Ongoongo Lelei ki he Faʻahinga Angamaluú
1 ʻOku tau moʻui ʻi ha taimi ʻoku tuʻunuku ai ʻa e fakamaaú. (ʻIsi. 9:5, 6) ʻOku fakavavevave ke fakahā ki he kakai angamalū ʻi he feituʻu kotoa pē koeʻuhi ke nau lava ʻo teuteu ki he meʻa ʻe hoko maí. ʻI heʻene anga-ʻofá, kuo vaheʻi ai ʻe Sihova ki heʻene kakai ke “malaga aki ae ogoogolelei ki he agamalu.” (ʻAi. 61:1, 2, PM) ʻOku tokoni kiate kitautolu ʻa ʻetau ngaahi makasiní ke fakahā atu ʻa e ongoongo leleí ni ʻi he feituʻu kotoa pē.
2 ʻOku maʻu mei he Taua Leʻo mo e Awake! ʻa e meʻakai mālohi fakalaumālié ʻa ia ʻoku fakatupu mālohi mo ne ueʻi kitautolu. ʻOku fakafiemālieʻi ʻe he Taua Leʻo ʻa e faʻahinga angamaluú ʻaki ʻa e ongoongo lelei ko ia ko e Puleʻanga ʻo e ʻOtuá ʻe vavé ni haʻane liliu ʻa e māmani ki ha palataisi. ʻOku fakatupu ʻe he Awake! ʻa e tui pau ki he talaʻofa ʻa e Tokotaha-Fakatupú ki ha māmani foʻou melino mo malu. Ko hono tufa ki he feituʻu kehekehe ʻa e ongo makasini ko ʻení ko e taha ia ʻo e ngaahi founga vave taha ke ʻave ai ʻa e ongoongo leleí ki he faʻahinga angamaluú. Ko e hā ʻa e ngaahi poini mahuʻinga ʻe lava ke tau fakaeʻa ʻi he ngaahi tatau fakamuimuí?
3 Te ke lava ʻo tuʻuaki ha “Taua Leʻo” pē ʻaki hano ʻeke ha fehuʻi:
◼ “Ko e hā ʻa e ʻaonga ʻokú ke fakakaukau ʻoku malava ke tau maʻu mei hono lau ʻa e Tohitapú? [Tuku ke ne tali.] ʻOku tokoni ʻa e Tohitapu tonu kiate kitautolu ʻi he Loma 15:4 ke tau fakaʻuhinga ʻi he fehuʻi ko iá. [Lau ʻa e Loma 15:4.] Ko e tokolahi taha ʻo e kakai ʻi hotau feituʻu ʻoku ʻi ai ʻa ʻenau Tohitapu, ka ko e tokosiʻi pē ʻoku nau maʻu ha taimi ke lau maʻu pē ia. ʻOku mau tui ko e ʻamanaki papau pē ki he kahaʻú ʻe maʻu ia ʻi he Tohitapú, pea te tau maʻu ʻa e ʻaongá ʻo kapau te tau lau ia.” Tānaki atu ha ngaahi fakamatala feʻungamālie, pea toki tuʻuaki ʻa e makasiní.
4 Ko e “Taua Leʻo” ʻo Mē 1 ʻoku fakaeʻa ai ʻa e kupu mahuʻinga kuo fakakaveinga: “Tauhi Anga-Tonu pea Moʻui!” Te ke malava nai ʻo langaʻi ʻa e mahuʻingaʻiá ʻi he lea kamata ko ʻení:
◼ “Kuo faʻa fifili ʻa e tokolahi pē naʻe anga-fēfē ʻa ʻenau ngaahi kuí. ʻOku fakaʻosiʻaki ʻe he kakai tokolahi tahá ʻe ʻikai pē te tau toe ʻilo, koeʻuhi he kuo nau ʻosi mate. ʻOkú ke fakakaukau ʻoku ʻi ai ha faʻahinga malava ʻe faifai pea tau ʻilo ai ʻa ʻetau ngaahi kuí?” Tuku ke ne tali. Lau ʻa e Sione 5:28, 29. Ngāueʻaki ʻa e ngaahi poini ʻi he peesi 4 ke fakamatala ki he anga ʻo e talaʻofa ʻa e ʻOtuá ke ʻoange kiate kinautolu ʻa e moʻui foʻou ʻi he māmani palataisí.
5 Te ke malava ʻo tuʻuaki ʻa e “Awake!” ʻo Mē 8 ʻaki hano ʻeke ha fehuʻi:
◼ “Ko e hā ʻokú ke fakakaukau ʻe faí ke hoko ai ʻa e moʻuí ʻo fakafiefia?” Tuku ke ne tali. Lave ki he kupu ko e “Ko e Hā ʻa e ʻUhinga ʻo e Moʻuí?”, peesi 26, pea lau ʻa e ngaahi lea ʻa Solomone ʻi he Koheleti 2:11. Ko ia, fakahaaʻi ʻa ʻene fakahinohino ʻi he vahe 12, veesi 13. Fakaafeʻi ʻa e tokotaha-ʻapí ke ne tali ʻa e makasiní.
6 Kapau ʻokú ke ngāueʻaki ha ngaahi makasini ki muʻa ʻi Mē 14, fakapapauʻi ke ʻave ha ngaahi tatau ʻo e Ongoongo ʻo e Puleʻangá Fika 34 pea tuʻuaki ia ki ha taha pē ʻoku teʻeki ai ke ʻi ai haʻane tataú. ʻI hono tufaki ʻa e ngaahi makasiní, ʻoku totonu ke tau manatuʻi ʻoku talitali lelei ʻa e tokotaha-ʻapí ke fai ha tokoni siʻisiʻi ke poupou ki heʻetau ngāué kapau ʻoku nau loto ki ai. ʻOku totonu ke tau mateuteu maʻu ai pē ke ʻoatu ʻa ʻetau ngaahi tohí, ʻo ʻiloʻi ʻe lau nai ia ʻe ha niʻihi kehe ʻi he fāmilí pea pehē ki he ngaahi kaungāmeʻa ʻa ia te nau ʻaʻahi nai kiate kinautolú. (1 Tīm. 6:18) Ko e ongoongo lelei ʻoku tau ʻave ki he faʻahinga angamaluú te ne fakahaofi nai ʻa ʻenau moʻuí.—1 Tīm. 4:16.