Fakaleleiʻi ʻEtau Pōtoʻi ʻi he Ngāue Fakafaifekaú—Fakahāhā ʻa e Mahuʻingaʻia Fakafoʻituitui

ʻUhinga ʻOku Mahuʻinga Aí: Naʻe vakai fakafoʻituitui ʻa Sīsū ki he kakaí, pea naʻá ne fakahaaʻi anga-ʻofa ʻa e mahuʻingaʻia fakafoituituí ʻiate kinautolu. Ko e fakatātaá, ʻi he taimi ʻe taha naʻe ʻiloʻi ʻe Sīsū ha tangata tuli naʻe mā, ko ia naʻá ne fakamoʻui ia fakaekinaua pē mei he mamaʻó ke ʻoua ʻe sio mai ki ai e fuʻu kakaí. (Mk. 7:31-35) Naʻá ne fakahāhā ʻa e fakaʻatuʻi ki heʻene kau ākongá ʻaki ʻene ʻiloʻi honau ngaahi ngataʻangá pea ʻikai lomēkina kinautolu ʻaki ha ngaahi fakamatala lahi. (Sione 16:12) Neongo ʻene ʻi he tuʻunga fakahēvaní, ʻoku kei fakahaaʻi pē ʻe Sīsū ʻa e mahuʻingaʻia fakafoʻituituí. (2 Tīm. 4:17) ʻI hotau tuʻunga ko e kau muimui ʻo Kalaisi, ʻoku tau loto ke faʻifaʻitaki kiate ia. (1 Pita 2:21; 1 Sio. 3:16, 18) Tānaki atu ki ai, te tau hoko ʻo ola lelei ange ʻi heʻetau ngāue fakafaifekaú kapau ʻoku tau fakahāhā ʻa e fakaʻatuʻi ki he tokotaha-ʻapí pea fakatokangaʻi hono ngaahi tuʻungá, ko e ngaahi meʻa ʻokú ne mahuʻingaʻia pe hohaʻa ki aí. Ngalingali te ne hoko ʻo fanongo ange kapau ʻokú ne ongoʻi ʻoku ʻikai ko ʻetau ngāue pē ke talaki ʻa e pōpoakí pe tuku ha tohi; ʻi hono kehé, ʻoku tau mahuʻingaʻia fakafoʻituitui ʻiate ia.