ʻE Lava ʻe he Tangatá ke Fakangata ʻa e Masivá?

KUO tupu hake ʻa e laui miliona ʻo ʻikai te nau hokosia ʻa e masivá. Naʻe ʻikai ʻaupito pau ke nau mohe fiekaia pe mohe tetetete ʻi he momokó. Neongo ia, ko e tokolahi ʻo e faʻahinga tāutaha ko iá ʻoku nau ongoʻi fakaʻofaʻia ʻi he masivá pea fai ha feinga lahi ke tokoniʻi kinautolu.

Kae kehe, ʻoku kei hoko ai pē ʻa e masivá ko ha foʻi moʻoni mālohi ki he kakai ʻoku fakahohaʻasi ʻe he tau fakalotofonuá, ngaahi tāfea, ngaahi taimi laʻalaʻā mo e ngaahi palopalema kehe. Ko e ngaahi meʻa tefitó ni ko ha meʻa fakamamahi ia ki he kau faama ʻAfilika ki he maʻuʻanga moʻuí. Kuo fakamālohiʻi ʻa e niʻihi ke nau mavahe mei honau ngaahi ʻapí ʻo hiki ki he ngaahi kolo lalahí pe hiki ke nofo ʻi he tuʻunga ko e kau kumi hūfanga ʻi ha fonua foʻou. ʻOku hiki ʻa e kau nofo kolo ʻuta kehe ki he ngaahi kolo lalahí koeʻuhi ko hono fakataueleʻi kinautolu ʻe he ngaahi talaʻofa ki ha moʻui lelei ange.

Ko e ngaahi kolo feʻefiʻefihí ʻoku faʻa hoko ko e feituʻu feʻungamālie ia ki he tupu ʻa e masivá. ʻOku siʻi ʻaupito ʻa e kelekelé, ʻo kapau ʻoku ʻi ai, ke tō ai ʻa e ngoué. ʻOku faʻa faingataʻa ke maʻu ha ngāue. ʻI he feinga vavalé, ʻoku hanga ai ʻa e tokolahi ki ha moʻui faihia. ʻOku kalanga ʻa e kau nofo kolo lahí ki ha tokoni, ka ʻoku ʻikai malava ʻa e ngaahi puleʻanga fakaetangatá ke solova ʻa e palopalema fakautuutu ʻo e masivá. ʻI he lave ki ha līpooti ʻa e Ngaahi Puleʻanga Fakatahatahá naʻe tukuange mai ʻi Nōvema 2003, naʻe fakahaaʻi ai ʻe he Independent ʻa Lonitoní: “ʻOku hoko ʻo fiekaia ange ʻa e māmaní.” ʻOkú ne tānaki mai: “ʻI he māmaní kotoa ʻoku fakafuofua ai ki he kakai ʻe toko 842 miliona ʻoku nau fasimanava—pea ko e fika ko iá ʻoku toe mahiki hake, ʻo tānaki atu ki ai ha toko 5 miliona ʻo e kakai fiekaia ʻi he taʻu kotoa pē.”

ʻOku maʻu ʻe he ʻōfisi vaʻa ʻo e Kau Fakamoʻoni ʻa Sihova ʻi ʻAfilika Tongá ʻi he taimi lahi ʻa e ngaahi tohi mei he kakai ʻoku masiva ʻangoʻango. Ko e fakatātaá, naʻe tohi ha tangata mei Bloemfontein: “ʻOku ou taʻemaʻungāue pea ʻoku ou kaihaʻa ʻi he kolo lahí ʻi ha taimi pē ʻoku ʻi ai ai ha faingamālié. Kapau ʻe ʻikai, te mau fiekaia ʻi ha ngaahi ʻaho—ʻo ʻikai fai ha lau heni ki he momoko ʻīʻií. ʻOku ʻikai ʻaupito ha ngāue. ʻOku heva takai holo ʻa e tokolahi ʻi he ngaahi halá ʻi he kumi ki ha ngāue mo ha meʻa ke kai. ʻOku ou ʻiloʻi ʻa e niʻihi ʻa ia ʻoku nau hua ʻa e ngaahi kapa vevé ki ha meʻakai. ʻOku taonakita ʻa e niʻihi. Ko e tokolahi hangē ko aú ʻoku nau loto-mafasia mo ʻikai ha ʻamanaki. ʻOku hā ngali ʻikai ha ʻamanaki ki he kahaʻú. ʻOku ʻikai nai ʻafio mai ki he meʻá ni ʻa e ʻOtuá, ʻa ia naʻá ne fakatupu kitautolu fakataha mo e fiemaʻu ke kai mo fakavalaʻí?”

ʻOku ʻi ai ʻa e ngaahi tali fakafiemālie ki he ngaahi hohaʻa ʻa e tangatá ni. Hangē ko ia ʻe fakahaaʻi ʻi he kupu hoko maí, ko e ngaahi talí ni ʻoku maʻu ia ʻi he ngaahi peesi ʻo e Folofola ʻa e ʻOtuá, ko e Tohi Tapú.