Taimi ʻOkú Ke Puke Lahi Aí

“ʻI heʻeku ʻilo naʻe maʻu ʻe he kanisaá hoku maʻamaʻá mo hoku ngākau lahí, naʻá ku ʻiloʻi pau kuo pau pē teu mate. Ka ʻi he hili ʻeku foki mai mei he toketaá ki ʻapí, naʻá ku fakakaukau, ‘Sai, ko e meʻa eni ia naʻe ʻikai teu ʻamanekina ke hokó, ka kuo pau ke u ʻiloʻi ha founga ʻe lava ke u fehangahangai ai mo eni.’”—Linda, taʻu 71.

“Naʻá ku maʻu ha mahaki fakamamahi ʻa ia ʻokú ne uesia ʻa e neave toʻohema ʻo hoku matá. ʻI ha taimi ʻe taha, naʻe fakatupunga ʻe he mamahi ko ení ke u hoko ai ʻo loto-mafasia. ʻI he taimi lahi, naʻá ku ongoʻi ai ʻoku ou ongoʻi lōmekina pea naʻa mo e fakakaukau ke taonakita.”—Elise, taʻu 49.

Ko ha tangata mamatea ʻi ha saliote ʻoku takatakai ai ha ngaahi kaumeʻa ʻofa

KAPAU ko koe pe ko haʻo ʻofaʻanga kuo ʻiloʻi ʻoku maʻu ʻe ha mahaki ʻa ia ʻe lava ke hoko ʻo mate ai, ʻokú ke lāuʻilo ʻa e hoko ʻa e meʻá ni ko ha meʻa fakaloto-mamahi. Tānaki atu ki he mahakí ʻiate ia peé, kuo pau ke ke fekuki mo e ngaahi ongoʻi feifeitamaki ʻa e tokotaha puké. Ko e manavahē mo e loto-mafasiá ʻoku lava ke fakalahiʻi ia ʻi he hoko ʻo loto-mamahi lahí, faingataʻa ke maʻu pe totongi ha faitoʻo pau, pe ko e ola kovi ʻo e faitoʻo ʻoku ngāueʻakí. Ko e mafasia fakaeʻatamaí ʻoku fekauʻaki ia mo e lahi ʻo e puké ʻa ia ʻoku lava ke fakatupu lōmekina.

Te tau maʻu mei fē ha tokoní? Kuo ʻilo ʻe he faʻahinga ʻe niʻihi ko ʻenau fakafiemālie lahi tahá ʻoku maʻu ia mei he falala ki he ʻOtuá fakafou ʻi he lotu pea mo hono lau ʻa e ngaahi fakalototoʻa ʻoku hā ʻi he Tohi Tapú. Ko e toe tokoni ʻe taha ʻe lava ke haʻu ia mei he ʻofa mo e poupou ʻoku lava ke fai ʻe he fāmilí mo e ngaahi kaungāmeʻá.

FOUNGA ʻO E FEKUKI ʻA E NIʻIHI MO E TUʻUNGÁ NI

“Fekuki mo e mahamahakí ʻaki ʻa e tui ki he ʻOtuá,” ko e faleʻi ia ʻa e taʻu 58 ko Robert, “pea te ne tokoniʻi koe ke ke kātekina ʻa e mahamahakí. Lotu kia Sihova. ʻAi ke ne ʻiloʻi ʻa e anga hoʻo ongoʻí. Kole ʻa hono laumālie māʻoniʻoní. Kole kiate ia ki ha mālohi mo ha fakalototoʻa ki ho fāmilí pea ke ke hanganaki kātaki ai pē neongo ʻa e mahamahakí.”

“ʻOku hounga ʻaupito ʻa e taimi ʻoku poupouʻi fakaeongo ai koe ʻe ho fāmilí, ʻi he taimi ʻoku nau ʻi ai ke poupoú. ʻOku faʻa tā mai ʻi he ʻaho kotoa pē ha toko taha pe toko ua ʻo ʻeke mai, ‘ʻOkú ke siʻi fēfē hake?’ ʻOku ou maʻu ha fakalototoʻa mei ha ngaahi kaungāmeʻa mei he ngaahi feituʻu kehekehe. ʻOku nau ʻai moʻoni au ke u ongoʻi lelei ange, pea tokoniʻi au ke ʻoua te u hoko ʻo foʻi.”

Kapau ko e kaungāmeʻa koe ʻokú ke ʻaʻahi ki ha tokotaha puke, fakatokangaʻi ʻa e meʻa ʻoku fakahaaʻi ʻe Linda: “ʻOku ʻikai ha veiveiua ko e tokotaha puké ʻokú ne loto ke fei mo sai pea ʻoku ʻikai malava ke ke faʻa talanoa ʻo kau ki heʻene puké. Ko ia talanoa ʻo fekauʻaki mo e ngaahi meʻa anga-mahení.”

Ko e mālohi mei he ʻOtuá fakataha mo e fakafiemālie mei he Tohi Tapú, pea pehē ki he poupou ʻa e fāmilí ʻofá mo e ngaahi kaungāmeʻá, ʻe lava ke tau tuipau ʻoku kei ʻaonga pē ke tau moʻui, neongo ʻetau kātekina ha puke lahi.

Ngaahi Veesi Tohi Tapu ʻe Lava ke Tokoni

Falala ki he ʻOtuá.

“Naʻá ku kumi kia Sihova, pea naʻá ne fai mai ha tali kiate au. Naʻá ne fakahaofi au mei heʻeku ngaahi manavaheé kotoa. Naʻe ui ʻa e tokotaha māʻulaló ni, pea naʻe ongoʻi ʻe Sihova.”—Saame 34:4, 6.

Ko Linda, naʻe lave ki ai ki muʻá, ʻokú ne pehē: “Naʻe ʻikai ʻaupito pē ke u lotu, ‘Tokoniʻi au ke u sai.’ ʻOku ou faʻa lotu, ‘Tokoniʻi au ke u hoko ʻo mālohi, pea tokoniʻi au ke u kātekina ʻeku mahamahakí.’”

Lau ʻa e Folofola ʻa e ʻOtuá ke ne tokoniʻi koe ke ke mālohi.

“ʻE ʻikai ha taha ʻoku nofo ai te ne pehē: ‘ʻOku ou puke.’”—ʻAisea 33:24.

Fakalaulauloto ki he ngaahi talaʻofa ʻa e ʻOtuá ki he kahaʻú. Te ke maʻu ai ʻa e ʻamanaki, ʻa ia te ne ʻoatu ai ʻa e mālohi ke hoko ʻo kātaki.

Kole ʻa e tokoni ʻa ho fāmilí mo e ngaahi kaungāmeʻá.

“Ko ha kaumeʻa moʻoni ʻokú ne ʻofa ʻi he taimi kotoa pē pea ko ha tokoua ia ʻoku fanauʻi mai ki he taimi faingataʻá.”—Palōveepi 17:17.

“ʻOua ʻe fakamavaheʻi koe,” ko e faleʻi ia ʻa Elise, ʻa ia naʻe lave ki ai ki muʻá. “Fakaʻatā ʻa hoʻo ngaahi kaungāmeʻá ke nau tokoniʻi koe. ʻE ʻi ai nai ha taimi te ke ongoʻi taʻelata ai pea ke fakakaukau ʻoku ʻikai fanongo mai ʻa e ʻOtuá, kae ʻoua te ke fakamavaheʻi koe.”