Fai ha Ngaahi Toe ʻAʻahi ki he Polosiua Kotoa Pē Naʻe Tufá
1 Naʻe fakaongoongoleleiʻi ʻe he ʻaposetolo ko Paulá ʻa e kau Filipaí koeʻuhi ko e ‘toe ake enau tokaga kiate ia.’ (Fili. 4:10, PM) Kapau te tau ngāueʻaki ʻenau faʻifaʻitakiʻangá ko ha sīpinga ia ki he ngāue fakamalangá, ʻe toe ‘ake ʻetau fakakaukaú’ kiate kinautolu ko ia ʻoku tau fakamoʻoni ki aí pea hoko ai ʻo ueʻi ke fai ha ngaahi toe ʻaʻahi.
2 Kapau naʻá ke tuku ʻa e polosiua “Ko e Puleʻanga Te ne ʻOmai ʻA e Palataisi,” te ke leaʻaki nai ha meʻa hangē ko ʻení:
◼ “Naʻá ku fakakaukau ʻo fekauʻaki mo ʻeta pōtalanoa ʻi he ʻaho ki muʻá, pea naʻá ku manatuʻi ai ha konga Tohitapu ʻe ua ʻa ia te u saiʻia ke fakahā atu ia kiate koe. Mahalo te ke manatuʻi naʻá ta talanoa ʻo fekauʻaki mo hano fetongi ʻe he ʻOtuá ʻa e tuʻunga-pule ʻi he māmaní. ʻI he Tohitapú, kuo talaʻofa ai ʻe Sihova ko e ʻOtuá ʻe hoko ʻa e meʻá ni. [Lau Tāniela 2:44.] ʻOkú ke tui ʻe malava ʻo hoko moʻoni ʻa e meʻá ni? [Tuku ke ne tali.] Fanongo angé ki he meʻa ʻoku leaʻaki ʻe he ʻOtuá ʻo fekauʻaki mo ʻene malava ke fakahoko ʻa ʻene ngaahi talaʻofá. [Lau ʻa e ʻAisea 55:11.] ʻIkai ʻoku totonu ke fakalototoʻaʻi kitautolu ʻe he meʻá ni ke tuku ʻetau falalá ʻi he Puleʻanga ʻo e ʻOtuá? Ka ʻe fakahoko ʻafē ʻe he ʻOtuá ʻa ʻene ngaahi talaʻofá?” Fakamatalaʻi te ke tali ʻa e fehuʻi ko iá ʻi hoʻo ʻaʻahi hono hokó.
3 Te ke fai nai ʻa e fakalea ko ʻení ʻi hono fai ha toe ʻaʻahi ki ha taha naʻá ne ʻave ʻa e polosiua “ʻI he Mate Ha Taha ʻOkú Ke ʻOfa Ai”:
◼ “ʻI heʻeku fakakaukau ki heʻeta fetalanoaʻaki ʻo fekauʻaki mo e mole ha taha ʻi he maté, naʻá ku fai ai ha feinga makehe ke u toe foki mai.” Fakahaaʻi ʻa e fakatātā ʻi he peesi 30 ʻi hoʻo pehē: “Manatuʻi ʻa e fakatātā fakafiefia ko ʻeni ʻo e kakai ʻe toe fokotuʻu pea nau fakataha mo honau ngaahi ʻofaʻangá? Naʻá ku tuku atu kiate koe ʻa e fehuʻi ʻo fekauʻaki mo e meʻá ni pe ʻe faí ʻi fē, ʻi hēvani pe ʻi he māmaní. Mahalo pē naʻá ke ʻilo ʻa e tali ʻi he Tohitapú ʻi he peesi 26 ʻo e polosiuá ni.” Fakamatalaʻi ʻa e ngaahi poini tefitó ʻi he palakalafi tolú ʻo fai atu ki he nimá, pea lau ʻa e Sione 5:21, 28, 29. Fakatatau ki he taimí, lau ha ngaahi konga Tohitapu pē ʻoku toe ʻi he peesí.
4 Naʻá ke kamata ha ako ʻi he “Vakai! ʻOku Ou Fakafoʻou ʻa e Meʻa Kotoa Pe”? ʻI hoʻo toe ʻaʻahí, ʻe malava ke ke fai ʻeni:
◼ Toe lave ki he peesi 30, pea tuhu ki he fehuʻí: “Ko e hā ʻa e ngaahi founga ʻoku tuʻu-ki-muʻa ai ʻa e Tohitapu?” Huke ki he peesi 3 mo e 4, pea fakamanatu ʻa e palakalafi 1-4 pehē foki ki he fakatātā ʻi he takafi ʻo e polosiuá. Lau ha konga Tohitapu ʻe taha pe ua naʻe lave ki ai ʻa e fakamatala ʻi lalo ʻi he palakalafi 4. Fakamatalaʻi ko e Tohitapú pē ʻa e tohi ʻokú ne fakaʻaliʻali mai ha ʻamanaki fakaofo pehē. Fai ha fokotuʻutuʻu ki hoʻo ʻaʻahi hono hokó. Hili ʻa e ʻaʻahi hono tolú, kapau ʻoku hangehangē ʻe hoko atu ʻa e akó, ʻe malava leva ke ke kamata līpooti ha ako foʻou!
5 Ko ia ai, toe fakafoki hoʻo fakakaukaú kiate kinautolu kuó ke fetuʻutaki mo iá. Hoko ʻo kīvoi ʻi he toe fokí, pea teuteu ha meʻa ʻaonga ke fevahevaheʻaki ai. Te ke malava ai ʻo hoko ko ha taha “ko eni ia ʻoku fua” ʻi hono ngaohi ha kau ākonga foʻou.—Mt. 13:23.