Ko e Hā ʻa e Faiva ʻOku Hulu ʻi he Faʻahitaʻu Māfana ko Ení?

KO E HĀ ʻa e ʻuhinga kiate koe ʻa e aʻu mai ʻa e faʻahitaʻu māfaná? Kapau ʻoku ʻi ai ha liliu ki he ʻea māfana angé, ʻe tohoakiʻi nai koe ʻe he faʻahitaʻu māfaná ki ha tuʻunga lelei ʻi tuʻa​—ke fiefia nai ʻi ha ngaahi ʻeva ki he matātahí pe ko ha paʻake.

Kae kehe, ʻoku fakafalala ʻa e faʻahinga ʻi he kautaha faʻu faivá ki he kakai ʻe laui miliona, ke nau fakamoleki ha ngaahi houa lahi ʻi he taimi māfaná ʻi loto fale ʻi he ngaahi faivá. ʻOku ʻi ai ʻa e ngaahi lā faiva ʻikai siʻi hifo he 35,000 ʻi he ʻIunaite Seteté ʻataʻatā pē, pea ʻi he ngaahi taʻu ki muí ni maí ko e peseti nai ʻe 40 ʻo e paʻanga ʻoku maʻu mei he fakatau tikité ʻi he fonua ko iá kuo maʻu ia lolotonga ʻa e faʻahitaʻu māfaná.a “ʻOku hangē ia ko e Kilisimasí ki he ngāueʻanga fakatau fakamoveteveté,” ko e lau ia ʻa Heidi Parker ʻo e makasini Movieline.

Naʻe ʻikai ke pehē maʻu pē ia. Naʻe faʻa ʻikai loko ʻi ai ha kakai ʻi he faʻahitaʻu māfaná ʻi he ngaahi fale faiva U.S. ʻo fakamālohiʻi ai ʻa e lahi ʻo e ngaahi fale faivá ke fakangatangata ʻenau taimi-tēpilé pe tāpuni ʻi he faʻahitaʻu ko iá. Ka ʻi he vaeuaʻanga ʻo e 1970 tupú, naʻe tohoakiʻi ai ʻe he ngaahi fale faiva ʻea-fakamokomokó ʻa e laui miliona ki he loto falé ke nau hao mei he velá. Ko e fānau naʻe mālōlō mei he akó, ko ha māketi maʻuʻanga faingamālie kinautolu ʻa ia naʻe ʻikai ke taʻefakatokangaʻi ʻe he kau faʻu faivá. ʻIkai fuoloa, naʻe mahiki hake ʻa e faʻahitaʻu māfana tālaá.b Naʻá ne liliu ʻa e founga ʻo hono faʻu mo fakamāketiʻi ʻa e ngaahi faivá, ʻo hangē ko ia te tau sio ki aí.

[Fakamatala ʻi lalo]