‘ʻOku Ou Mahuʻinga ki he ʻOtuá?’

“ʻOKU Ou Mahuʻinga? ʻOku Tokanga Mai ʻa e ʻOtuá?” Ko e fakalea ia ʻo e ʻuluʻitohi ʻo ha kupu ʻoku hā ʻi he Christianity Today. “Ko e konga lahi ʻo ʻeku ngāue tuʻumaʻu ko ha tokotaha-faʻutohí ʻoku takai holo pē ʻi he palopalema ʻo e mamahí,” ko e fakahā ia ʻe Philip Yancey, ko e tokotaha-fatutohi ʻo e kupu ko iá. “ʻOku ou toutou foki ki he ngaahi fehuʻi tatau pē, ʻo hangē ʻoku ou ala ki ha mataʻilavea motuʻa ʻoku ʻikai pē ke moʻui ia. ʻOku ou fanongo mei he kau lau ʻo ʻeku ngaahi tohí, pea ko ʻenau ngaahi talanoa loto-mamahí ʻoku nau fakamoʻoni ki heʻeku ngaahi veiveiuá.”

Mahalo kuó ke fifili mo koe ʻo fekauʻaki mo e mahuʻingaʻia ʻa e ʻOtuá ʻi hoʻo moʻuí. ʻA, ʻokú ke alāanga nai mo Sione 3:​16, ʻa ia ʻokú ne fakahā mai “naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu.” Pe mahalo kuó ke ʻosi lau ʻa Mātiu 20:​28, ʻa ia ʻoku pehē ai naʻe haʻu ʻa Sīsū “ke tuku ʻene moʻui ke huhuʻiʻaki ha tokolahi, heʻene fetongi kinautolu.” Ka te ke ʻeke nai, ‘ʻOku fakatokangaʻi mai au ʻe he ʻOtuá? ʻOkú ne tokanga fakafoʻituitui mai kiate au?’ ʻOku ʻi ai ʻa e ʻuhinga lelei ke tau tui ai ʻokú ne fai pehē, ʻo hangē ko ia te tau vakai ki aí.