ʻOua ʻe Taʻofi Koé—Ikuʻi ʻa e Ongoʻi Taʻefeʻungá
1. Ko e hā ʻoku toumoua ai ʻa e niʻihi mei hano tuʻuaki ha ako Tohi Tapú?
1 ʻOkú ke toumoua mei hano tuʻuaki ʻo ha ako Tohi Tapú koeʻuhi ʻoku ʻikai ke ke falala-pau ki hoʻo malava ke fakahoko ola lelei ha akó? ʻI ha taimi ko e kau sevāniti faitōnunga ʻi he kuohilí, hangē ko Mōsese mo Selemaiá naʻá na ongoʻi ʻoku ʻikai ke na taau ki heʻena vāhenga-ngāué. (ʻEki. 3:10, 11; 4:10; Sel. 1:4-6) Ko ia ai, ko e ngaahi ongoʻi peheé ʻoku anga-maheni pē ia. ʻE lava fēfē ke ikuʻi kinautolú?
2. Ko e hā ʻoku ʻikai totonu ai ke tau fiemālie ʻi hono fakangatangata ʻetau ngāue fakafaifekaú ki he ngāue matapā-ki-he-matapā pē kae tuku ʻa e ako Tohi Tapú ki he niʻihi kehé?
2 ʻOku totonu ke tau manatuʻi ʻoku ʻikai ʻaupito ke kole mai ʻe Sihova ke tau fai ha meʻa ʻoku fakalaka atu ʻi heʻetau malavá. (Saame 103:14) Ko ia ko hotau fatongiá ke “ngaohi ko e kau ākonga,” mo “akoʻi kinautolu,” ʻa e meʻa te tau lava ke fakahokó. (Māt. 28:19, 20) ʻOku ʻikai ko ha monū ia ʻoku ʻoange pē ʻe Sihova ki he kau taukei ʻaupitó pe kau talēnitiʻia taha ʻiate kitautolú. (1 Kol. 1:26, 27) Ko ia ai, ʻoku ʻikai totonu ke tau fiemālie ʻi hono fakangatangata ʻetau ngāue fakafaifekaú ki he ngāue matapā-ki-he-matapā pē kae tuku ʻa e ako Tohi Tapú ki he niʻihi kehé.
3. Kuo anga-fēfē hono ʻai kitautolu ʻe Sihova ke tau taau ke fakahoko ʻa e ngāue ako Tohi Tapú?
3 ʻAi ʻe Sihova Ke Tau Taau: Ko hotau tuʻunga taau ke ngaohi ākongá ʻoku haʻu meia Sihova. (2 Kol. 3:5) Fakafou heʻene kautahá kuó ne akoʻi kitautolu ki he moʻoni ʻo e Tohi Tapú naʻa mo e kau ako māʻolunga taha he māmaní ʻoku ʻikai ke nau ʻilo. (1 Kol. 2:7, 8) Kuó ne fakatolonga mai maʻa kitautolu ha lēkooti ʻo e ngaahi founga faiako ʻa e Faiako Lahí, ʻa Sīsū ke tau faʻifaʻitaki ki ai peá ne ʻomai ha fakahinohino hokohoko fakafou mai he fakatahaʻangá. Tānaki atu ki aí, kuo ʻikai tuku mai ʻe Sihova ke tau faʻu pē ʻe kitautolu ʻetau founga ki he ako Tohi Tapú. Kuó ne tokonaki mai ʻa e ngaahi meʻangāue hangē ko e tohi Akoʻi ʻe he Tohi Tapú ʻa ia ʻokú ne akoʻi ʻa e moʻoní ʻi ha founga ʻuhinga lelei mo mahinongofua. Ko e fakahoko ha ako Tohi Tapú ʻoku ʻikai nai faingataʻa ia ʻo hangē ko ʻetau fakakaukaú.
4. Ko e hā ʻoku lava ai ke tau falala-pau ʻe tokoniʻi kitautolu ʻe Sihová?
4 Ko Mōsese mo Selemaiá naʻá na malava ʻo fakahoko hona vāhenga-ngāué ʻi he tokoni ʻa Sihová. (ʻEki. 4:11, 12; Sel. 1:7, 8) ʻOku lava ke tau kole kia Sihova ke ne tokoniʻi foki mo kitautolu. Ko hono moʻoní, ʻi he taimi ʻoku tau fakahoko ai ha ako Tohi Tapu, ʻoku tau akoʻi ai ki ha taha ʻa e moʻoni fekauʻaki mo Sihová, ʻa ia ʻoku fakahōifua ʻi he vakai ʻa e ʻOtuá. (1 Sio. 3:22) Ko ia ai, ʻai ko hoʻo taumuʻá ia ke kau ʻi he ngāue ako Tohi Tapú, ko ha tafaʻaki fakafiefia mo fakafiemālie taha ia ʻi he ngāue fakafaifekaú.