoku ʻikai fai taʻefakapapauʻi; ko e anga ʻo ʻeku fakahanga ʻeku ngaahi tukí ʻoku fai ia ʻo ʻikai hangē ko ha tuki ki he ʻeá.” (1 Kol. 9:26) Ko e lave eni ʻa Paula ki heʻene fakakaukau huʻufataha mo e tokanga lahi ʻi he tuli ki he ngaahi taumuʻa fakalaumālié. Kae kehe, ʻi he tuʻu fakalūkufuá, ʻoku toe ngāueʻaki ʻa e ngaahi lea ko ení ki he ngāue fakafaifekaú. ʻOku tau loto ke fakahanga fakapotopoto ʻetau “ngaahi tukí,” pe ngaahi feingá, koeʻuhí ke lavaʻi ʻa e lelei tahá. ʻO anga-fēfē?
2. ʻE lava fēfē ke tau faʻifaʻitaki kia Paula mo e kau ʻevangeliō kehe ʻi he ʻuluaki senitulí ʻi hono fili ʻa e taimi mo e feituʻu ke malanga aí?
2 ʻAlu ki he Feituʻu ʻOku ʻi Ai ʻa e Kakaí: Naʻe malanga ʻa Paula mo e kau ʻevangeliō kehe ʻi he ʻuluaki senitulí ʻi he feituʻu naʻa nau ʻamanekina ʻe ʻi ai ʻa e kakaí. (Ngā. 5:42; 16:13; 17:17) Ko ia kapau ʻoku ʻi ʻapi ʻa e tokolahi ʻi hotau feituʻu ngāué he efiafí, ko e taimi lelei taha nai eni ke ʻalu ai mei he fale ki he falé. ʻOku moʻumoʻua pongipongia pe efiafia ʻa e tauʻanga pasí pe tauʻanga lēlué ʻi he ʻalu ʻa e kakaí ki he ngāué pe foki ki ʻapí? Ko fē ʻa e taimi ʻoku fonu ai e kakaí ʻi he ngaahi faiʻanga fakataú ʻi he feituʻu ngāué? ʻE ola lelei ʻaupito nai ʻa e faifakamoʻoni ʻi he halá lolotonga ʻa e ngaahi taimi ko ení.
3. ʻE lava fēfē ke tau fakahanga fakapotopoto ʻetau ngaahi tukí ʻi he founga ʻoku tau ngāueʻi ai hotau feituʻu ngāué?
3 Ngāueʻi Fakapotopoto ʻa e Feituʻu Ngāué: ʻOku totonu ke toe fai ha tokanga ki hono fakahanga fakapotopoto ʻetau ngaahi tukí ʻi he founga ʻoku tau ngāueʻi ai hotau feituʻu ngāué. Ko e fakatātaá, ʻi he ʻikai ke vaheʻi ha fuʻu kulupu tokolahi ki he feituʻu tatau, ʻa ia ʻe fiemaʻu ai ʻa e taimi mo e feinga lahi ke tauhi ʻa e kulupú ke maau mo moʻumoʻuá, ʻoku lelei ange nai ke vahevahe ʻa e kulupú. ʻI he tuʻunga meimei tatau, ʻi hono ngāueʻi ʻa e feituʻu ngāue ʻi ʻutá, te tau kāpui vave ange ʻa e feituʻu ngāué pea maʻu ha ngaahi faingamālie lahi ange ke lea kapau ʻoku ʻikai ke fuʻu tokolahi ʻa e ngaahi kulupu ʻi he kaá. ʻE lava ke maʻu hatau feituʻu ngāue fakafoʻituitui ofi ki hotau ʻapí, ʻa ia ʻe fakasiʻisiʻi ai ʻa e taimi ʻoku fiemaʻu ki he fefonongaʻakí?
4. Ko e hā te ne tokoniʻi kitautolu ke hoko ko e kau “toutai tangata” lavameʻa?
4 Naʻe fakahoa ʻe Sīsū ʻa e kau ʻevangelioó ki he kau “toutai tangata.” (Mk. 1:17) Ko e taumuʻa ʻa ha tangata toutai ʻoku ʻikai ko e toutai pē ka ke maʻu ha ika. Ko ia ai, ko e kau tangata toutai lavameʻá te nau ʻalu ki he feituʻu mo e taimi ʻoku nau ʻamanekina ai ke ʻi ai ʻa e iká, pea te nau kamata toutai ʻo ʻikai toe toloi. ʻIo, ʻoku nau fakahanga fakapotopoto ʻenau ngaahi feingá. ʻOfa ke tau fakahāhā ʻa e faʻa ngāue meimei tatau ʻi heʻetau ngāue fakafaifekaú.—Hep. 6:11.