“Ko ha ʻOvasia Lelei ʻAupito pea ko ha Kaumeʻa ʻOfeina”

KO JOHN (JACK) BARR, ʻa ia naʻe ngāue ko ha mēmipa ʻo e Kulupu Pule ʻa e Kau Fakamoʻoni ʻa Sihová, naʻe ngata ʻa hono ʻalunga moʻui ʻi he māmaní ʻi he Pongipongi Tokonaki ʻo Tīsema 4, 2010. Naʻá ne taʻu 97. Kuo fakamatalaʻi ia “ko ha ʻovasia lelei ʻaupito pea ko ha kaumeʻa ʻofeina.”

Ko Tokoua Jack Barr naʻe fāʻeleʻi ia ʻi Aberdeen, Sikotilani, ko e siʻisiʻi taha ia ʻi he fānau ʻe toko tolu. Ko ʻene ongo mātuʻá fakatouʻosi naʻá na kau ʻi he kau paní. Naʻe faʻa lea ʻa Tokoua Barr fakataha mo e manatu ʻofa ki he konga ki muʻa ʻo ʻene moʻui fakafāmilí; naʻá ne houngaʻia ʻi he faʻifaʻitakiʻanga lelei ʻaupito naʻe fokotuʻu maʻana ʻe heʻene tamai mo e faʻē ʻofeiná.

ʻI heʻene aʻu ki hono taʻu hongofulu tupú, naʻe faingataʻaʻia ʻaupito ʻa e talavou ko Jack ʻi he lea ki he kau solá. Kae kehe, naʻá ne ngāue mālohi ke ikuʻi ʻa e palopalemá, pea ʻi ha efiafi Sāpate ʻe taha ʻi he 1927, ʻi hono taʻu 14, naʻá ne fakahaaʻi ange ai ki heʻene tamaí kuó ne mateuteu ke ʻalu mo ia ʻi he ngāue fakamalanga fale-ki-he-falé. Ko e kamataʻanga ia ʻo ʻene ngāué. Mei he ʻaho ko iá ʻo aʻu ki heʻene maté, naʻe hoko ai pē ʻa Tokoua Barr ko ha tokotaha malanga faivelenga ʻo e ongoongo leleí.

Ko ha fakatuʻutāmaki fakamamahi ʻa ia ne meimei mole ai e moʻui ʻa ʻene faʻē ʻofeiná naʻe ʻai ai ʻa e talavou ko Jack ke ne fakakaukau fakamātoato fekauʻaki mo e taumuʻa ʻo e moʻuí, pea ʻi he 1929 naʻá ne fakatapui ai ia kia Sihova, ʻo fakahāhā ʻene fakatapuí ʻi he ʻuluaki faingamālié ʻi he 1934. ʻI he 1939 leva, naʻá ne hoko ai ko ha mēmipa ʻo e fāmili Pēteli ʻi Lonitoní, ʻIngilani. Naʻe kamata ai ʻa ʻene ngāue taimi-kakato ʻa ia naʻe feʻunga mo e taʻu ʻe 71.

ʻI ʻOkatopa 29, 1960, naʻe aʻu ai ʻa Tokoua Barr ki he meʻa naʻá ne ui “ko ha vahaʻangatae naʻe tautefito ʻene mahuʻingá” ʻi heʻene mali mo Mildred Willett, ko ha tāimuʻa faivelenga taimi lōloa pea ko ha misinale. Naʻe ʻiloa ʻa Tokoua mo Tuofefine Barr ko ha ongo meʻa mali faʻifaʻitakiʻanga lelei mo līʻoa, pea naʻá na ʻi he tuʻunga ai pē ko iá ʻo aʻu ki he ngata ʻa e ʻalunga moʻui ʻa Mildred ʻi he māmaní ʻi ʻOkatopa 2004. Ko Tokoua mo Tuofefine Barr naʻá na lau fakataha ha konga ʻo e Tohi Tapú ʻi he ʻaho kotoa pē ʻo ʻena nofo malí.

Ki he faʻahinga naʻa nau ʻiloʻi iá, ko e hingoa Jack Barr ʻe ʻomai ai ki heʻenau manatú ha tangata naʻá ne fai ʻa e faleʻi ʻosi fakakaukauʻi lelei—ʻo mafamafatatau maʻu pē, anga-ʻofa maʻu pē, pea faiaka ʻi he Tohi Tapú. Ko ha tokotaha ngāue mālohi ia pea ko ha ʻovasia fakaʻatuʻi mo ʻofa, pehē foki ko ha kaumeʻa mateaki. Ko ʻene ngaahi talí, ko ʻene ngaahi malangá, mo ʻene ngaahi lotú naʻe fakahaaʻi ai ʻa e loloto hono ueʻi ia ʻe he moʻoní mo e vāofi ʻa hono vahaʻangatae mo Sihová.

Lolotonga ʻetau ongoʻi e mole atu ʻa siʻi Tokoua Barr, ʻoku tau fiefia fakataha mo ia ʻi heʻene maʻu ʻa e meʻaʻofa ko e taʻefaʻamaté—ko ha monū naʻá ne fakatuʻotuʻa atu ki ai pea faʻa lea ʻo fekauʻaki mo ia. Ko e meʻa tofu pē ia naʻá ne fakaʻamuá.—1 Kol. 15:53, 54.a

[Fakamatala ʻi lalo]