Ngaahi Polosiuá—Ko e Ngaahi Meʻangāue Mahuʻinga ki he Ngāue Fakamalangá
1 Ko ha tangata tufunga pōtoʻi ʻokú ne faʻa ʻave ʻa e ngaahi meʻangāue kehekehe, ko e meʻangāue taki taha naʻe faʻu ia ke faiʻaki ha ngāue pau. ʻI he tuʻunga ko e kau fanongonongo ʻo e Puleʻangá, ʻoku tau maʻu ʻa e ngaahi polosiua lahi mo kehekehe ke tokoni kiate kitautolu ke tau pōtoʻi ʻi hono ngāueʻaki ia ki he ngaahi fiemaʻu fakalaumālie ki he kakai ʻoku tau malanga ki aí. (Pal. 22:29) Te ke feʻiloaki nai mo ha tokotaha ʻi he matapaá ʻoku loto-mafasia. Ko ha tokotaha ʻapi ia ʻe taha ʻoku ʻunaloto ia ki ha puleʻanga faitotonu, ko ha tokotaha kehe ia ʻoku fifili ia pe ʻoku ʻi ai koā ha taumuʻa ʻo e moʻuí. ʻOku malava fēfē ke tau ngāueʻaki ʻa ʻetau ngaahi polosiuá ke tokoni ki he kakai ko ʻení?
2 ʻE malava ke ke ngāueʻaki ʻa e lea ko ʻení ʻi hoʻo ngāueʻaki ʻa e polosiua ko e “Moʻui he Māmani”:
◼ “Ko e kakai tokolahi ʻoku nau fakakaukau te nau ʻalu ki hēvani koeʻuhi ke nau maʻu ai ʻa e moʻui taʻengatá, ka ko e hā haʻo fakakaukau ki he moʻui taʻengata ʻi he māmaní? [Tuku ke ne tali.] ʻOku fakapapauʻi mai ʻe he Tohi Tapú kiate kitautolu ʻoku malava ʻa e moʻui taʻengatá, pea ʻokú ne fakahā mai ʻa e founga ʻe malava ke tau aʻusia ai ʻa e taumuʻa ko iá.” Lau ʻa e Sione 17:3. Pea fakahā ki he tokotaha ʻapí ʻa e fakatātā fika 49, pea ʻeke ange: “Te ke saiʻia ke ke nofo ʻi ha māmani ʻoku hangē ko ʻení?” Tuʻuaki ange ʻa e polosiuá, mo fai ha fokotuʻutuʻu ki ha toe ʻaʻahi.
3 Ko e polosiua ko e “Vakai!” ʻe malava ke tuʻuaki atu ia ʻaki hono fakaʻaliʻali ʻa e fakatātā ʻi he takafí fakakātoa pea ʻeke ange:
◼ “Ko e hā ʻokú ke fakakaukau ʻe fiemaʻu ki hano ʻai ʻa e māmaní ke hangē ko ʻení? [Tuku ke ne tali.] Ko e tokotaha kotoa pē ʻi he fakatātā ko ʻení ʻoku ʻi ai hono ʻapi mo e ngāue fakatupu-fiefia. ʻOku ʻi ai ʻa e melino pea lahi ʻa e meʻa ke kaí, pea ko e māmani ia ʻoku ʻikai ke ʻuliʻi. Neongo kuo fai ʻe he ngaahi puleʻanga ʻo e tangatá ha feinga lahi ʻaupito, ʻoku nau pehē ʻoku ʻikai te nau malava ke fakahoko mai ha māmani pehē. Kae kehe, ʻoku fakapapauʻi mai kiate kitautolu ʻe he Tohi Tapú ʻe ‘fakafoʻou ʻa e ngaahi meʻa kotoa pē’ ʻe he ʻOtuá [Huke ki he peesi 30, pea lau ʻa e Fakahā 21:3, 4.] Ko e polosiua ko ʻení ʻe malava ke ne tokoniʻi koe ke ke ako ki he meʻa ʻoku fiemaʻu kiate koe ke ke fai ka ke nofo ʻi he māmani foʻou ko iá.” Kapau ʻoku feʻunga ʻa e fie fanongo ʻoku hā maí, huke ki he peesi 3, mo fakahāhā ʻa e anga ʻo ʻetau fai ʻa e ako Tohi Tapú.
4 Kapau ʻokú ke ngāueʻaki ʻa e polosiua ko e “Puleʻanga” te ke saiʻia nai ke kamataʻaki ʻeni:
◼ “ʻE faifai atu pē, pea ʻe meimei fifili ʻa e tokotaha kotoa pē ʻo fekauʻaki mo e taumuʻa ʻo e moʻuí. Ko e moʻuí pē ko e ngaahi taʻu ʻe 70 pe 80 pea mate? Pe ʻoku ʻi ai ʻa e ʻuhinga lahi ange ia ʻo e moʻuí? Ko e hā ʻa hoʻo fakakaukaú? [Tuku ke ne tali.] ʻI he Sāme 37:29, ʻoku tau sio ai ki he taumuʻa fakaʻofoʻofa ʻa e ʻOtuá ki he tangatá mo e māmaní.” ʻI he ʻosi ʻa hono lau ʻo e konga Tohi Tapú, huke ki he fakatātā ʻi he peesi 29, pea toe fakamatala lahi ange ʻo fekauʻaki mo e anga ʻo e moʻui ʻe ʻi he Palataisí.
5 ʻOku fakaeʻa ʻi he ngaahi polosiuá ʻa e ngaahi kaveinga feʻungamālie, tali ʻa e ngaahi fehuʻi ʻa e kakaí, mo fai ha fakafiemālie. ʻI he pōtoʻi ʻi hono ngāueʻaki ʻa e ngaahi meʻangāué ni, te tau malava ke tokoni ki he faʻahinga loto-moʻoní ke maʻu ʻa e “ʻilo kanokano ki he moʻoni.”—1 Tīm. 2:4.