Līpooti ʻa e Kau Fanongonongo ʻo e Puleʻangá

Maʻu ʻa e Kakaí ʻi Heʻenau Ngāueʻangá

KO E HĀ naʻe faitatau ai ʻa e ʻapositolo ko Mātiú, Pita, ʻAnitelū, Sēmisi pea mo Sioné? Naʻe ui kotoa kinautolu ʻe Sīsū ʻi he taimi naʻa nau ʻi heʻenau ngāueʻangá aí. Ko Pita, ʻAnitelū, Sēmisi mo Sioné naʻa nau femoʻuekina ʻi heʻenau pisinisi toutaí ʻi he taimi naʻe fakaafeʻi ai kinautolu ʻe Sīsū, ʻo ne pehē: “Muimui ʻiate au.” Naʻe ʻi he ʻōfisi tukuhaú ʻa Mātiu ʻi he taimi naʻe fakaafeʻi ai ia ke ne hoko ko e ākonga ʻa Sīsuú.—Mātiu 4:​18-21; 9:9.

Ko e faifakamoʻoni ki he kakaí ʻi honau feituʻu ngāué ʻe lava ke hoko ia ko e meʻa fakafiemālie. ʻI hono ʻiloʻi ení, ko e Kau Fakamoʻoni ʻa Sihova ʻi Siapaní naʻa nau fai ki muí ni ha feinga uouangataha ke kau ʻi he tafaʻaki ko eni ʻo e ngāue fakafaifekaú. Ko e hā ʻa e ngaahi olá? ʻI loto ʻi ha ngaahi māhina siʻi, naʻe maʻu ai ha ngaahi toe ʻaʻahi ʻe laui afe, pea naʻe kamata ai ha ako Tohi Tapu ʻe 250 nai. Vakai angé ki he ngaahi meʻa ko eni naʻe hokosiá.

Naʻe fetaulaki ha faifekau taimi-kakato ʻi Tōkiō mo ha pule falekai ʻa ia naʻá ne talanoa mo ha tokotaha Fakamoʻoni ʻi he taʻu nai ʻe 30 kuohilí ʻi he tuʻunga ko ha tamasiʻi ako. Neongo naʻe ʻikai ke ʻiloʻi ʻe he pulé ʻa e meʻa lahi ʻa ia naʻe leaʻaki ʻi he taimi naʻá ne kei ako aí, naʻá ne hoko ʻo mahuʻingaʻia ʻi he Tohi Tapú. ʻI hono toe fakaake he taimi ko ení ʻene mahuʻingaʻiá, naʻá ne tali lelei ha ako Tohi Tapu ʻo ngāueʻaki ʻa e tohi ʻIlo ʻA Ia ʻOku Taki Atu ki he Moʻui Taʻengatá.a Tānaki atu ki aí, naʻá ne kamata ha polokalama fakafoʻituitui ʻo hono lau ʻa e Tohi Tapú ʻi he efiafi kotoa ki muʻa ke ne mohé.

Naʻe ʻaʻahi ha faifekau tāimuʻa makehe ki ha ʻōfisi. Neongo naʻe ʻikai faingamālie ʻa e pulé, ko e finemui naʻá ne tali ʻa e telefoni ʻa e pulé naʻá ne ʻeke, “Te ke saiʻia ke talanoa mo au?” Hili ha fetalanoaʻaki nounou ʻi he telefoní, naʻe hū mai ki tuʻa ʻa e fefiné ʻo ne pehē naʻá ne mahuʻingaʻia ʻi hono lau ʻa e Tohi Tapú. Naʻe fokotuʻutuʻu ʻa e tāimuʻa makehé ke toe foki ange mo ha Tohi Tapu ʻo kamata ha ako Tohi Tapu mo ia, ʻo fai pongipongia ʻi ha paʻake ofi mai, ki muʻa ke fai ʻa e ngāué.

ʻI ha toe ʻōfisi ʻe taha, naʻe sio ai ha tangata ki ha kaungāngāue ʻokú ne tali ʻa e ongo makasini Taua Leʻo mo e ʻĀ Hake! ka naʻá ne tolongi vave ia hili e mavahe ʻa e tokotaha Fakamoʻoní. ʻI he aʻu ʻa e tangatá ki ʻapí, naʻá ne talanoa ai ki hono uaifí ʻo fekauʻaki mo e meʻa naʻe hokó peá ne fakamatala kapau ko ia ia, naʻá ne mei fanongo ʻi ha tuʻunga. Ko hono ʻofefiné, ʻa ia naʻá ne fanongo mai ki heʻene fakamatalá, naʻá ne fakamatalaʻi ʻa e meʻá ki ha tokotaha Fakamoʻoni ʻa ia ʻoku ngāue ʻi he feituʻu pisinisi ko iá. Naʻe ʻaʻahi vave ʻa e tokotaha Fakamoʻoní ki he husepānití ʻi he ʻōfisí ʻo ne kamata ha ako Tohi Tapu mo ia. Naʻe vave ʻa e kamata ke maʻu tuʻumaʻu ʻe he tangatá ʻa e ngaahi fakataha Sāpaté.

Ko e faifakamoʻoni ki he kakaí ʻi he ngāueʻangá kuo toe ʻomai ai ha ngaahi ʻaonga kehe. Kuo hoko ai ʻa e kau malanga tokolahi ʻi Siapani ʻo pōtoʻi ʻi hono fai ʻo e ngaahi toe ʻaʻahí ʻi he ngaahi faiʻanga fakataú, ngaahi fale ngāué mo e ngaahi ʻōfisí. Tānaki atu ki ai, fakafou ʻi he ngaahi founga ko eni ʻo e faifakamoʻoní, ko e faʻahinga ʻikai longomoʻui tokolahi kuo fai ʻa e felōngoaki pea naʻe kamata ha ngaahi ako mo kinautolu. Kuo tuʻu-ki-muʻa ʻa e ngaahi olá. Ko e fakatahaʻanga ʻe taha ʻi he uhouhonga ʻo Tōkioó naʻe līpooti ai ki muí ni ʻa e ngaahi ako Tohi Tapu ʻe 108, ʻo laka hake ia he liunga ua ʻi he tokolahi naʻe līpooti he taʻu kuo maliu atú.

[Fakamatala ʻi lalo]