Polokalama ʻAsemipilī ʻAho Makehe Foʻou
1 Ko e hā ʻoku totonu ai ke ʻoua ʻe tuku ʻa hono talaki ʻo e ongoongo leleí? Ko e hā ʻa e ngaahi fiemaʻu ki he hoko ko ha tokotaha malanga ʻo e ongoongo leleí? ʻE lava fēfē ke kau naʻa mo kinautolu ʻoku anga-mā mo loto-siʻi ʻi hono fevahevaheʻaki ʻo e ongoongo leleí mo e niʻihi kehé? Ko e ngaahi fehuʻí ni mo e ngaahi fehuʻi fakatupu fakakaukau kehe ʻe lava ke tali ia ʻi he polokalama ʻo e ʻasemipilī ʻaho makehé ʻa ia ʻe kamata ʻi Sepitema, ʻaki ʻa e kaveinga ko e “Taau ko e Kau Faifekau ʻo e Ongoongo Leleí.”—2 Kol. 3:5.
2 ʻI he tuʻunga ko e kakai ʻa Sihová, kuo pau ke tau sivisiviʻi lelei ʻa hotau ʻulungaangá. Ko e ngaahi meʻa fakalototoʻa naʻe hokosiá ʻe fakahā ia ʻe ha kau talavou ʻa ia te nau fakamatala ki he founga ʻo ʻenau talitekeʻi ʻa e ngaahi fakaʻaiʻai ʻa honau toʻú. ʻE ʻomai ai ki he ngaahi mātuʻá ʻa e fakalototoʻa anga-ʻofa ʻo fekauʻaki mo e fiemaʻu ke akoʻi ʻenau fanaú ke hoko ko e kau faifekau ʻa e ʻOtuá. Ko kitautolu kotoa ʻe lava ʻo tokoniʻi ke houngaʻia ʻi he pau ke malangá pea ko ia ai, ko hono olá ʻe utu ai ʻa e ngaahi tāpuaki ʻe kitautolu mo kinautolu ʻoku fanongo kiate kitautolú.—1 Tīm. 4:16.
3 ʻOku pau ʻe hoko ʻa e papitaisó ko e meʻa mahuʻinga ia ʻo e ʻahó. Ki muʻa aí, ʻe fai ha malanga makatuʻunga ʻi he Tohitapú ʻo fakahanga tautefito pē ki he faʻahinga ʻosi fakatapui foʻoú. Ko e moʻoni ko kinautolu kotoa aí te nau loto ke fai ha tokanga lelei ʻi he taimi ʻe fai ai ʻa e malanga papitaisó ʻi hono fakahaaʻi māʻalaʻala ʻa hono ʻuhingá. ʻOku totonu ki ha taha pē ʻoku fie papitaiso ʻi he ʻasemipilī ʻaho makehé ke ne ʻai ke ʻilo lelei ki ai ʻa e ʻovasia tauhí ki muʻa koeʻuhi ke ʻi ai hano taimi feʻunga ke fokotuʻutuʻu ki he kau mātuʻá ke fakamanatu ʻa e ngaahi fehuʻi kuo vaheʻí pea mo e faʻahinga teu papitaisó.
4 Ko ha toe meʻa mahuʻinga ʻe taha ko e malanga tuʻu-ki-muʻa ʻe fai ʻe ha taha ʻi he kau ʻaʻahí. ʻOku fakakaveinga ia ko e “Taau mo Mateuteu ko e Kau Faifekau ʻa e ʻOtuá.” ʻE fakamatala ai ki he ngaahi tokonaki tefito ʻe fā te ne teuʻi kitautolu ke hoko ko e kau faifekaú, pea ʻe fakakau foki ʻi he malangá ʻa e ngaahi meʻa naʻe hoko ʻoku nau langaʻi ʻa e tuí.
5 Fokotuʻutuʻu atu he taimí ni ke ʻi ai ʻi he polokalamá kotoa. Fakapapauʻi ke fakaafeʻi ʻa e faʻahinga mahuʻingaʻiá mo e kau ako Tohitapú koeʻuhi ke lava ke nau maʻu ʻe kinautolu foki ha ʻaonga mei he ʻaho ʻo e ako fakateokalati ko ʻení. ʻI he meʻá ni ʻe lava ai ke tau fakapapauʻi ʻoku tau “taau feʻunga” ko e kau faifekau ʻo e ongoongo leleí.