Naʻá Ne Tokoni ke Fakamafola Atu ʻa e Māmá “ki he Ngataʻanga ʻo Māmani”
NAʻE ngāueʻaki ʻa e ʻapositolo ko Paulá ke ne fakamafola atu ʻa e māmá “ki he ngataʻanga ʻo māmani.” Ko hono olá, ko e tokolahi naʻa nau “hehema totonu ki he moʻui taʻengatá naʻa nau hoko ko e kau tui.”—Ngāue 13:47, 48, NW; Aisea 49:6.
Ko ha holi loto-vēkeveke ke fakamafola atu ʻa e maama fakalaumālié naʻe toe hā mahino ia ʻi he moʻui līʻoa mo e ngaahi ngāue taʻehelaʻia faka-Kalisitiane ʻa William Lloyd Barry, ko ha mēmipa ʻo e Kulupu Pule ʻa e Kau Fakamoʻoni ʻa Sihová. Naʻe mate ʻa Tokoua Barry ʻi Siulai 2, 1999, lolotonga ʻene fai ha konga hangatonu ʻi heʻene ngāue ʻi ha fakataha-lahi fakavahe ʻi Hauaiʻi.
Naʻe fāʻeleʻi ʻa Lloyd Barry ʻi Nuʻu Sila ʻi Tīsema 20, 1916. Naʻe maʻu ʻe heʻene faʻeé mo ʻene tamaí ki muʻa ange ha mahuʻingaʻia longomoʻui ʻi he ngaahi moʻoni faka-Tohitapu naʻe ʻomai ʻi he ngaahi tohi ʻa C. T. Russell, ʻi hono tufaki ʻe he Sōsaieti Taua Leʻo Tohitapu mo e Tulekí. Ko ia ai, naʻe tupu hake ʻa Tokoua Barry ʻi ha fāmili Kalisitiane līʻoa.
Neongo ʻene mahuʻingaʻia ʻi he ngaahi sipotí mo e akó, naʻa mo ʻene maʻu ha mataʻitohi ʻi he saienisí, naʻe tauhi maʻu ʻe Tokoua Barry ʻa ʻene fakahangataha loto-vēkeveke ki he ngaahi meʻa fakalaumālié. Ko ia ai, ʻi Sanuali 1, 1939, naʻá ne fai ai ʻa e ngāue fakafaifekau taimi-kakató, ʻo hoko ko ha mēmipa ʻo e fāmili Pētelí ʻi he ʻōfisi ʻo e Sōsaietí ʻi ʻAositelēliá. Hili hono tapui ʻe he puleʻangá ʻa e Sōsaietí ʻi he 1941, naʻe hanganaki femoʻuekina ʻa Tokoua Barry ʻi he ngāue ʻōfisí, ʻo vaheʻi ai ia ʻi ha ngaahi taimi ke ne tohi ʻa e fakamatala ki hono fakalototoʻaʻi ʻo e kaungātuí. Naʻá ne toe hoko ʻo takimuʻa alafaʻifaʻitakiʻanga ʻi he ngāue fakafaifekau ki he kakaí.
ʻI Fepueli 1942, naʻe mali ai ʻa Tokoua Barry mo ha toe sevāniti ngāue taimi-kakato. Ko hono uaifi ʻofaʻangá, ʻa Melba, kuó ne ngāue anga-tonu ʻi hono tafaʻakí ʻi he ngaahi taʻu kotoa ko ení ʻi he ngaahi konga lahi ʻo e māmaní. Naʻá na fou ʻi ha sitepu lahi ʻi he ngāue ʻi he ngaahi malaʻe ʻi mulí ʻaki ʻena kau ʻi he kalasi hono 11 ʻo e Akoʻanga Tohitapu ʻa e Taua Leʻó ko Kiliatí ʻi he ʻIunaite Seteté. Ko hona vāhenga-ngāué ko e meʻa ia ʻe vakai ki ai ʻa e tokolahi ‘ko ha ngataʻanga ʻo e māmaní’—ko Siapani. Hili ʻena aʻu ki ai ʻi Nōvema 1949, naʻá na kamata ngāue ai ko e ongo misinale ʻi he kolo taulanga vaka ʻo Kobe. ʻI he taimi ko iá, ko e faʻahinga tāutaha pē ʻe toko 12 naʻa nau malangaʻi ʻa e ongoongo leleí ʻi Siapaní. Naʻe ako ʻe Tokoua Barry ʻa e lea mo e anga ʻo hono ʻapi foʻoú peá ne fakatupulekina ai ha ʻofa loloto ki he kakai Siapaní, ʻa ia naʻá ne ngāue ki ai ʻi he taʻu ʻe 25 hono hokó. Ko ʻene ʻofa ki he faʻahinga ko ia ʻoku “hehema totonu ki he moʻui taʻengatá” naʻe hā mahino ia ki he fetokouaʻaki faka-Kalisitiane naʻe tupulaki ʻi Siapaní, ʻo tokoniʻi ai ia ke ne hoko ʻo ola lelei ʻi hono tokangaʻi ʻa e vaʻá ʻi he ngaahi hongofuluʻi taʻu.
ʻI he kongaloto ʻo e 1975, ʻi he ʻi ai ʻa e Kau Fakamoʻoni ʻe toko 30,000 nai ʻi Siapaní, naʻe hiki leva ʻa e ongo Barry ki Brooklyn, Niu ʻIoke. ʻI he tuʻunga ko ha Kalisitiane pani ʻe he laumālié, naʻe fakaafeʻi ai ʻa Tokoua Barry ke ngāue ko ha mēmipa ʻo e Kulupu Pule ʻo e Kau Fakamoʻoni ʻa Sihová. (Loma 8:16, 17) Naʻe fakamoʻoniʻi ʻa e mātuʻaki ʻaonga ʻo ʻene taukei fakaetohí ʻi hono ngafa foʻou ʻi he Potungāue Faitohí. Pea ko ʻene taukei lahi ʻi he vaʻá mo e fakavahaʻapuleʻangá naʻe teuʻi ai ia ke ne hoko ko ha tokoni mahuʻinga ʻi he hoko ko ha mēmipa ʻo e Kōmiti Faipulusi ʻa e Kulupu Pulé.
ʻI he faai mai ʻa e ngaahi taʻú, naʻe kei tauhi pē ʻe Tokoua Barry ʻa ʻene ʻofa ki he Hahaké pea mo hono kakaí. Ko e kau ako ʻi he Akoʻanga Kiliatí pea pehē ki he kau mēmipa ʻo e fāmili Pētelí naʻe lava ke nau fakapapauʻi ko ʻene ngaahi malangá mo ʻene ngaahi talí ʻe fakaeʻa ai ʻa e ngaahi talanoa fakalotomāfana fekauʻaki mo e tokolahi ʻa ia naʻa nau ngāue ʻi he ngāue fakamisinalé. Ko e ngaahi ngāue fakamalanga ʻi he ‘ngataʻanga ʻo māmaní’ naʻe hā moʻoni ia ʻi he toe fakamatala loto-māfana ʻa Tokoua Barry ki heʻene ngaahi meʻa tonu naʻe hokosiá. Ko e niʻihi ʻo e ngaahi meʻá ni naʻe lave ki ai ʻi heʻene fakamatala fakafoʻituitui naʻe pulusi ʻi he The Watchtower ʻo Sepitema 15, 1960.
ʻOku tau tuipau, ʻi hono tuʻunga ko e ‘kaungāʻea mo Kalaisí,’ ko e mahuʻingaʻia ko ia ʻa Tokoua Barry ʻi he faʻahinga ko ia ʻoku “hehema totonu ki he moʻui taʻengatá” ʻe hokohoko atu ia. Ko e moʻoni, ʻe ongoʻi lahi ʻene pulí ʻe he faʻahinga kotoa ʻoku nau ʻiloʻi mo ʻofa ʻiate ia ʻi hono tuʻunga ko ha tangata fakalaumālie, ʻoku līʻoa kakato kia Sihova mo maʻu ha ʻofa māfana ki he kakai ʻa e ʻOtuá. Ka, ʻoku tau fiefia ʻi he kītaki anga-tonu ʻa Tokoua Barry ki he ngataʻanga ʻo hono ʻalunga fakaemāmaní.—Fakahā 2:10.
[Fakatātā ʻi he peesi 16]
Ko Lloyd Barry mo John Barr ʻi he taimi naʻe tukuange mai ai ʻa e “Insight on the Scriptures” ʻi he 1988
[Fakatātā ʻi he peesi 16]
Ko e fakataha ʻa e kau maʻu tohi fakamoʻoni ako ʻo e kalasi hono 11 ʻo Kiliatí, ʻi Siapani hili ia ʻa e taʻu ʻe 40