Founga ʻe Lava ke Tokoniʻi Ai ʻe he Tohitapú ʻa e Faʻahinga ʻOku Puke he Suká
KO E mapuleʻi-kitá mo ha vakai fakatuʻamelie ʻoku mātuʻaki mahuʻinga ia tautefito ki he moʻui lelei mo e tuʻunga lelei ʻo e kakai ʻoku nau suká. Ka ke fakatupulekina ʻa e ngaahi ʻulungaanga peheé, ʻoku fiemaʻu ʻe he faʻahinga ʻoku puké ʻa e poupou hokohoko. Ko ia ai, ko e ngaahi mēmipa ʻo e fāmilí mo e ngaahi kaumeʻá ʻe ʻikai te nau loto ke fakataueleʻi ʻa e tokotaha suká ke ne kai ʻa e meʻakai ʻoku ʻikai leleí, ʻi ha pehē nai, ‘ʻE ʻikai hano maumau ʻo e kiʻi kai tuʻo taha ko ení.’ “ʻOku ou maʻu ʻa e poupou lelei mei hoku uaifí,” ko e lau ia ʻa Harry, ʻa ia ʻokú ne maʻu ʻa e mahaki mafú mo e suka Kalasi 2. “ʻOku ʻikai te ne tuku holo ʻa e ngaahi meʻakai ʻoku ʻikai totonu ke u kaí. Ka ʻoku ʻikai ke mahinoʻi ia ʻe he niʻihi, pea ʻoku ʻikai te nau ʻiloʻi ʻa e faingataʻa ke ʻoua ʻe kai iá ʻi he taimi ʻe niʻihi.”
Kapau ʻokú ke feohi maʻu pē mo ha tokotaha ʻokú ne maʻu ʻa e suká, manatuʻi ʻa e tefitoʻi moʻoni fakaʻofoʻofa ko eni ʻe ua ʻoku maʻu ʻi he Tohitapú: “Ke ʻoua naʻa kumi ʻe ha taha ʻene lelei aʻana, ka ko e lelei ʻa e taha,” pea “Ko ʻOfa . . . ʻoku ʻikai te ne kumi ʻene lelei aʻana.”—1 Kolinito 10:24; 13:4, 5.
Ko e faʻahinga kotoa ʻoku nau tokanga fekauʻaki mo ʻenau moʻui leleí—pe ʻoku nau maʻu ʻa e suká pe ʻikai—ʻoku fiemaʻu ke nau ngāueʻi ʻa hono mataʻofi ʻo e meʻakaí. ʻOku tokoni ʻa e Tohitapú ʻi he meʻá ni, he ʻokú ne fakahaaʻi ʻa e fiemaʻu kia kitautolu taki taha ke fakatupulekina ʻa e mapuleʻi-kitá. Kuó ke fakapapau ke fakatupulekina ʻa e ʻulungāngá ni ʻi hoʻo moʻuí? (Kaletia 5:22, 23) ʻOku lava ke hoko mai ʻa e tokoni lahi ange mei he ngaahi faʻifaʻitakiʻanga faka-Tohitapú, hangē ko ia ko e ʻapositolo Kalisitiane ko Paulá. “Naʻá ne maʻu ha tolounua tuʻumaʻu ʻi hono kakanó,” ko e lau ia ʻa ha tokotaha puke he suká, “neongo ia naʻá ne kei tauhi faitōnunga pē mo kakato ki he ʻOtuá. ʻE lava ke u pehē pē mo au!”
ʻIo, naʻe tali ʻe Paula ʻa e meʻa naʻe ʻikai lava ke ne liliú pea maʻu ʻa e lavameʻa lahi ʻi he tuʻunga ko ha misinalé. (2 Kolinito 12:7-9) Ko Dustin, taʻu 18, naʻá ne kui mei hono fanauʻí, pea naʻá ne maʻu ʻa e suká talu mei heʻene taʻu 12. ʻOkú ne tohi: “ʻOku ou ʻiloʻi ʻoku ʻikai ha taha ʻi he māmani ko ení ʻokú ne maʻu mātuʻaki haohaoa ʻa e meʻa kotoa pē. ʻOku ou fakatuʻotuʻa atu ki he taimi ʻi he māmani foʻou ʻa e ʻOtuá ʻa ia ʻe ʻikai te u maʻu ai ʻa e suká. Kiate au, ko ha meʻa fakataimi pē ia. ʻOku tolonga ange nai ia ʻi he fofonú pe ko e fuluú, ka ʻe faifai pē ʻo ngata.”
ʻI hono fai ʻa e fakamatala ko iá, naʻe ʻi he fakakaukau ʻa Dustin ʻa e ʻamanaki makatuʻunga ʻi he Tohitapú ʻo e moʻui lelei haohaoa ʻi ha māmani palataisi ʻi he malumalu ʻo e Puleʻanga ʻo e ʻOtuá. (Fakahā 21:3, 4) ʻOku talaʻofa mai ʻa e Folofola ʻa e ʻOtuá ʻo pehē ʻi he malumalu ʻo e pule fakaʻotua peheé, “ʻoku ʻikai ha nofo ai te ne pehe, ʻOku ou mahaki.” (Aisea 33:24; Mātiu 6:9, 10) Te ke saiʻia ke ako lahi ange fekauʻaki mo e talaʻofa makatuʻunga faka-Tohitapu ko ení? Fetuʻutaki ki he Kau Fakamoʻoni ʻa Sihova fakalotofonuá, pe tohi ki he kau faipulusi ʻo e makasini ko ení ʻi he tuʻasila feʻungamālie ʻoku fakahokohoko ʻi he peesi 5.
[Fakatātā ʻi he peesi 12]
Ko e mapuleʻi-kitá mo ha vakai fakatuʻamelie ʻoku mātuʻaki mahuʻinga ia