Tokoniʻi Kinautolu ʻOku ʻIkai ha Tuí
1 ʻI onopooní, ko e kakai tokosiʻi pē ʻoku nau mātuʻaki hanga atu ki hano liliuʻi ʻe he Puleʻanga ʻo e ʻOtuá ʻa e māmani ko ʻení ke hoko ko ha palataisi. ʻOku fakavīkivikiʻi ʻa e ngaahi poto fakafilōsefa fakaetangatá pea mo e ngaahi fakakaukau fakamahaló, lolotonga ia ʻoku tukunoaʻi pē ʻa e ngaahi meʻa mahuʻinga fakalaumālié ia. Ko e kakai loto-totonú ʻa ia ʻoku nau mahuʻingaʻia ʻi he ngaahi moʻoni mahinongofuá te nau tali lelei ʻa e faingamālie ke vakaiʻi ʻa e tohi Fāʻūtaha ʻi he Lotu ki he ʻOtua Moʻoni Pē Taha. Ko e tohí ni ʻe malava ke ne tokoniʻi kinautolu ʻoku ʻikai ha tuí. (Loma 1:19, 20) Fakapapauʻi ke fai ha ngaahi toe ʻaʻahi kiate kinautolu kotoa ʻoku nau fakahaaʻi ha mahuʻingaʻiá.
2 ʻE kamata nai hoʻo fetalanoaʻakí ʻi he foungá ni:
◼ “ʻI heʻeku haʻu fakamuimuí naʻá ta talanoa ai ʻo fekauʻaki mo e ʻuhinga ʻo e Puleʻanga ʻo e ʻOtuá. Ko ha founga-pule angatonu ia ʻa ia ʻe vavé ni ke ne toʻo atu ʻa e ngaahi palopalema ʻoku lolotonga fehangahangai mo e faʻahinga ʻo e tangatá. Ko e hā hoʻo ongoʻi fekauʻaki mo iá? [Tuku ke ne tali.] Te u saiʻia ke vahevahe mo koe ha konga Tohitapu ʻe taha ʻo kau ki he meʻa ʻe fai ʻe he Puleʻanga ʻo e ʻOtuá maʻá e faʻahinga ʻo e tangatá. ʻOku hā ia ʻi he Fakahā 21:1-4.” Hili hono lau ʻa e konga Tohitapú pea huke ki he peesi 190 ʻo e tohí pea fetalanoaʻaki ʻi he palakalafi 4 mo e tokotaha ʻapí.
3 Pe te ke fai nai ʻa e leá ni ʻi hoʻo fokí:
◼ “ʻOku ʻi ai ʻa e kakai ʻe niʻihi ʻoku ʻikai ke nau tui ki he ʻOtuá. ʻI he ngaahi taʻu kuo hilí, naʻe tātātaha pē ʻa e meʻá ni. Ko e hā hoʻo fakakaukau ki he ʻuhinga ʻoku mole ai ʻa e tui ʻa e kakai ʻe niʻihi ki he ʻOtuá? [Tuku ke ne tali.] Ko e tokolahi ʻoku nau tukuakiʻi ʻa e mole ʻo ʻenau tuí ki he tupulaki fakaʻulia ko ia ʻo e fakamālohí pea mo e faingataʻaʻia lahi ʻi hotau māmaní. ʻOku nau fakaʻuhinga ʻo pehē, kapau ʻoku ʻi ai ha ʻOtua mafimafiʻia, ko e hā ʻoku ʻikai ai ke ne fakangata ʻa e faingataʻaʻiá ni kotoa? Ko kinautolu ʻoku ʻikai te nau maʻu ha tali fakafiemālie ki he fehuʻi ko iá ʻoku nau faʻa hoko ko e kau fakaʻikaiʻi ʻOtua. Ka ʻoku lahi fau ʻa e fakamoʻoni ke fakamoʻoniʻiʻaki ʻoku ʻi ai ʻa e ʻOtua, pea kuo vavé ni ke ne ʻai ʻa e māmaní ko ha feituʻu ʻo e fiefia mo e melino.” Hokohoko atu ʻa e fetalanoaʻakí ʻaki hono ngāueʻaki ʻa e ngaahi fakakaukau Fakatohitapu ʻoku maʻu ʻi he palakalafi 8 mo e 9 ʻo e peesi 81 ʻo kau ki he meʻa ʻoku fakataumuʻa ʻe Sihova ke fai ʻi he kahaʻu vavé ni maí.
4 ʻI hoʻo toʻo hoʻo Tohitapú, te ke kamata nai ʻa e fetalanoaʻakí ʻaki ʻa e leá ni:
◼ “Ko ʻemau toe haʻu eni ke fakahā ʻa e ʻuhinga ʻoku ʻaonga ai ʻa e ako ʻo e Tohitapú ʻi hotau taimí. Ko e tokolahi taha ʻo e kakaí ʻoku ʻi ai ʻenau Tohitapu, ka ko e tokosiʻi pē ʻoku nau vaheʻi ha taimi ke lau ai iá. Ko e niʻihi ʻoku nau tala hangatonu mai pē ʻoku ʻikai ke toe ʻi ai haʻanau falala ʻa kinautolu ki he Tohitapú. Ko e hā hoʻo ongoʻi fekauʻaki mo iá? [Tuku ke ne tali.] Ko e taha ʻo e ngaahi meʻa ʻokú ne fakamoʻoniʻi kiate kitautolu ko e Tohitapú ko e Folofola fakamānava ia ʻa e ʻOtuá ko hono fakahoko ʻo ʻene ngaahi kikité.” Lave ki he ngaahi konga Tohitapu ʻi he palakalafi 6 ʻi he peesi 22.
5 ʻE malava ke tau hoko ko ha tāpuaki ki he niʻihi kehé ʻaki hono ngāueʻaki ʻo e tohí ni ke tokoniʻi kinautolu ke nau maʻu ha makatuʻunga fefeka ki heʻenau tui ki he Puleʻanga ʻo e ʻOtuá pea mo e meʻa te ne fai maʻá e faʻahinga ʻo e tangatá.