Fakatupulekina ʻa e Fie Fanongó ʻi he Ngaahi Toe ʻAʻahí
1 ʻOku totonu ʻa hono fakatatau ʻa e ngāue fakamalangá ki he ngoué, pea ko hono fai ʻo e ngaahi toe ʻaʻahí kuo fakahoa ia ki hono tauhi mo fuʻifuʻí. (Mt. 13:23; Luke 10:2; 2 Kol. 9:10) ʻI he tuʻunga ko e ‘kaungāngāue mo e ʻOtuá,’ ʻoku tau maʻu ai ha fatongia ke tokoni ki ha tenga ʻoku huli hake ke tupu ʻo matuʻotuʻa pea hoko ʻo fua lahi. (1 Kol. 3:6, 9) Ko e hā ʻa e founga lelei taha ke malava ai ʻa e meʻá ni?
2 Ke fai leva ʻa e ngaahi toe ʻaʻahi ki he tokotaha kotoa pē ʻoku hā mei ai ha fie fanongo. Toe sio ki hoʻo ngaahi lekooti fale-ki-he-falé, pea fili ʻa ia te ke toe ʻaʻahi ki aí mo e meʻa ke fetalanoaʻaki ki aí. Ko hoʻo kaveinga ki he fetalanoaʻakí ʻoku faʻa fakapapauʻi ia mei he meʻa naʻe fai ai ʻa e fetalanoaʻaki ʻi he ʻaʻahi ki muʻa atú. Ke ngaofengofua, fakakaukau ki he ngaahi fakakaukau faka-Tohitapu kehe ʻe lava ke ngāueʻakí. ʻOku lelei maʻu ai pē ke ngāueʻaki ʻa e Tohi Tapú, fakatokangaʻi ʻa hono mafai ke aʻu ki he lotó.—Hep. 4:12.
3 Kapau naʻá ke tuku ʻa e polosiua ko e “Vakai!,” te ke pehē nai:
◼ “ʻI heʻeku ʻaʻahi mai ki muʻa atú, naʻá ta lau ai ʻi he Tohi Tapú ʻo fekauʻaki mo e talaʻofa ʻa e ʻOtuá te ne ngaohi ʻa e māmaní ko ha palataisi, ʻo hangē pē ko ia kuo fakatātaaʻi ʻi he takafi ʻo e polosiua naʻá ku tuku atú. ʻE malava ke tau maʻu ʻa e tāpuaki ko ʻení ʻi haʻatau ako ke lahi ange ʻo fekauʻaki mo e finangalo ʻo e ʻOtuá pea mo e anga ʻo ʻene kaunga ʻi heʻetau moʻuí.” Lau ʻa e Sione 17:3, pea huke ki he palakalafi 52 mo e 53 ʻi he peesi 27. Fakamatalaʻi fuonounou ʻa e ʻuhinga ʻoku fiemaʻu ai kiate kitautolu ke tau maʻu ʻa e ʻilo kānokano ki he Folofola ʻa e ʻOtuá.
4 ʻI ha toe ʻaʻahi ki ha tokotaha ʻoku hehema fakalotu pē naʻe tuku ai ʻa e polosiua ko e “Puleʻanga,” te ke fakakaukau nai ʻoku feʻungamālie ke lea pehē ni:
◼ “ʻOku ngalingali kuó ke toutou leaʻaki ʻo tuʻo lahi ʻa e Lotu ʻa e ʻEikí. Ko e hā ʻa hoʻo fakakaukau ʻi hoʻo kole ke hoko mai ʻa e Puleʻanga ʻo e ʻOtuá?” ʻI he hili ʻa e tali ʻa e tokotaha ʻapí, lave ki he peesi 26, pea lau ʻa e Tāniela 2:44. Mahalo te ke malava ke hoko atu ʻa e fetalanoaʻakí ʻaki hoʻo fakamatala ko e hoko mai ʻa e Puleʻanga ʻo e ʻOtuá ʻe hoko ai ʻa e ngataʻanga ʻo e anga-fulikivanú mo e faingataʻá. Fakahā ki ai kapau te tau māʻoniʻoni ʻi he ʻao ʻo e ʻOtuá, ʻe malava ke tau maʻu ʻa e moʻui taʻengata ʻi he Palataisi ʻi he māmaní.
5 Manatuʻi ʻoku malava ke fai ha toe ʻaʻahi ki ha tokotaha pē naʻá ne fie fanongo, tatau ai pē pe naʻe tuku ai ha tohi ia pe ʻikai. Feinga ke ke vaheʻi ha taimi ʻi he uike taki taha ke fai ai ʻa e ngaahi toe ʻaʻahí. ʻE tāpuakiʻi ʻe Sihova ʻa hoʻo feinga fakamātoato ke fakatupulekina ʻa e fie fanongo ʻokú ke maʻú. ʻOfa ke hoko ʻo fua ko ha fakalāngilangi kiate ia.—Sione 15:8.