Polokalama ʻAho ʻAsemipilī Makehe Foʻou

“ʻIlonga ha Meʻa ʻOku Fai, ʻOku Fai Koeʻuhi ko e Ongoongo Leleí” ko e kaveinga ia ʻo e polokalama ʻaho ʻasemipilī makehe foʻou ʻoku kamata ʻi Sepitema. (1 Kol. 9:23) Ko e ongoongo lelei ʻo e Puleʻangá ko e ongoongo mātuʻaki mahuʻinga ia ʻoku fanongoa he ʻaho ní. ʻE tokoniʻi kitautolu ʻe he polokalamá ke tau houngaʻia ʻi he monū taʻehano tatau ʻoku tau maʻu ko e hoko ko e kau fanongonongo atu ʻa e ongoongo fakaofo ko ʻení. Te ne toe fakalotolahiʻi foki kitautolu ke hanganaki talaki ʻa e ongoongo leleí ʻo ʻoua ʻe foʻi.​—Ng. 5:42.

ʻE fakahā mai kiate kitautolu ʻe he polokalamá ʻa e founga ke ngāuekakatoʻaki ai ʻetau ako fakateokalatí koeʻuhi ke tau lava ʻo fakahoko ha meʻa lahi ange ʻi he ngāue fakafaifekaú. Te tau fanongo mei ha niʻihi kuo nau fai ha ngaahi feʻunuʻaki ke fakalahi ʻenau ngāue fakamalangá, kau ai ha toʻutupu ʻoku nau foaki atu honau kotoá ke toe fakalahi atu ʻa e ongoongo leleí.​—Fakafehoanaki mo Filipai 2:22.

Ko e malanga tefitó, ʻe fai ia ʻe ha tokotaha malanga ʻaʻahi, te ne fakamamafaʻi ai ʻa e fiemaʻu kiate kitautolu ke tau kei hoko ʻo ‘lelei ai ke tuku kiate kitautolu ʻa e Ongoongo Leleí.’ (1 Tes. 2:4) ʻE tokoniʻi ai kitautolu ke tau sio kapau te tau puke maʻu ʻa e monū ko hono vahevahe atu ʻa e ongoongo leleí mo e niʻihi kehé, kuo pau ke tau hokohoko atu ʻetau taau ki he ngaahi fiemaʻu mo e ngaahi tuʻunga ʻa e ʻOtuá ʻi heʻetau fakakaukaú mo e ʻulungaangá. ʻE toe fakaeʻa ai ʻa e ngaahi tāpuaki te tau maʻu mei hono fai ʻa e meʻá ni.

ʻOua naʻá ke liʻaki ʻa e polokalama mātuʻaki mahuʻinga ko ʻení. Ko e kau fakatapui foʻou ʻoku nau loto ke papitaiso ʻi he ʻaho ʻasemipilī makehé ʻoku totonu ke nau fakahā leva ki he ʻovasia tauhí. Fakaafeʻi kotoa ʻa kinautolu ʻoku mou akó ke nau haʻu ki ai. ʻAi ke tau fakaʻatā ʻa Sihova ke ne fakaivimālohiʻi kitautolu ke tau fai ʻa e meʻa kotoa pē koeʻuhi ko e ongoongo leleí pea fakaʻosi ai ha ngāue lahi taha ki muʻa ʻi ʻĀmaketone.