Ko e Kumi ki he Ngaahi Tali Totonú
ʻE lava fēfē ke u maluʻi ʻeku moʻui leleí?
Ko e hā ʻe lava ke u fai ke ʻai ai ʻeku moʻui fakafāmilí ke fakafiefia angé?
ʻE lava fēfē ke u ʻai ke lelei ange ʻa e faingamālie ʻo hono tauhi maʻu ha ngāue?
KUÓ KE ʻosi ʻeke nai ʻa e ngaahi fehuʻi ko iá ʻi ha taimi? Naʻá ke maʻu ha ngaahi tali ʻaonga ʻa ia naʻe ola lelei? ʻI he taʻu taki taha, ʻoku pulusi ai ʻa e ngaahi tohi kehekehe ʻe 2,000 nai ʻa ia ʻoku ʻomi ai ʻa e faleʻi fekauʻaki mo e ngaahi meʻá ni mo e ngaahi kaveinga mahuʻinga kehe. ʻI Pilitānia pē, ʻoku fakamoleki ai ʻe he kau lautohí ʻo aʻu ki he paʻanga ʻe 80 miliona (paʻanga ʻAmelika ʻe 150 miliona nai) he taʻu ʻi he ngaahi tohi ʻoku ʻomi ai ʻa e faleʻi fekauʻaki mo e founga ke fekuki ai mo e ngaahi palopalema ʻi he moʻuí. ʻI ʻAmelika, ko hono fakatau atu ʻa e ngaahi tohi faleʻi tokoní ʻoku maʻu ai ʻa e paʻanga ʻe 600 miliona nai he taʻu. Ko e moʻoni, ʻoku ʻikai ko koe tokotaha pē ʻoku kumi ki he faleʻi lelei fekauʻaki mo e founga ke fekuki ai mo e moʻui fakaʻahó.
ʻI he felāveʻi mo e faleʻi ʻoku maʻu ʻi he ngaahi tohi lahi ko ʻení, naʻe pehē ʻe ha faʻu-tohi ʻe taha: “Ko e ngaahi tohi foʻou lahi ʻoku nau toe ʻomi pē ʻa e meʻa kuo ʻosi hiki ki muʻa.” Ko hono moʻoní, ko e lahi ʻo e faleʻi ʻoku ʻi he ngaahi tohí ni, ko hono tapua mai pē ia ʻa e poto naʻe lēkooti ʻi he taha ʻo e ngaahi tohi motuʻa taha ʻi he māmaní. ʻOku ʻikai ha veiveiua ko e tohí ni ʻa e tohi kuo tufaki lahi taha ʻi he māmaní. Kuo ʻosi liliu kakato pe fakakonga ia ki he ngaahi lea nai ʻe 2,400. Ko hono fakakātoá, ʻoku laka hake he tatau ʻe 4.6 piliona kuo pulusi ʻi māmani lahi. ʻOku ʻikai ko ha toe tohi kehe ia ka ko e Tohi Tapú.
ʻOku tala mahino mai ʻe he Tohi Tapú: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni.” (2 Timote 3:16) Ko e moʻoni, naʻe ʻikai ke hiki ʻa e Tohi Tapú ia ko ha tohi fakahinohino pē ke tokoni kiate kita. Ko hono taumuʻa tefitó ke fakahaaʻi ʻa e finangalo ʻa e ʻOtuá maʻá e faʻahinga ʻo e tangatá. Ko ia ai, ʻoku lahi ʻaupito ʻa e meʻa ʻoku leaʻaki ʻe he Tohi Tapú fekauʻaki mo e founga ke fekuki ai mo e ngaahi palopalema ʻoku anga-maheni ʻene hoko kiate kitautolú kotoa, pea ʻoku talaʻofa ai ko e faʻahinga ʻoku nau muimui ʻi heʻene fakahinohinó te nau maʻu ʻaonga tonu mei ai. (Aisea 48:17, 18) ʻI hono ngāueʻakí, ʻoku ola lelei maʻu pē ʻa e faleʻi ʻaonga aí, ʻo tatau ai pē pe ko e hā ʻa e puipuituʻa fakamatakali, fakafonua pe fakaako ʻo ha taha. Fēfē ke ke vakaiʻi ʻa e kupu hono hokó pea fai haʻo fili fakafoʻituitui pe ʻoku ʻaonga nai ʻa e meʻa ʻoku leaʻaki ʻe he Tohi Tapú ʻo fekauʻaki mo e ngaahi tuʻunga hangē ko e moʻui leleí, fāmilí pea mo e ngāué!