Puha Fehuʻi

◼ ʻE lava fēfē ke tau fai ha tali ola lelei ʻi he ngaahi fakatahá?

ʻOku tau fakatuʻamelie atu ki heʻetau fakatahataha fakataha ʻi he ngaahi fakataha fakauike ʻa e fakatahaʻangá. ʻOku tau maʻu ai ʻa e faingamālie ke fakahāhā ʻetau tuí mo fakalototoʻaʻi ʻa e niʻihi kehé ʻaki ʻetau fai ha tali. (Pal. 20:15; Hep. 10:​23, 24) ʻOku totonu ke tau vakai ki hono fai ha tali ko ha monū ia pea feinga ke kau maʻu pē ki ai. ʻE lava fēfē ke tau fai ʻeni ke ola lelei ʻaupito?

Ko e ʻuluaki lākangá ko e teuteu. Ko hono lau ki muʻa mo fai ha fakalaulauloto ki he fakamatalá ʻoku mahuʻinga. Feinga ke maʻu ʻa e ʻuhinga moʻoni ʻo e meʻa ʻoku ʻi aí. Neongo ko e kaveingá ne ʻosi fai ha fetalanoaʻaki ki ai he kuohilí, sio ki ha ngaahi poini fakalahi pe toe lelei ange ʻa ia ʻoku ʻi ai. Tauhi maʻu ʻi he fakakaukaú ʻa e kaveinga fakakātoa ʻo e fakamatalá. ʻI he taimi ʻoku teuteu ai ʻa e ngaahi talí mei ha tohi ʻa ia ʻoku fakaeʻa ai ha meʻa loloto ange ʻi ha ako ki ha tohi Fakatohitapu, hangē ko e tohi Revelation Climax, feinga ke sio ki he anga ʻo e kaunga ʻo ha foʻi veesi ki he ngaahi veesi takatakai ki aí. ʻI he muimui ki he ngaahi fokotuʻu ko ʻení te ne ueʻi ai hoʻo mafai fakaefakakaukaú. ʻE tokoniʻi ai koe ke teuteu ha ngaahi tali lelei pea maʻu ʻa e fiefia ʻi hoʻo kau ki aí.

Ko e ngaahi tali lelei tahá ke nounou, fakalea mahino, pea fakatuʻunga pē ʻi he tohi ʻoku fai ai ʻa e akó. Ko e ʻuluaki tokotaha ʻe talí ʻoku totonu ke ne tali fakahangatonu ʻa e fehuʻi, kae tukuange ʻa e ngaahi poini kehé ki he ngaahi tali ʻe hoko maí. Fakaʻehiʻehi mei hono fai ha ngaahi tali lōloa, ʻoku fihi mo taʻemaau ʻa ia ʻoku mole lahi ai ʻa e taimí pea ʻikai ai ha faingamālie ʻo e niʻihi kehé ke fai ha tali. ʻAi ke ke taliʻaki ʻa e lea pē ʻaʻau, kaeʻoua ʻe lau fakafoʻilea hoʻo talí mei he tohí. Ko e ngaahi tali hoko atú ʻoku totonu ke fakakau ai ʻa e ngaahi poini kuo ʻomai ʻi he ngaahi konga Tohitapú. Fanongo tokanga ki he meʻa ʻoku leaʻaki ʻe he niʻihi kehé koeʻuhi ke lava ke ke fakaʻehiʻehi mei hano toe fai ʻo e tali tatau ʻa ia ʻoku ʻikai ke fiemaʻú.

ʻOku lelei ke hiki ho nimá tuʻo lahi kae ʻikai ʻi he palakalafi kotoa pē. Ke tau fakaafeʻi ʻa e fānau iikí ke kau ʻi hono fai ha tali. Kapau ʻokú ke veiveiua fekauʻaki mo hono fai ha tali, ʻe lava ke ke fakahā ki muʻa ki he tokotaha faiakó ʻa e palakalafi ko ia ʻokú ke fiemaʻu ke tali aí pea ngalingali te ne ʻoatu kiate koe ha faingamālie ke ke fai pehē.

Ko kitautolu kotoa ʻoku totonu ke tau feinga mālohi ke ʻi ai ha ngaahi meʻa ke kau ki ai ʻi he ngaahi fakataha ʻa e fakatahaʻangá ʻa ia ʻoku fakakau atu ki ai ʻa e kau fanongó. Manatuʻi, ko e lavameʻa ʻo e ngaahi fakataha peheé ʻoku fakatuʻunga ia ʻi he lahi ʻo ʻetau loto-leleí pea mo ola lelei ange ʻi hono fai ha tali.​—Sāme 26:12.